Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 90: Jesosy Noho Ampela Samaritana Iny

Tantara 90: Jesosy Noho Ampela Samaritana Iny

VOZAKE Jesosy, ka nipetrapetrake tanila vovo raike ta-Samaria tao zay. Nandeha nivìly hany an-tanà ane mpianatsine reny. Hangalake rano ampela miresake amin’i Jesosy eo io. Hoy ty asan’i Jesosy tamin’ampela io: ‘Mba ameo rano aho.’

Jesosy niresake tamin’ny ampela samaritana

Nitserike biby ampela iny. Hainao va hoe ino ty antone? Satria Jiosy Jesosy, voho Samaritana ampela io. Maro ty Jiosy tsy tea Samaritana. Azo antoke fa tsy hiresake amy Samaritana mihitsy roze! Fe tea ty karazan’olo iaby Jesosy. Ka hoy ty asane: ‘Laha hainao olo mangatake rano aminao henany toy, le iha ro ho nangatake rano tamine, ka hameane anao ty rano manome fiaìna.’

Hoy ty asan’ampela iny hoe: ‘Lalike biby lahy vovo toy, sady iha aza tsy mana sihô iaby. Baka aìa ro hahazòanao rano manome fiaìna zao?’

Namaly aze Jesosy hoe: ‘Mbo ho maran-drano avao iha laha minon-drano baka amy vovo toy. Fa rano baka amiko zay le ahazòa fiaìna mandrakizay.’

Hoy ty asan’ampela iny hoe: ‘Mba ameo amy rano volàninao zao lahy zaho, soa tsy haran-drano sasy! Sady ami’zay kea zaho tsy mila mantsàka rano amy vovo toy eto sasy.’

Nieritseritse ampela io fa, rano finòmy vatane rano noresahin’i Jesosy tamine io. Fe fahamarìna mikasike an’Andranahare noho ty Fanjakàne ro noresahin’i Jesosy. Mitovy amy rano manome fiaìna, fahamarìna io. Afake manome fiaìna mandrakizay ho ahi’ty olo raha zay.

Nivòla tamin’ampela io Jesosy hoe: ‘Ndahàna kaìho ane ty valinao, ka mimpolìa bakao nareo laha fa bakeo.’

‘Tsy manambaly aho’, hoy ty asan’ampela iny.

‘Marina safànao zay’, hoy Jesosy. ‘Fa nanambaly in-dimy iha, sady tsy valinao aze mipetrake miarake aminao ao henany zao io.’

Tserike biby ampela iny, satria marina iaby ty raha novolànin’i Jesosy tamine. Fomba manao akore ro nahaìzan’i Jesosy raha iaby rezay? Hain’i Jesosy iaby raha rezao, satria Irake nirahi-Ndranahare ho an-​tany etoy ie. Andranahare ro nanambara tamine raha iaby reo. Niavy mpianatsin’i Jesosy reny tamy fotoa io, ka nitserike roze nanenty an’i Jesosy niresake tamin’ampela samaritana io.

Ino ty ianarantsika baka amy tantara io? Hitantsika teo fa, soa fanahy tamin’olo baka amy foko sankarazane Jesosy, ka tokone hanahake aze kea tsika. Tsy tokone hieritseritse tsika hoe, raty ty karazan’olo sasane. Tean’i Jesosy hahay mikasike ty fahamarìna mitarike ho amy fiaìna mandrakizay io ty olo iabiaby. Tokone haniry hanampy ty olo hianatse fahamarìna kea tsika.

Jaona 4:5-43; 17:3.



Fanontanea

  • Ino va ty antone nipetrapetrahan’​i Jesosy tanila vovo raike ta-Samaria tao iny? Ino ty raha novolànine tamin’​ampela raike niavy teo?
  • Nitserike ampela io, fa nanino? Ino ty raha noresahin’​i Jesosy tamine?
  • Rano manao akore ro noeritseretin’​ampela io fa noresahin’​i Jesosy? Fe ino rano tean’​i Jesosy hovolàny io?
  • Nanino ampela iny ro nitserike laha fa nanambara tamine ty raha mikasike aze Jesosy? Baka amin’​ia ty nahaìzan’​i Jesosy raha zay?
  • Ino ty fianara azontsika baka amy tantaran’​ampela nantsàka rano io?

Fanontanea Fanampine

  • Vakio Jaona 4:​5-43.

    Laha ty ohatse nengàn’​i Jesosy ro hentea; manao akore ty tokone hiheverantsika olo tsy mitovy loko na tsy karàza raike amintsika reny? (Jaona 4:​9; 1 Kor. 9:22; 1 Tim. 2:​3, 4; Tit. 2:​11)

    Ino ty fitahia ara-panahy azo’​ty olo raike, laha fa manjary mpianatsin’​i Jesosy ie? (Jaona 4:14; Isaia 58:11; 2 Kor. 4:​16)

    Afake manahake ampela samaritana iny tsika ka tsy hitanjake ty raha rentsika, fa hanambara malaky raha io amin’​olo hafa. Amy fomba manao akore ro ampisehoantsika fa teantsika ty manao raha zay? (Jaona 4:​7, 28; Matio 6:33; Lioka 10:​40-42)