Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 80: Miala A-Babylona ao ty Vahoaki-Ndranahare

Tantara 80: Miala A-Babylona ao ty Vahoaki-Ndranahare

FA HO roe tao henany zao ro nahazoan’​i Mediana noho Persiana an’​i Babylona. Mba henteo moa ty raha miseho amy sary io! Miala a-Babylona ao ty Israelita. Fomba manao akore ro naha-afake an-droze bakao? Ia ty nandefa an-droze?

Kyrosy, mpanjakan’​i Persia, ro nandefa an-droze. Fa ela biby taloha’​ty nahaterahan’​i Kyrosy, le fa nampanoratse an’​i Isaia mpaminanine mikasike an’​i Kyrosy, Jehovah hoe: ‘Hataonao iaby ze raha teako. Hengà hivòha ho anao avao vavahady reo, mba hahazoanao tanà io.’ Ka, Kyrosy ro nitarike ty fandravà an’​i Babylona. Nilitse tan-tanà tao ty Mediana noho ty Persiana tamy andro haly iny, satria fa nisokatse varavara reny.

Fe nambaran’​i Isaia mpaminany kea, fa hampiboake didy Kyrosy, ka hamboary ndraike Jerosalema noho ty tempoline. Naboakin’​i Kyrosy avao va didy io? Eka. Hoy ty asan’​i Kyrosy tamin’​Israelita reo: ‘Mandehàna nareo ho a-Jerosalema ane ka, amboaro ndraike ty tempolin’​i Jehovah Andranaharenareo.’ Ka le nanao raha zay vatane ty Israelita.

Israelita miala a-babylona

Fe tsy afake hanao lia lavitse himpòly a-Jerosalema ane io, ty Israelita iaby. Lavitse biby ty lala handehanan-droze, tokotokone ho 800 kilometatse. Maro ty fa antitse maré noho marare maré, ka tsy nahavita handeha lavitse sasy. Nisy antone hafa kea, tsy nahafàha’​ty olo hafa nandeha. Fe, hoy ty asan’​i Kyrosy tamy aze tsy nandeha reny hoe: ‘Ameonareo volafoty, noho volamena voho fanomeza hafa ze olo handeha himpòly, soa hanamboara tanà io noho ty tempoline.’

Ka, namea fanomeza maro biby ty Israelita himpòly a-Jerosalema ane. Namean’​i Kyrosy an-droze kea ty enta noho kôpy nalàn’​i Nebokadnezara tamy tempolin’​i Jehovah ta-Jerosalema tany iny. Nana raha maro handesy ty olo tamy fotoa io.

Laha fa afake efa-bola ty nandehàna’​ty Israelita tan-dala teny, le niavy soa ta-Jerosalema tao roze. Fa 70 tao vatane henany zao ty nandravà tanà io, sady tsy nisy olo mihitsy tamy tany io teo. Fe, ndra fa tafimpòly tamy tanin-droze tao aza Israelita reo, le hahita fahasahiràna hafa ndraike. Hianarantsika ty mikasike raha zay.

Isaia 44:28; 45:​1-4; Ezra 1:​1-11.



Fanontanea

  • Ino ty raha ataon’​Israelita reo amy sary eo io?
  • