Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 81: Matoky ty Fanampia-Ndranahare

Tantara 81: Matoky ty Fanampia-Ndranahare

OLO 50 000 mahery teo ro nanao lia lavitse baka a-Babylona ho a-Jerosalema ane. Fe laha fa niavy tao roze, le nahita fa simba noho potike tanterake tanà iny. Tsy nisy olo nipetrake tao. Mila manamboatse ty raha iaby ndraike ty Israelita ndra tean-droze ndra tsy tean-droze.

Alitara ro namboarin-droze voalohane. Toera fanaòva soro na fanomeza ho an’​i Jehovah alitara io. Nanomboke nanamboatse tempoly Israelita reo, laha fa afake vola vitsivitsy tafara atoy. Fe ty fahavalo nipetrake manodidy an-droze teny, le tsy tea ty hanamboaran’​Israelita reo tempoly io. Nanandra nampitahotse an-droze fahavalo reo, soa hijàno asa io. Tamy farane le natao fahavalo reo ze hamoaha’​ty mpanjakan’​i Persia lalàna, hampijanòna ty asa nataon’​Israelita reo.

Nandeha ty tao. Fa 17 tao henany zao ty nialàn’​Israelita reo ta-Babylona tao. Nanirake an’​i Zakaria noho Hagay mpaminanine Jehovah mba hivòla tamin’​Israelita reo, fa tokone hamboary ndraike tempoly io. Nanorike soa ty safà mpaminany reo ty olo, satria natoky roze fa hanampy Andranahare. Nanomboke nanao trano iny ndraike roze ndra fa norarà’​ty lalàna aza hoe tsy azon-droze atao raha io.

Nisy mpiasa-mpanjakà atao hoe Tatenay zay, namonjy Israelita reo mba hanontany hoe ia ty olo nanome alàla an-droze hanamboatse tempoly io. Namaly aze Israelita reo fa tamin-droze mbo ta-Babylona tany, le nivòla Kyrosy Mpanjaka hoe: ‘Ndahàna a-Jerosalema ane nareo henany zao, ka amboaro tempolin’​i Jehovah, Andranaharenareo iny.’

Fa maty Kyrosy henany zao, ka nandefa taratasy ta-Babylona tany Tatenay mba hanontany laha nanome alàla ty Israelita hanamboatse tempoly io vatane Kyrosy. Tsy ela le niavy ty valy taratasy iny, ka ty mpanjakan’​i Persia ro namaly aze. Hita tamy taratasy io tao fa nivòla raha zay vatane Kyrosy. Ka nanoratse ho’​zao mpanjaka io hoe: ‘Engào hanamboatse tempoly ho ahi’​ty Andranaharen-droze Israelita reo, ka ampionareo roze mba hahavita asa io.’ Vita tempoly iny, laha fa afake efatse tao tafara atoy. Faly bibike Israelita reo.

Nandeha ty tao maromaro. Fa 48 tao henany zao ty nahavita tempoly iny. Nahantra iaby ty olo nipetrake ta-Jerosalema tao, sady niharaty iaby tanà iny noho tempoli-Ndranahare iny. Nihain’​i Ezra fa mila amboary tempoly io. Israelita nipetrake ta-Babylona tany Ezra. Ka hainao va ty raha nataone?

Namonjy an’​i Artaksersesy, mpanjakan’​i Persia Ezra. Nanome an’​i Ezra fanomeza maro handesy a-Jerosalema ane mpanjaka soa fanahy io. Nivòla Israelita nipetrake ta-Babylona tao reny Ezra, mba hanampy aze handay fanomeza reo ho a-Jerosalema ane. Ka olo 6 000 teo ho eo ro naneky hiarake amine. Nana volafoty noho volamena maro voho raha soasoa maro handesy miarake amine olo iaby reo.

Fe niasa say Ezra, satria misy olo raty amy lala handehanan-droze io eny. Mety hangalake ty volafoty noho ty volamenan-droze olo reo, ka hamono an-droze. Ka navòrin’​i Ezra iaby ty olo, arake ty hitanao amy sary io eo. Nivavake tamin’​i Jehovah roze mba hiaro noho hanampy an-droze amy lia lavitse hataon-droze ho a-Jerosalema ane io.

Ezra noho olo mivavake

Niaro an-droze vatane Jehovah. Niavy soa ta-Jerosalema tany roze, laha fa nandeha an-tomboke efa-bola. Tsy hitantsika amy tantara io va, fa afake miaro ze olo matoky aze noho mila ty fanampiane Jehovah?

Ezra toko faha-2 zisiky amy toko faha-8.



Fanontanea

  • Firy ty isan’​olo niala ta-Babylona tao, ka nandeha a-Jerosalema ane? Fe ino ty raha hitan-droze laha fa niavy tao roze?
  • Nanomboke nanamboatse ino Israelita reo tafara’​ty niavian-droze? Fe ino ty raha natao’​ty fahavalon-droze?
  • Ia va Hagay noho Zakaria zao? Ino ty raha novolànin-droze tamy vahoake?
  • Ino ty antone nandefasan’​i Tatenay taratasy ta-Babylona tany, voho ino ty valin-teny azone?
  • Ino ty raha nataon’​i Ezra laha fa nihainy fa mila amboary ndraike tempoli-Ndranahare io?
  • Ino ty raha nangatahin’​i Ezra tamy vavake, hita amy sary io, voho ino ty valim-bavake niazone? Ino koa ty fianara azontsika baka amy raha zay?

Fanontanea Fanampine

  • Vakio Ezra 3:​1-13

    Ino avao ty raha tokone hataontsika mpanompo-Ndranahare ndra mipetrake amy toera tsy misy fiangona ane aza tsika? (Ezra 3:​3, 6; Asa 17:​16, 17; Heb. 13:​15)

  • Vakio Ezra 4:​1-7.

    Ino ty ohatse namean’​i Zerobabela ho ahi’​ty vahoakin’​i Jehovah mikasike ty firaìsam-pinoa? (Eks. 34:12; 1 Kor. 15:33; 2 Kor. 6:​14-17)

  • Vakio Ezra 5:​1-5, 17 noho 6:​1-22.

    Nanino mpanohitse reo ro tsy afake nampijàno fanamboara tempoly io? (Ezra 5:​5; Isaia 54:​17)

    Mamporisike ty anti-panahy kristiana mba hila ty fitarihan’​i Jehovah laha fa misy raha manahìra mahazo an-droze, ty raha natao anti-panahy jiosy taloha reny. Hazavao. (Ezra 6:14; Sal. 32:​8; Rom. 8:31; Jak. 1:​5)

  • Vakio Ezra 8:​21-23, 28-36.

    Ino ty tokone hataontsika aloha’​ty hanaovantsika raha, laha ta hanahake ohatsin’​i Ezra io tsika? (Ezra 8:23; Sal. 127:​1; Ohab. 10:22; Jak. 4:​13-15)