Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 108: Tan-dala ho A-Damaskosy Ane

Tantara 108: Tan-dala ho A-Damaskosy Ane

HAINAO va olo mandry amy tany io? Saoly io. Tiaròvo, fa io aze niamby akanjo lahilahy nitora-bato an’​i Stefana reny. Mba henteo hazavà mamirapiratse io! Ino ty raha miseho etoa?

Nitarike olo maro mba hampijaly mpanara-dia an’​i Jesosy reny Saoly, laha fa nimaty Stefana. Notetezin’​i Saoly kiraidraike iaby ty tranon’​olo mba hilàne mpanara-dia an’​i Jesosy reny. Naboane baka an-tranone ao olo reny, ka nogadràne ami’​zay laha fa bakeo. Maro tamy mpianatsin’​i Jesosy ro nilay tamy tanà hafa, ka nanomboke nitory ty “vaovao soa” tany. Fe nandeha tan-tany hafa kea Saoly mba hila mpanara-dia an’​i Jesosy reny. Tan-dala ho a-Damaskosy ane ie, henany zao. Fe nisy raha nahatserike niseho tan-dala teny:

Tampotampoke teo, le nisy hazavà baka an-danitse ane, nanazava ty manodidy an’​i Saoly. Nilàvo tamy tany teo ie, arake ty hitanao amy sary io. Bakeo nisy feo nivòla hoe: ‘Saoly, Saoly! Nanino zaho ampijalìnao io?’ Nahita hazavà iny, sady naharé feo io kea lahilahy niarake tamin’​i Saoly reny, fe tsy azon-droze ty raha noresahy teo.

Saoly jiky hazavà iny

‘Ia iha io, Tompoko?’, hoy ty fanontanea napetran’​i Saoly.

Namaly feo iny hoe: ‘Zaho ro Jesosy, aze ampijalìnao io.’ Nivòla raha zay Jesosy, satria ty vatane mihitsy ro eritseretine hoe nijaly laha fa nampijaly ty mpanara-dia aze Saoly.

Nanontany ndraike Saoly hoe: ‘Ka ino lahy ty raha tokone hataoko, Tompo?’

‘Mitsangàna iha, ka ndahàna a-Damaskosy ane. Hovolàne aminao ane ty raha tokone hataonao’, hoy ty navalin’​i Jesosy aze. Laha fa nitsanga Saoly, le nanenty, fe tsy nahita raha sasy ty masone. Nanjary jiky Saoly! Ka nitarike aze tami’​ty tanane ho a-Damaskosy ane lahilahy niarake amine reny.

Niresake tamy mpianatsine raike zay Jesosy henany zao, mba ho a-Damaskosy ane, ka nanao hoe: ‘Ananiasy! Mitsangàna, ka ndahàna iha ho amy lala atao hoe Mahity zay. Laha fa avy amy tranon’​i Jodasy ao iha, le anontanio ao lahilahy raike, mana anara hoe Saoly zay. Fa nofilìko ho mpanompoko ie.’

Nanorike ty safàn’​i Jesosy Ananiasy ka nandeha. Laha fa nahita an’​i Saoly ie, le nametrake ty tanane tamine teo ka nivòla tamin’​i Saoly hoe: ‘Nirahy Tompo ho aminao atoy aho soa hahita ndraike ty masonao, ka ho feno ty fanahy masy iha.’ Tampotampoke teo, le nisy raha atao ho kiram-pia io niala tami’​ty mason’​i Saoly, ka afake nahita soa ndraike ie.

Nampiasàn’​i Jesosy mafy Saoly mba hitory amy karazan’​olo baka amy tany maro. Nanjary apostoly Paoly ty anarane nanomboke teo. Hianatse raha maro mikasike aze tsika laha fa afarafara ao. Fe ndao tseky ho henteantsika henany zao ty raha naniràha-Ndranahare an’​i Petera.

Asan’​ny Apostoly 8:​1-4; 9:​1-20; 22:​6-16; 26:​8-20.



Fanontanea

  • Ino ty raha nataon’​i Saoly tafara’​ty nahafatesan’​i Stefana?
  • Nisy raha nahatserike niseho tamin’​i Saoly, laha fa tamy lala ho a-Damaskosy ane iny ie. Ino raha io?
  • Ino ty raha nampanaòvin’​i Jesosy an’​i Saoly?
  • Ino ty raha nampanaòvin’​i Jesosy an’​i Ananiasy? Nahita ndraike Saoly laha fa bakeo, ino ty nahavy raha zay?
  • Nanjary ia koa ty anara nahaìza an’​i Saoly? Ino ty asa naniràha aze?

Fanontanea Fanampine

  • Vakio Asan’​ny Apostoly 8:​1-4.

    Nanjary niparitake tamy tany maro ty finoa kristiana ka nihamaro, laha fa nenjéhy fiangona kristiana vaovao iny. Fa nanino? Ino koa ty raha miseho amy androntsika henany zao, ka mitovy amin’​io? (Asa. 8:​4; Isaia 54:​17)

  • Vakio Asan’​ny Apostoly 9:​1-20.

    Ino iaby asa telo tean’​i Jesosy hataon’​i Saoly io? (Asa. 9:15; 13:​5; 26:​1; 27:24; Rom. 11:​13)

  • Vakio Asan’​ny Apostoly 22:​6-16.

    Amy fomba manao akore ro hanahàfantsika an’​i Ananiasy? Ino ty antone ilà raha zay? (Asa. 22:12; 1 Tim. 3:​7; 1 Pet. 1:​14-16; 2:​12)

  • Vakio Asan’​ny Apostoly 26:​8-20.

    Manatanjake aze manambaly tsy Vavolombelo reo, ty fiovàn’​i Saoly ho Kristiana. Fa manino? (Asa. 26:11; 1 Tim. 1:​14-16; 2 Tim. 4:​2; 1 Pet. 3:​1-3)