Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 101: Novonòa Jesosy

Tantara 101: Novonòa Jesosy

MBA henteo moa raha mampangorìtsy miseho etoa io! Nofantsìhy Jesosy. Nataon-droze tamy tsato-kazo teo ie. Nasian-droze fantsike be tan-tanane noho tan-tombone teo. Ino ty antone nahasakian’​olo reo ­nanao raha io tamin’​i Jesosy?

Jesosy maty

Satria nisy olo maro tsy tea an’​i Jesosy. Hainao va hoe ia io? Satana Devoly, aze anjele raty fanahy iny ty raike amin-droze. Ie aze navandy tamin’​i Adama noho Eva iny, ka le tsy nanorike ty safà-Ndranahare roze morovale. Mbo Satana avao kea ty nanome hevitse ty fahavalon’​i Jesosy, ka nahavità raha raty reo.

Fa maro biby ty raha raty natao fahavalon’​i Jesosy reo tamine, ndre fa taloha’​ty namantsìhan-droze an’​i Jesosy tamy hazo toy eto aza. Tiaronao va roze niavy tamy zaridain’​i Getsemane tao ka nanday aze iny? Ia fahavalon’​i Jesosy reo io? Mpitarike fivavàha reny io. Ndao ho henteantsika ty raha niseho laha fa bakeo.

Laha fa nalà mpitarike fivavàha reny Jesosy, le nilay aze iaby apostoline reny. Navàka biby roze, ka nengàn-droze raike niarake tamy fahavalone reny teo Jesosy. Fe tsy nandeha lavitse apostoly Petera noho Jaona. Nandehandeha teny avao roze nanara-maso ze raha hiseho amin’​i Jesosy.

Nandesy mpisoro reny ho amy lahilahy antitse mpisoronabe taloha, atao hoe Anasy zay Jesosy. Tsy nijàno ela teo vahoake reny. Nandesin-​droze ho an-tranon’​i Kaiafa, mpisoronabe tamy fotoa io kea Jesosy, laha fa bakeo. Maro ty mpitarike fivavàha jiosy, nivory tamy trano io tao. 

Nisy fitsarà tan-tranon’​i Kaiafa tao. Namoro raha vandy mikasike an’​i Jesosy iaby ty ankamaroan’​olo. Hoy iaby ty asa mpitarike fivavàha reny hoe: ‘Tokone hovonòa Jesosy.’ Nandoràn-droze tamy tarehine teo Jesosy, sady notampifìn-droze kea.

Nijàno tamònto teny avao Petera, tamy raha niseho iaby reo. Fa haly andro iny tami’​zay, ka nanintsy biby. Nandrehitse afo ty olo, ka namìndro. Laha fa notarafy hazavà iny tamy manodidy an-droze teo, le nisy ajà ampela raike zay nahita an’​i Petera ka nivòla hoe: ‘Niarake tamin’​i Jesosy kea lahilahy tia.’

Namaly Petera hoe: ‘Aha, tsy niarake tamine zao aho!’

Intelo ty olo ro nivòla an’​i Petera hoe niarake tamin’​i Jesosy. Fe saky nivòla raha zay olo reny, le nandà avao Petera. Nitolike tamine tany ami’​zay Jesosy, laha fa navandy fanintelone Petera. Nalahelo biby Petera tamy vandy iaby novolànine reo, ka niala teo ie, sady nitàny.

Laha vo niposake ty masoandro, zoma maraindrain’​iny, le nandesy mpisoro reny tamy toera fanaòva fivoriam-be, tan-trano lahilahy amy Fitsarà Anabo Jiosy ane Jesosy. Nanapa-kevitse ze raha hataon-droze amin’​i Jesosy roze tami’​zay. Nandesin-droze tamin’​i Pontio Pilato, mpanday ty vahoake tamy faritse Jodia tao Jesosy, laha fa bakeo.

‘Raty fanahy lahilahy toy’, hoy ty asa mpisoro reny tamin’​i Pilato. ‘Tokone hovonòa ie.’ Laha fa baka nametrake fanontanea maro tamin’​i Jesosy Pilato, le nivòla hoe: ‘Tsy hitako ty raha raty natao lahilahy toy.’ Nalefan’​i Pilato tamin’​i Heroda Antipasy tany Jesosy, laha fa bakeo. Mpitarike amy faritse Galilia ao Heroda io, fe nipetrake ta-Jerosalema tao ie. Tsy hitan’​i Heroda kea ty raha raty nataon’​i Jesosy, ka nampòline tamin’​i Pilato tany ndraike ie.

