Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 107: Notoràha Vato Stefana

Tantara 107: Notoràha Vato Stefana

STEFANA lahilahy mandohalike amy sary io. Mpianatse tsy nivalike tamin’​i Jesosy koa ie. Mba henteo moa ty raha mahazo aze eo! Toràha lahilahy reo bolongam-bato Stefana. Ino va ty antone tsy nitiava lahilahy reo an’​i Stefana ka nanaòvan-droze raha raty bibike manahake an’​io? Ndao ho ­henteantsika.

Stefana toràha vato

Nanampy an’​i Stefana mba hanao fahagagà maro Andranahare. Hàla lahilahy reo raha zay, ka nialy hevitse tamin’​i Stefana roze mikasike ty fampianarane fahamarìna ty vahoake. Fe nanome fahendrea an’​i Stefana Andranahare, ka natorone fa diso ty fampianara lahilahy reo. Nampanjeky ty heloke lahilahy reo raha zay. Nosamborin-droze Stefana. Bakeo nikaike olo hafa roze mba hamoro vandy mikasike an’​i Stefana.

Nanontany an’​i Stefana ty mpisoronabe hoe: ‘Marina iaby va raha volànin-droze mikasika anao zao?’ Lahateny soa baka amy Baiboly ao ro namalian’​i Stefana fanontanea zay. Nambaran’​i Stefana mpisoronabe reny bakeo ty antone tsy nitiavan’​olo raty fanahy, ty mpaminanin’​i Jehovah taloha. Hoy ty asane hoe: ‘Mitovy amin’​olo raty fanahy reny nareo. Namono an’​i Jesosy mpanompo-Ndranahare nareo, sady tsy nanorike ty lalà-Ndranahare koa.’

Neloke biby mpitarike fivavàha reo laha fa naharé raha zay, ka le niromotsy. Fe, nampiakarin’​i Stefana ty lohane ka nivòla ie hoe: ‘Ndroy! Hitako Jesosy mitsanga ankavàna-Ndranahare, an-danitse ane.’ Notampéna lahilahy reo ty sofiny laha fa naharé raha zay, sady niarake nivorivory tamin’​i Stefana teo roze, ka namàngo aze. Nosamborin-droze Stefana sady nandesy lahilahy raty fanahy reo niboake tanà io.

Napotan-droze ty akanjo tamy farane anabo amy sikin-droze teny, ka nampiembenine lahilahy raike, atao hoe Saoly zay. Hitanao amy sary eto va Saoly? Bakeo nanomboke nitora-bato an’​i Stefana ty olo sasane. Hita amy sary eo, fa nandohalike Stefana sady nivavake tami-Ndranahare hoe: ‘Ka manasazy an-droze ami’​ty raha raty ataon-droze amiko lahy iha Jehovah.’ Hain’​i Stefana fa voafitake tamy resake natao mpitarike fivavàha reo ty sasane tamin’​olo reo. Maty Stefana laha fa nivitane vavake io.

Laha fa misy olo manao raha raty anao, hamaly faty aze va iha, sa ­hangatake ami-Ndranahare mba hamaliane ty raha raty nataone taminao? Tsy nanao ho’​zay Stefana na Jesosy. Nisoa fanahy tamin’​olo tsy nitea an-droze reny avao roze. Afake mianatse ty raha nataon-droze kea tsika.

Asan’​ny Apostoly 6:​8-15; 7:​1-60.



Fanontanea

  • Ia moa Stefana zao? Nampia-Ndranahare hanao ino ie?
  • Ino ty raha novolànin’​i Stefana ka nampeloke mpitarike fivavàha reny?
  • Nandesy niboake tanà io Stefana. Ino ty raha natao aze laha fa niavy tany?
  • Ia va lahilahy mitsanga marìny akanjon’​i Stefana, amy sary io?
  • Ino ty raha nangatahin’​i Stefana tamin’​i Jehovah taloha’​ty nahafatesane?
  • Manao akore ty fomba hanahàfantsika an’​i Stefana laha fa misy olo manao raha raty amintsika?

Fanontanea Fanampine

  • Vakio Asan’​ny Apostoly 6:​8-15.

    Ino ty fitake ampiasà mpitarike fivavàha reo mba hampijanòna ty asa fitoria atao’​ty Vavolombelon’​i Jehovah? (Asa. 6:​9, 11, 13)

  • Vakio Asan’​ny Apostoly 7:​1-60.

    Tamy fomba manao akore ro nahafàhan’​i Stefana niaro ty vaovao soa laha fa nampiakary tamy Fitsarà Anabo ane ie? Ino ty fianara azontsika baka amy raha zay? (Asa. 7:​51-53; Rom. 15:​4; 2 Tim. 3:​14-17; 1 Pet. 3:​15)

    Tokone hanao akore ty fihetsike asehontsika amin’​olo manohitse asantsika reo? (Asa. 7:​58-60; Matio 5:44; Lioka 23:​33, 34)