Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 105: Fandinìsa Ta-Jerosalema Ao

Tantara 105: Fandinìsa Ta-Jerosalema Ao

OLO mpanara-dia an’​i Jesosy olo eto reto. Nanorike ty safàn’​i Jesosy roze, ka nijàno ta-Jerosalema tao. Niarake nandìny tamy trano io tao roze, ka nisy feo maré biby niré tanaty trano io tao. Manahake tsioke mitsioke biby reny feo io. Nisy lela atao ho afo io niseho tan-doha mpianatse kiraidraike reny teo. Hitanao va afo an-dohan-droze eo reo? Ino ty dika raha reo?

Fanahy masy an-doha mpianatse tamy taonjato voalohany

Fahagagà io! Fa miarake amy babane an-danitse ane Jesosy tamy fotoa io, ka nandatsake ty fanahi-Ndranahare tamy mpanara-dia aze reo. Hainao va ty raha nataon-droze laha fa nahazo fanahy masy io? Nanomboke nivòla tamy safà sankarazane roze.

Maro tamin’​olo ta-Jerosalema ao, ro nivorivory mba hanenty ty raha niseho laha fa naharé feo maneno biby, mitovy amy tsioke mahery io. Nisy olo baka an-tany hafa ane niavy tao tamy fotoa io, satria andro fanaòvan’​Israelita reo fety, atao hoe Pantekosta zay tamin’​io. Nitserike biby vahiny reny! Ren-droze mpianatse reny nivòla tamy fivolànan-droze, miresake mikasike ty raha soa natao-Ndranahare.

‘Baka Galilia ane iaby olo reo’, hoy ty asa vahiny reny. ‘Amy fomba manao akore ro ahaìzan-droze fivolàna sankarazane baka an-tanindrazantsika ane io?’

Nitsanga Petera henany zao, ka nanazava tamin-droze ty mikasike raha zay. Nivòla maré ie sady nanambara tamy vahoake reo ty fomba namonòa an’​i Jesosy noho ty namelòma-Ndranahare aze ndraike. Hoy Petera: ‘An-danitse ane Jesosy henany zao, ka mipetrake amy tana-Ndranahare ankavàna eo. Nalatsane fanahy masy fa nampitamànine iny. Ka zay ty antone nahitanareo noho naharenesanareo fahagagà iaby zao.’

Laha fa baka nivòla raha iaby reo Petera, le naneny tami’​ty raha raty nataon-droze an’​i Jesosy ty ankamaroan’​olo. Nanontany roze hoe: ‘Ino ty raha tokone hataonay?’ Namaly Petera hoe: ‘Mila manova ty fiaìnanareo nareo ka tokone hatao batisa.’ Ka olo 3 000 teo ho eo ro natao batisa tamy andro io. Mpanara-dia an’​i Jesosy roze henany zao.

Asan’​ny Apostoly 2:​1-47.



Fanontanea

  • Arake ty hitanao amy sary eo, ino ty raha niseho tamy mpanara-dia an’​i Jesosy nandìny ta-Jerosalema tao reny?
  • Ino ty raha nahatserike olo nivahiny ta-Jerosalema tao reny?
  • Ino ty raha nohazavàn’​i Petera tamin’​olo?
  • Nanao akore ty ankamaroan’​olo laha fa baka nijànjy an’​i Petera? Ino va raha novolànin’​i Petera tamin-droze io?
  • Firy va ty olo natao batisa, tamy Pantekôty, tao faha-33 io?

Fanontanea Fanampine

  • Vakio Asan’​ny Apostoly 2:​1-47.

    Hita amy safàn’​i Petera amy Asan’​ny Apostoly 2:​23, 36 ao fa ty firenena jiosy manontolo ro nahavy ty fahafatesan’​i Jesosy iny. Ino ty antone? (1 Tes. 2:​14, 15)

    Nihain’​i Petera soa ty nampiasa Baiboly mba hahavy ty olo handinike noho hieritseritse. Hazavao. (Asa. 2:​16, 17, 29, 31, 36, 39; Kol. 4:​6)

    Nampitamà an’​i Petera Jesosy fa hameane aze ty “lakile fanjakà’​ty lanitse.” Nanao akore ty fomba nampiasan’​i Petera lakile io voalohane? (Asa. 2:​14, 22-24, 37, 38; Matio 16:​19)