LAHA fa niala tamy trano anabo tao Jesosy noho apostoline reny, le nandeha tamy zaridain’​i Getsemane tao. Fa mpandeha matetike ao avao roze taloha. Nivòla tamy apostoline reo Jesosy mba hiamby soa fa tsy hiroro, noho hazoto hivavake. Nandeha nihatake kelikele mpianatsine reo Jesosy ka nandohalike tamy tany mba hivavake.

Nimpòly tamy apostoline reo teo ndraike ie, laha fa bakeo. Ino laha hainao ty raha natao mpianatse reo? Niroro roze! Fa intelo ty nivolànan’​i Jesosy apostoline reo hoe tsy tokone hiroro, fe saky mimpòly amin-droze eo Jesosy, le hitane niroro avao roze. Ka hoy ty asan’​i Jesosy tamy farane hoe: ‘Le mbo mahasaky miroro avao va nareo? Tsy hainareo va fa avy ty fotoa hanomeza ahy ho an-tana’​ty fahavaloko?’

Laha fa tampitse ty resake nataon’​i Jesosy, le nisy olo maro biby nitabataba. Mba henteo soa moa mesobe noho kobay bevata andesin’​olo reo io! Nanday jiro kea roze soa hazava. Laha fa nihanarinike olo reo, le nisy olo raike zay namonjy an’​i Jesosy. Nanoroke an’​i Jesosy olo io, arake ty hitantsika amy sary etoa. Jodasy Iskariota lahilahy io! Ino ty antone nanoròfane an’​i Jesosy?

Jodasy mivalike amy Jesosy

Nanontany aze Jesosy hoe: ‘Nao Jodasy, orokinao toy va ty anondroanao ahy?’ Eka, satria famantàra oroke nataon’​i Jodasy io. Avy le nihay lahilahy niarake tamin’​i Jodasy reny fa io Jesosy zao. Nosambory fahavalone reo Jesosy, laha fa bakeo. Fe tsy nengàn’​i Petera halàn’​olo reo moramora avao Jesosy. Naboane ty mesobe tamine tany, ka nasiane aze lahilahy tanilane teo zay. Tsy nahavoa ty loha lahilahy io mesobe iny, fa ty sofine ankavàna avao ro nitampake. Fe notsapàn’​i Jesosy avao ty sofy lahilahy tampake iny, ka le nipitike ndraike.

Nivòla tamin’​i Petera Jesosy hoe: ‘Ampolìo ami’​ty pilasine mesobenao tiky! Tsy hainao va fa afake mangatake anjele arivo mahery amy Babako aho mba hanavotse ahy?’ Eka, afake nanao raha zay ie! Fe tsy nangatake anjele tami-Ndranahare mba hanavotse aze Jesosy, satria hainy fa avy ty fotoa hisambora’​ty fahavalone aze, henany zao. Ka, nengàne handay aze olo reo. Ndao ho henteantsika hoe ino ty raha hahazo an’​i Jesosy.

Matio 26:​36-56; Lioka 22:​39-53; Jaona 18:​1-12.



Fanontanea

  • Nandeha aìa Jesosy noho apostoline reny, laha fa niala tamy trano anabo tao? Ino ty raha novolànin’​i Jesosy mba hataon-droze?
  • Ino ty raha hitan’​i Jesosy, laha fa nimpòly tamy toera nisy apostoly reny teo ie? Impiry raha zay ro niseho?
  • Ia ty niavy tamy zariday tao? Ino ty raha nataon’​i Jodasy Iskariota, arake ty hita amy sary io?
  • Nanino Jodasy ro nanoroke an’​i Jesosy? Ino ty raha nataon’​i Petera?
  • Ino ty raha novolànin’​i Jesosy tamin’​i Petera? Fe nanino Jesosy ro tsy nangatake tami-Ndranahare mba handefa anjele?

Fanontanea Fanampine

  • Vakio Matio 26:​36-56.

    Ohatse soa ho ahi’​ty anti-panahy ty fomba nanomezan’​i Jesosy torohevitse ty mpianane. Hazavao. (Matio 20:​25-28; 26:​40, 41; Gal. 5:17; Efes. 4:​29, 31, 32)

    Manao akore ty fiheveran’​i Jesosy ty fampiasà basy na sabatsy na raha hafa manahake reo mba hamonoa olo hafa? (Matio 26:52; Lioka 6:​27, 28; Jaona 18:​36)

  • Vakio Lioka 22:​39-53.

    Nanjary nalemy va ty finoan’​i Jesosy, kanao nisy anjele niavy tamy zariday Getsemane tao, mba hampahery aze? Hazavao. (Lioka 22:​41-43; Isaia 49:​8; Matio 4:​10, 11; Heb. 5:​7)

  • Vakio Jaona 18:​1-12.

    Nanao akore ty fomba niarovan’​i Jesosy ty mpianatsine tamy mpanohitse? Ino koa ty fianara azontsika baka amy raha zay? (Jaona 10:​11, 12; 18:​1, 6-9; Heb. 13:​6; Jak. 2:​25)