Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 102: Velo Ndraike Jesosy

Tantara 102: Velo Ndraike Jesosy

HAINAO va hoe ia ampela noho lahilahy roe amy sary etoa io? Maria Magdalena, aze naman’​i Jesosy iny ampela io. Anjele lahilahy manao akanjo foty roe reo. Napetrake tamy trano kelikele ilìran’​i Maria amy sary io, ty fatin’​i Jesosy. Lolo ro ikaìha aze. Fe tsy hita tao sasy ty fatin’​i Jesosy! Ia ty nangalake aze? Ndao ho henteantsika.

Anjele miresake amy maria magdalena

Laha fa nimaty Jesosy, le hoy ty asa mpisoro reny tamin’​i Pilato: ‘Tamin’​i Jesosy mbo nivelo iny, le nivòla fa ho velo zao ndraike ie laha fa afake telo andro. Ka asio mpiamby, lolo misy aze io. Mety hangalàry mpianatsine reny ty fatine, ka hivòla amin’​olo roze fa nitsanga tamy maty Jesosy!’ Nivòla tamy mpisoro reo mba handefa mpiamby hiamby lolo misy an’​i Jesosy io ­Pilato.

Fe telo andro tafara’​ty nahafaty an’​i Jesosy, le nisy anjelin’​i Jehovah niavy. Nalàne tamy lolo io teo vato be iny. Navàka biby mpiamby reny, ka tsy afake nihetsike. Tamy farane, laha fa nilitse tan-dolo tao roze, le tsy nihitan-droze tao sasy ty fatin’​i Jesosy! Nandeha tan-tanà ane ty sasane amy mpiamby reo, ka nanambara tami’​ty mpisoro. Hainao va ty raha natao mpisoro raty fanahy reo? Namean-droze drala mpiamby reny, soa havandy. Hoy ty asa mpisoro reny tamy mpiamby reny hoe: ‘Volàno ho’​zao ze manontany anareo hoe, niavy tan-dolo tao mpianatsin’​i Jesosy reny nankaly, tamy zahay mbo niroro, ka nangalatse faty iny.’

Nandeha tan-dolon’​i Jesosy tany ty ampela namane sasane. Tserike biby roze nahita lolo iny tsy nisy raha! Nisy anjele roe mazava rezay niseho tampotampoke teo: ‘Ino ty antone ilànareo an’​i Jesosy ato?’, hoy ty fanontanean’​anjele reny. ‘Fa velo ndraike ie. Ndahàna malaky nareo, ka volàno mpianatsine reny.’ Nilailay malaky ampela reny! Fe nisy lahilahy nanàka an-droze tan-dala teny. Hainao va hoe ia io? Jesosy io! ‘Ndahàna volàno malaky mpianatsiko reny’, hoy ty asane.

Laha fa niresake tamy mpianatsin’​i Jesosy reny ampela reo hoe velo ndraike Jesosy, ka nahita aze roze, le tsy nino mpianatse reny. Nilay ho an-dolo ane ndraike Petera noho Jaona mba hanenty maso raha zao, fe tsy nisy raha ty tao! Laha fa nandeha Petera noho Jaona, le mbo nijàno teo avao Maria Magdalena. Nilitse tao ndraike ie, ka nahita anjele roe reo.

Hainao va ty raha niseho tamy vatan’​i Jesosy? Natao-Ndranahare ze tsy hahità ty vatane. Tsy namelo an’​i Jesosy mba hana nofotse ka ho maty ndraike Andranahare. Nameane vata ara-panahy (tsy hita maso) vaovao Jesosy, ka manahake ty vata anana’​ty anjele an-danitse ane reny io. Fe mba hahafàha’​ty mpianatsine hahita an’​i Jesosy hoe velo ndraike, le afake nanova ty vatane ho vatan’​olombelo azo hentea noho tsapà Jesosy. Mbo hianarantsika ty mikasike an’​io laha fa afarafara ao.

Matio 27:​62-66; 28:​1-15; Lioka 24:​1-12; Jaona 20:​1-12.



Fanontanea

  • Ia va ampela amy sary io? Ia lahilahy roe eo reo? Aìa ty misy an-droze io?
  • Nanino Pilato ro nivòla tamy mpisoro reo mba handefa miaramila hiamby ty lolon’​i Jesosy?
  • Tamy andro fahatelo nahafatesan’​i Jesosy, ino ty raha nataon’​anjele raike, vo maraindray biby? Fe ino ty raha natao’​ty mpisoro?
  • Nanino ty ampela sasane ro nitserike laha fa nisafo lolon’​i Jesosy iny?
  • Nanino Petera noho Jaona ro nilay malaky ho an-dolon’​i Jesosy ane? Ino ty raha hitan-droze?
  • Nanjary nanao akore ty vatan’​i Jesosy? Fe ino ty raha nataone mba hahafaha mpianatsine reo hahita aze hoe velo ndraike?

Fanontanea Fanampine

  • Vakio Matio 27:​62-66 noho 28:​1-15.

    Tamy fotoa nitsanganan’​i Jesosy tamy maty, le nanota tamy fanahy masy loha’​ty mpisoro noho Fariseo miarake amy anti-panahy reny. Ino fahotà nataon-droze io? (Matio 12:​24, 31, 32; 28:​11-15)

  • Vakio Lioka 24:​1-12.

    Ino ty porofo mampiseho fa mieritseritse ty ampela ho vavolombelo azo iantehéra Jehovah, amy tantara mikasike fitsanganan’​i Jesosy tamy maty io? (Lioka 24:​4, 9, 10; Matio 28:​1-7)

  • Vakio Jaona 20:​1-12.

    Laha mbo misy tsy mazava amintsika ty fahatanteraha’​ty faminania amy Baiboly ao sasane, le tokone hahalìny tsika. Manao akore ty fomba iresaha’​ty Jaona 20:​8, 9 raha zay? (Ohab. 4:18; Matio 17:​22, 23; Lioka 24:​5-8; Jaona 16:​12)