Tean’​i Pilato havototse Jesosy. Fe tsy naneke fahavalon’​i Jesosy reny, ka nila gadra raike roze mba hafàha ho solon’​i Jesosy. Barabasy ty anara lahilahy io. Naboakin’​i Pilato tamònto teo ami’​zay Jesosy laha fa midỳ ty andro. Hoy ty asan’​i Pilato tamy vahoake maro reny hoe: ‘Io ty Mpanjakanareo!’ Fe namaly sefo’​ty mpisoro reny hoe: ‘Andeso ane ie, ka vonò! Vonò ie!’ Nafàhan’​i Pilato Barabasy laha fa bakeo, fa Jesosy, nalefane hovonòa.

Laha fa zoma harivariva iny ami’​zay, le nofantsìhy tamy tsato-kazo zay Jesosy. Misy lahilahy raty fanahy roe niarake novonòa amin’​i Jesosy, fe tsy hitanao amy sary io eo. Tanivon-droze roe lahy teo ro nasia an’​i Jesosy. Ka taloha’​ty nahafatesan’​i Jesosy, le nivòla tamine ty raike tamy lahilahy reo hoe: ‘Tiaròvo aho laha fa amy fanjakànao ane iha.’ Namaly aze Jesosy hoe: ‘Mampitamà anao aho, fa hiarake amiko amy Paradisa ane iha.’

Tsy hitanao hoe soa va safà nampitamànin’​i Jesosy io? Hainao va hoe ino paradisa novolànin’​i Jesosy io? Taìa moa ro nasian’​i Jehovah paradisa tamy voalohane iny? Eka, tan-tany etoy. Ka laha fa ho mpanjaka an-​danitse ane Jesosy, le hovelomine ndraike lahilahy io, ka hameane Paradisa vaovao an-tany etoy. Tsy mahafaly antsika va raha zay?

Matio 26:​57-75; 27:​1-50; Lioka 22:​54-71; 23:​1-49; Jaona 18:​12-40; 19:​1-30.



Fanontanea

  • Ia ty tsy tea an’​i Jesosy ka namono aze?
  • Ino ty raha natao’​ty apostoly laha fa nosambory mpitarike fivavàha Jiosy reny Jesosy?
  • Ino ty raha niseho tan-tranon’​i Kaiafa, mpisoronabe tao?
  • Nanino Petera ro nilay sady nitàny?
  • Laha fa nandesy nimpòly tamin’​i Pilato tao Jesosy, ino ty kiakiake natao sefo’​ty mpisoro reo?
  • Natao akore Jesosy laha fa nanomboke ty zoma hariva? Ino ty safà nampitamànine jiolahy nofantsìhy tanilane teo iny?
  • Aìa va ro hisy Paradisa noresahin’​i Jesosy iny?

Fanontanea Fanampine

  • Vakio Matio 26:​57-75.

    Tamy fomba manao akore ro nampisehoa lahilahy sasane tamy fitsarà anabo jiosy tao ty maha raty ty fon-droze? (Matio 26:​59, 67, 68)

  • Vakio Matio 27:​1-50.

    Manino tsika ro afake mivòla fa tsy nanenenan’​i Jodasy ty raha raty nataone? (Matio 27:​3, 4; Marka 3:29; 14:21; 2 Kor. 7:​10, 11)

  • Vakio Lioka 22:​54-71.

    Nandà an’​i Jesosy Petera tamy andro haly nivalìhan’​i Jodasy tamine noho nanambòra aze iny. Ino ty fianara azontsika amy raha zay? (Lioka 22:​60-62; Matio 26:​31-35; 1 Kor. 10:​12)

  • Vakio Lioka 23:​1-49.

    Nanao akore ty fihetsikin’​i Jesosy laha fa nahazo aze ty tsy rariny? Fianara ino ro azontsika amy zay? (Lioka 23:​33, 34; Rom. 12:​17-19; 1 Pet. 2:​23)

  • Vakio Jaona 18:​12-40.

    Ndre nisy aza ty fotoa navakàn’​i Petera olo, le nanjary apostoly niavake avao ie. Ino ty ambara raha zay amintsika? (Jaona 18:​25-27; 1 Kor. 4:​2; 1 Pet. 3:​14, 15; 5:​8, 9)

  • Vakio Jaona 19:​1-30.

    Ino ty mampiseho fa nahay nandanjalanja ze raha nilàne isan’​andro Jesosy? (Jaona 2:​1, 2, 9, 10; 19:​23, 24; Matio 6:​31, 32; 8:​20)

    Manino safàn’​i Jesosy tam-pialà ay teo iny ro mampiseho fa naharesy ie, satria naneky ty fahefàn’​i Jehovah handay? (Jaona 16:33; 19:30; 2 Pet. 3:14; 1 Jaona 5:​4)