Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 104: Nimpòly An-danitse any Ndraike Jesosy

Tantara 104: Nimpòly An-danitse any Ndraike Jesosy

LAHA fa nandeha ty fotoa, le niseho matetike tamy mpianatsine reny Jesosy. Nisy mpianatse 500 nahita aze ndraike andro. Laha fa niseho tamin-droze Jesosy, hainao va ty raha novolànine tamy mpianatsine reo? Ty fanjakà-Ndranahare. Nandefa an’​i Jesosy ho an-tany etoy Jehovah mba hampianatse ty olo mikasike Fanjakà io. Ka le mbo nanohy nanao raha zay avao Jesosy ndre fa natsanga amy maty aza.

Jesosy mimpoly an-danitse ane

Tiaronao va hoe ino fanjakà-Ndranahare iny? Eka, fitondrà-Ndranahare an-danitse ane raha io. Jesosy ro nofilì-Ndranahare ho mpanjaka ao. Fa nianarantsika taloha fa nanome hany ty olo mosaré Jesosy, nahajanga aretin’​olo maro, sady namelo ndraike ty olo maty mihitsy aza. Hita tamy raha reo, fa ho mpanjaka soa Jesosy amy hoavy!

Ka laha fa ho mpanjaka an-danitse ane anaty ty arivo tao Jesosy, mety hanao akore lahy ty tany? Hanjary paradisa soasoa ty tany manontolo. Tsy hisy sasy ty aly, hasatà raty, arete, noho ty fahafatesa mihitsy aza. Haintsika fa marina raha zay, satria noforòni-Ndranahare mba ho paradisa soasoa hifalian’​olo ty tany. Zay ty antone nanamboarane zariday Edena taloha tany iny. Hovàn’​i Jesosy tany toy, laha fa afarafara ao, ka hataone manahake nitiava-Ndranahare hanaòva aze taloha tany iny.

Avy henany zao ty fotoa himpolìan’​i Jesosy an-danitse ane ndraike. Fa 40 andro ty nisehoane tamy mpianatsine reny. Mino soa roze henany zao fa velo ndraike Jesosy. Fe hoy ty asan’​i Jesosy, taloha’​ty nialàne tamy mpianatsine reny teo hoe: ‘Mijanòna a-Jerosalema eto nareo zisiky hahazoanareo ty fanahy masy.’ Hery ampiasà-Ndranahare fanahy masy zao. Manahake tsioke io raha io, ka hanampy ty mpianatsin’​i Jesosy mba hanao ty sitrapò-Ndranahare. Hoy ty asan’​i Jesosy tamy farane hoe: ‘Tokone hitory ty raha mikasike ahy amy firenena maro an-tany etoy nareo.’

Laha fa baka nivòla raha rezay Jesosy, le nisy raha hafahafa niseho. Nanomboke niakatse nanan-danitse ane ie, arake ty hitanao amy sary io eo. Nisy raho matevy ami’​zay nanàko aze, ka tsy nahita an’​i Jesosy sasy ty mpianatsine. Nimpòly an-danitse ane ndraike Jesosy, ka nanomboke nanjaka amy mpanara-dia aze an-tany etoy reny.

Mpianatse manenty lanitse

1 Korintianina 15:​3-8; Apokalypsy 21:​3, 4; Asan’​ny Apostoly 1:​1-11.



Fanontanea

  • Firy ty mpianatse nahita an’​i Jesosy ndraike andro? Ino ty raha noresahine tamin-droze?
  • Ino moa ty Fanjakà-Ndranahare? Hanao akore ty fiaìna an-tany etoy, laha fa hanjaka anaty arivo tao Jesosy?
  • Tanaty firy andro Jesosy ro niseho tamy mpianatsine reny? Fe fotoa tokony hanaovane ino henany zao?
  • Nodidin’​i Jesosy mba hanao ino mpianatsine reo, taloha’​ty nialàne tamin-droze teo?
  • Ino ty raha hita amy sary io? Ino koa ty raha nanàko an’​i Jesosy?

Fanontanea Fanampine

  • Vakio 1 Korintianina 15:​3-8.

    Nivòla ty apostoly Paoly, fa natsanga tamy maty vatane Jesosy. Nanino ie ro natoky soa safà nataone io? Ino iaby ty raha atokìsa’​ty Kristiana, ka resahine amin’​olo henany zao? (1 Kor. 15:​4, 7, 8; Isaia 2:​2, 3; Matio 24:14; 2 Tim. 3:​1-5)

  • Vakio Asan’​ny Apostoly 1:​1-11.

    Zisiky aìa ro hanaòva ty asa fitoria, arake ty hita amy Asan’​ny Apostoly 1:​8 ao? (Asa. 6:​7; 9:31; 11:​19-21; Kol. 1:​23)