Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 84: Anjele Raike Nisafo An’​i Maria

Tantara 84: Anjele Raike Nisafo An’​i Maria

MARIA ty anaran’ampela soa amy sary eo io. Israelita, nipetrake ta-​Nazareta tao ie. Hai-Ndranahare fa olo farane ze soa fanahy Maria. Ka zay ty antone naniraha-Ndranahare an’i anjele Gabriela io, hiresake tamine. Hainao va ty raha nambaran’i Gabriela tamin’i Maria? Ndao ho henteantsika.

Niarahaba aze Gabriela hoe: ‘Manao akore lahy iha, ampela nahazo hasoava baka ami-Ndranahare toy. Jehovah ro mitahy anao.’ Olo mbo tsy hain’i Maria mihitsy olo io, ka tserike biby ie. Tsy hitane ty raha hataone, satria tsy haine ty raha tean’olo io hovolàne. Fe nataon’i Gabriela ze tsy hampavàka an’i Maria.

Maria

‘Ka mavàka, iha Maria’, hoy ty asan’i Gabriela. ‘Tean’i Jehovah bibike iha. Ka, hanao fahagagà ho anao ie. Tsy ho ela iha, le hanan’anake. Hataonao hoe Jesosy ty anarane.’

Mbo nanazava avao Gabriela hoe: ‘Hana voninahitse ajà io, ka hatao hoe Ana-Ndranahare Farane Anabo iny. Hataon’i Jehovah mpanjaka manahake an’i Davida ie. Fe, ho mpanjaka mandrakizay Jesosy, sady tsy hisy fiafaràne ty fanjakàne!’

‘Fomba manao akore ro hahatanterake raha rezao?’, hoy ty asan’i Maria. ‘Tsy manambaly aho, ka fomba manao akore ro hahabevoka ahy?’

‘Ho avy aminao ty heri-Ndranahare’, hoy ty asan’i Gabriela. ‘Ka hatao hoe Ana-Ndranahare ajà io.’ Nivòla tamin’i Maria ndraike ie laha fa bakeo hoe: ‘Tiaròvo Elizabeta longonao iny. Nivòla ty olo fa antitse maré ie, ka tsy ho afake hiterake sasy. Fe tsy ho ela kea ie le hanan’anake lahy. Hitanao amy raha zay, fa tsy misy raha tsy hai-Ndranahare.’

Avy le nivòla Maria hoe: ‘Mpanompovavin’i Jehovah lahy aho! Ka irìko laha mba tanterake amiko arake ty nivolànanao aze, raha iaby rezao.’ Niala tamine teo anjele iny laha fa bakeo.

Nandeha tamin’i Elizabeta ane malaky Maria mba hisafo aze. Laha fa nirén’i Elizabeta ty feon’i Maria, le nifalifale biby ajà tan-tròkin’i Elizabeta tao iny, ka nihetsike. Nifeno fanahy masi-Ndranahare Elizabeta ka nivòla tamin’i Maria hoe: ‘Notahìn’i Jehovah mihoatse ty ampela iaby an-tany etoy lahy iha.’ Niarake tamin’i Elizabeta, tanaty telo vola Maria. Nimpòly ta-Nazareta tany ie laha fa tafara atoy.

Fa marìny ty fotoa hanambalia, lahilahy raike atao hoe Josefa zay an’i Maria. Fe, laha fa nihain’i Josefa hoe bevoka Maria, le nanapa-kevitse tsy hanambaly aze Josefa. Nivòla tamin’i Josefa anjele-Ndranahare iny hoe: ‘Ka misalasala hangalake an’i Maria ho valinao iha, fa Andranahare ro nanome aze anake lahy io.’ Nifanambaly avao Josefa noho Maria tamy farane, ka nandìny ty fotoa hahaterahan’i Jesosy roze.

Lioka 1:26-56; Matio 1:18-25.



Fanontanea

  • Ia va ampela amy sary eo io?
  • Ino ty raha nambaran’​i Gabriela tamin’​i Maria?
  • Tamy fomba manao akore ro nanazavan’​i Gabriela tamin’​i Maria fa hanan’​anake ie, ndre mbo tsy manambaly aza?
  • Ino ty raha niseho laha fa nandeha nisafo an’​i Elizabeta longone, Maria?
  • Ino ty raha noeritseretin’​i Josefa hatao laha fa nihaine hoe bevòka Maria? Fe ino ty antone nampiova hevitse aze?

Fanontanea Fanampine

  • Vakio Lioka 1:​26-56.

    Laha fa nafindra baka an-danitse ane ty ain’​Ana-Ndranahare iny, le nanjary nandova tsy fahalavoraria baka amy tsirivavy tan-troky Maria tao kea va ie, laha Lioka 1:35 io ro hentea? (Hagay 2:​11-13; Jaona 6:69; Heb. 7:26; 10:​5)

    Ndre mbo tsy naterake aza Jesosy, le fa nahazo voninahitse. Hazavao. (Lioka 1:​41-43)

    Ino ty ohatse soa nengàn’​i Maria ho ahi’​ty Kristiana henany zao, laha fa mahazo fanendrea manòka amy fanompoa an’​i Jehovah roze? (Lioka 1:​38, 46-49; 17:10; Ohab. 11:​2)

  • Vakio Matio 1:​18-25.

    Ndra tsy nokaìhy tamy anara hoe Imanoela aza Jesosy, tamy fomba manao akore ro nanatanterahane ty dika anarane io laha fa nanjary olombelo ie? (Matio 1:​22, 23; Jaona 14:​8-10; Heb. 1:​1-3)