Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 89: Nataon’​i Jesosy Malio Tempoly Iny

Tantara 89: Nataon’​i Jesosy Malio Tempoly Iny

TSY hitanao hoe meloke biby va Jesosy amy sary io? Hainao va ty antone mampeloke aze? Meloke Jesosy, satria tea drala maré lahilahy tamy tempoli-Ndranahare ta-Jerosalema tao reo. Nataon-droze ze hahazòa drala be tamin’olo handeha hivavake amy tempoli-Ndranahare ao reny.

Jesosy manonga latabo misy drala

Hitanao va anak’aomby noho aondry miarake amy voromailala reo? Eka. Namarotse biby reo tamy tempoly tao mihitsy lahilahy reo. Hainao va ty antone? Satria tokone handay biby na voromailala ze Israelita ta hanao soro ho an’Andranahare.

Hita tamy lalà-Ndranahare tao, fa laha misy Israelita raike manota, le tokone hanao fanomeza ho an’Andranahare ie. Nila nanao fanomeza ho an’i Jehovah kea Israelita reo, tamy fotoa hafa. Fe aìa ty hahazoan’Israelita biby hafa na voromailala hatao soro ho an’Andranahare?

Nana voromailala na biby hafa ty Israelita sasane. Afake nanao soro raha reo roze. Fe nisy Israelita hafa tsy nana biby noho tsy nana voromailala. Ty hafa kea nipetrake lavitse an’i Jerosalema, ka tsy afake manday ty bibin-droze ho amy tempoly ane. Zay ty antone niavia lahilahy mpamarotse reo amy tempoly ao io. Afake nivìly biby na ze voro nilàn-droze tamy tempoly tao Israelita reo. Fe raty fanahy mpamarotse reo, ka nataon-droze sarotse maré raha navilin-droze reny. Nangalatse tamin’olo reny mihitsy aza roze. Fe tsy azo atao raha iaby rezao, na ty mangalatse, na ty mamarotse amy tempoli-Ndranahare ao.

Ka zay ty antone nampeloke an’i Jesosy maré io. Naòngane iaby latàbo misy drala maro noho drala vy anahy lahilahy mpamarotse reny. Nangalake taly Jesosy laha fa bakeo, ka nataone karavasy. Noroàhine hiala amy tempoly ao iaby biby reny. Novolànine maré lahilahy mpamarotse voromailala reny hoe: ‘Andeso miboake ane iaby raha reto! Tsy azo amaròta sasy ty an-trano Babako ato manomboke androany.’

Maro tamy mpanara-dia an’i Jesosy reny ro niarake tamine tamy tempoly ta-Jerosalema tao. Tserike biby roze nahita raha nataon’i Jesosy io. Tiaron-droze laha fa bakeo safà amy Baiboly ao mikasike Ana-Ndranahare iny hoe: ‘Ty fitiavane ty trano-Ndranahare ro nampirehitse aze manahake afo io.’

Mbo nanao fahagagà maro Jesosy, tanaty fotoa nijanònane ta-Jerosalema tao, tamy fety Paska iny. Niala ta-Jodia tao ie tafara atoy, ka nandeha nimpòly a-Galilia ane. Nandalo ta-Samaria tao ie, taloha’ty niavine ta-Galilia ane. Ndao ho henteantsika ty raha niseho tany.

Jaona 2:13-25; 4:3, 4.



Fanontanea

  • Ino ty antone namaròta biby tamy tempoly tao?
  • Nanino Jesosy ro neloke maré?
  • Ino raha ataon’​i Jesosy amy sary io? Ino ty safà nandidiane lahilahy mpamarotse voromailala reny?
  • Ino ty raha tiaro mpianatsin’​i Jesosy reny, laha fa nahita ty raha nataone roze?
  • Faritsy mbaìa iaby ty nandalòvan’​i Jesosy, laha fa nimpòly a-Galilia ane roze?

Fanontanea Fanampine

  • Vakio Jaona 2:​13-25.

    Neloke biby tamy lahilahy nanakalo drala tamy tempoly tao reny Jesosy. Manao akore kea ty fiheverantsika fanaòva varotse amy Efitrano Fanjakà ane, laha raha zay ro hentea? (Jaona 2:​15, 16; 1 Kor. 10:​24, 31-33)