Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 99: Tamy Efitse Tanabo Tao

Tantara 99: Tamy Efitse Tanabo Tao

LAKAMISY haly henany zao, roe andro tafara atoy. Niakatse tamy trano malalake anabo zay tao Jesosy noho apostoline 12 reny, mba hihina ty hany natòka ho amy Paska. Jodasy Iskariota ty anara lahilahy miboake iny. Handeha ho amy mpisoro reo ane ie, mba hivòla amin-droze ty fomba hanambora an’​i Jesosy.

Sakafo hariva’ty Tompo

Andro raike talohan’​io, le fa nandeha tamy mpisoro reo tany Jodasy, ka nanontany an-droze hoe: ‘Ino ty hameanareo ahy laha manampy anareo hanambotse an’​i Jesosy aho?’ Namaly roze hoe: ‘Farantsa volafoty 30.’ Naneke Jodasy ka nimpòly tamy mpisoro reny tany ndraike ie henany zao, soa hitarike an-droze ho amin’​i Jesosy ane. Tsy hitanao hoe raty fanahy biby va Jodasy, ka mampangaroharo?

Fa vita ty hany natòka ho amy Paska iny. Fe nanomboke nanòka hany hafa Jesosy henany zao. Nameane mofo zay apostoline reny, ka hoy ty asane: ‘Hano mofo toy, satria manambara ty vatako hamea anareo raha toy.’ Nameane an-droze kea laha fa bakeo kôpy misy divay zay sady hoy ty asane hoe: ‘Inòmo divay toy, satria manambara ty lioko halatsake ho anareo raha toy.’ ‘Sakafo hariva’​ty Tompo’ na ‘fanasà’​ty Tompo’ ro ikaìha’​ty Baiboly raha io.

Nihina ty Paska Israelita reo, mba hahatiarovan-droze ty fotoa nandalòvan’​anjeli-Ndranahare tamy tranon-droze ta-Ejipta ane iny. Namono ty talanolo tan-trano’​ty Ejipsiana iaby anjele io tami’​zay. Fe tean’​i Jesosy hahatiaro aze, mpanara-dia aze reo. Irìn’​i Jesosy kea ty hahaìza mpianatsine reo ty fomba nanomezane ty aine ho an-droze. Ka zay ty antone nivolànane an-droze mba hahatiaro sakafo manòka io isan-tao.

Novolànin’​i Jesosy mba hahery fo noho hana finoa matanjake apostoline reo, laha fa baka nihina Sakafo Hariva’​ty Tompo io roze. Nanao hira fiderà an’​Andranahare roze, tamy farane, ka nandeha. Fa haly maré ty andro henany zao. Mety fa misasakaly iaby aza. Fe ndao ho henteantsika ty tany nandehanan-droze.

Matio 26:​14-30; Lioka 22:​1-39; Jaona toko faha-​13 zisiky amy toko faha-17; 1 Korintianina 11:20.



Fanontanea

  • Arake ty hita amy sary io, manao ino amy trano malalake anabo io ao va Jesosy noho apostoline 12 reo?
  • Ia va lahilahy nandeha niboake iny, ka hanao ino ie?
  • Hany manòka ino ro nataon’​i Jesosy, laha fa vita hany natao ho amy Paska iny?
  • Ino ty raha tiaron’​Israelita reo laha fa amy fotoa Paska io? Ino koa ty raha tiaro mpanara-dia an’​i Jesosy reo amy sakafo manòka io?
  • Ino ty raha novolànin’​i Jesosy tamy mpanara-dia azy reny, tafara Sakafo Hariva’​ty Tompo io? Ino ty raha nataon-droze?

Fanontanea Fanampine

  • Vakio Matio 26:​14-30.

    Hazavao baka amy Matio 26:15 ao, fa asan’​i Jodasy aze ty namalike an’​i Jesosy.

    Ino iaby ty antone roe nahavy an’​i Jesosy handatsake ty lione? (Matio 26:​27, 28; Jer. 31:​31-33; Efes. 1:​7; Heb. 9:​19, 20)

  • Vakio Lioka 22:​1-39.

    Ino ty raha tea’​ty Baiboly hovolàny amy hoe: “Nilitse tamin’​i Jodasy tao Satana”? (Lioka 22:​3; Jaona 13:​2; Asa. 1:​24, 25)

  • Vakio Jaona 13:​1-20.

    Afake tami’​ty raha raty nataone va Jodasy, arake ty Jaona 13:2? Ino ty fianara azo’​ty mpanompo-Ndranahare baka amy raha zay? (Gen. 4:​7; 2 Kor. 2:11; Gal. 6:​1; Jak. 1:​13, 14)

    Ino ty ohatse bevata nengàn’​i Jesosy? (Jaona 13:15; Matio 23:11; 1 Pet. 2:​21)

  • Vakio Jaona 17:​1-26.

    Nivavake Jesosy mba ho “raike” avao mpanara-dia aze reo. Ino ty dika raha zay? (Jaona 17:​11, 21-23; Rom. 13:​8; 14:19; Kol. 3:​14)