Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 110: Mpanampy An’​i Paoly Vaovao Timoty

Tantara 110: Mpanampy An’​i Paoly Vaovao Timoty

TIMOTY ty anara lahilahy matanjake miarake amin’​i Paoly amy sary io. Niarake nipetrake tamy fianakaviane ta-Lystra tao Timoty. Eonika ty anara’​ty renine, Loisa ty anara’​ty razane ampela.

Fa intelo amy henany zao ty nandehànan’​i Paoly ta-Lystra tao. Paoly noho Barnabasy ro niavy teto voalohane, tao raike talohan’​io. Nitory roze tami’​zay. Nimpòly tamy tanà io ndraike Paoly, fe niarake tamy namane raike atao hoe Silasy zay ie henany zao.

Timoty noho Paoly

Hainao va raha volànin’​i Paoly amin’​i Timoty io? Nanontany an’​i Timoty ie hoe: ‘Teanao va ty hiarake aminay amy Silasy? Afake manampy anay mba hitory amy tany lavitse ane kea iha.’

‘Eka’, hoy ty asan’​i Timoty, ‘ta-handeha aho.’ Tsy ela tafara resake ­nifanaòvan-droze io, le niala tamy fianakaviane tao Timoty, ka nanarake an’​i Paoly noho Silasy. Fe aloha’​ty hianarantsika mikasike lia lavitse nataon-droze io, le ndao tseky ho henteantsika ty raha niseho tamin’​i Paoly. Fa 17 tao zay, ty nisehoan’​i Jesosy tamin’​i Paoly, tamin’​ie tan-dala ho a-Damaskosy ane iny.

Tiaròvo, fa nandeha ta-Damaskosy ane Paoly mba hampijaly mpianatsin’​i Jesosy reny, fe nanjary mpianatse kea ty vatatenane henany zao! Laha fa tafara atoy, le nisy fahavalo ta hamono an’​i Paoly, satria tsy tean-droze ie nampianatse raha mikasike an’​i Jesosy io. Fe naròva’​ty mpianatse sasane ie. Nataon-droze tanaty sobìky ie, ka najòtson-droze tambalike rindry tanà io.

Nandeha hitory ta-Antiokia ane Paoly tafara raha zay. Tany ro nikaìha voalohane ty mpanara-dia an’​i Jesosy hoe Kristiana. Niala ta-Antiokia tao ami’​zay Paoly noho Barnabasy ka nirahy mba hitory an-tany hafa ane. Lystra ty raike amy tanà nandehànan-droze. Tanà niavian’​i Timoty io.

Tao raike tafara atoy, le nimpòly ta-Lystra tany fanindroane ndraike Paoly. Laha fa niarake tamin’​i Paoly noho Silasy, Timoty, hainao va ty tany nandehànan-droze? Henteo sary tany io, bakeo ndao hianarantsika ty anara’​ty toera sasane.

Nandeha tamy tanà marìny an’​i Ikonioma teo roze, bakeo tamy tanà ­faharoe manarake aze, atao hoe Antiokia zay. Nandeha ta-Troasy tany, ta-​Filipy, Tesalonika, noho ta-Beria tany roze tafaran’​io. Hitanao va Atena amy sary tany io? Nitory tany Paoly. Nandany tao raike mba hitory ta-​Korinto tany roze tafara atoy. Farane, le nijàno kelikele ta-Efesosy tao roze. Niondra sambo ndraike roze laha fa bakeo, ka nimpòly ta-Kaisaria, noho ta-Antiokia, tamy tanà nipetrahan’​i Paoly tao.

Hita tamin’​io fa nandeha tamy lala fa ho zato kilometatse mahery Timoty, mba hitorìa ty “vaovao soa” noho hanànga fiangona kristiana maro. Ka laha fa be koa iha, tsy ho teanao va ty hazoto hanompo an’​Andranahare manahake an’​i Timoty?

Asan’​ny Apostoly 9:​19-30; 11:​19-26; toko faha-13 zisiky amy toko faha-17; 18:​1-22.

Sary tany

1. Roma; 2. Malta; 3. Beria; 4. Tesalonika; 5. Korinto; 6. Filipy; 7. Atena; 8. Kreta; 9. Troasy; 10. Efesosy; 11. Mileto; 12. Kolosia; 13. Antiokia; 14. Ikonioma; 15. Lystra; 16. Kyprosy; 17. Antiokia; 18. Kaisaria; 19. Jopa; 20. Damaskosy; 21. Jerosalema; 22. Riake Be (Mediterane)



Fanontanea

  • Ia va ajà lahilahy amy sary io? Mipetrake aìa ie? Ia ty anara’​ty renine noho ty renibény?
  • Nanontany an’​i Timoty Paoly, laha te hiarake amine noho Silasy handeha hitory amy tany lavitse ane ie. Ino ty safà navalin’​i Timoty?
  • Taìa ro nikaìha voalohane ty mpanara-dia an’​i Jesosy hoe Kristiana?
  • Taìa ty tanà nandehanan’​i Paoly, Silasy, noho Timoty, laha fa niala an’​i Antiokia roze?
  • Tamy fomba manao akore ro nanampian’​i Timoty an’​i Paoly? Fanontanea ino ro tokone hapetra’​ty zatovo ami’​ty vatane?

Fanontanea Fanampine

  • Vakio Asan’​ny Apostoly 9:​19-30.

    Tamy fomba manao akore ro nampisehoan’​apostoly Paoly fa mahay miamby soa ie, laha fa nisy nanohitse ty fitoria vaovao soa? (Asa. 9:​22-25, 29, 30; Matio 10:​16)

  • Vakio Asan’​ny Apostoly 11:​19-26.

    Ambara amy tantara amy Asan’ ny Apostoly 11:​19-21, 26 ao iny, fa mitarike ty asa fitoria ty fanahin’​i Jehovah. Akore ro ahità raha zay?

  • Vakio Asan’​ny Apostoly 13:​13-16, 42-52.

    Hita amy Asan’​ny Apostoly 13:​51, 52 ao fa tsy kivy mpianatse reny laha fa nisy nanohitse an-droze. Hazavao. (Matio 10:14; Asa. 18:​6; 1 Pet. 4:​14)

  • Vakio Asan’​ny Apostoly 14:​1-6, 19-28.

    Laha fa manampy olo vaovao tsika, le mila ‘apetrantsika amin’​i Jehovah ty fikarakarà an-droze.’ Manino raha zay ro manampy antsika tsy ho sahiran-tsay loatse? (Asa. 14:​21-23; 20:32; Jaona 6:​44)

  • Vakio Asan’​ny Apostoly 16:​1-5.

    Naneke hatao savatse Timoty. Hita tamy raha nataone zay fa nisy lanjany bevata tamine ty fanaòva ‘ty raha iaby noho’​ty vaovao soa.’ Hazavao. (Asa. 16:​3; 1 Kor. 9:23; 1 Tes. 2:​8)

  • Vakio Asan’​ny Apostoly 18:​1-11, 18-22.

    Resahy amy Asan’​ny Apostoly 18:​9, 10 ao, fa Jesosy ro mitarike ty asa fitoria. Hazavao. Ino ty raha tamanintsika baka amy raha zay? (Matio 28:​20)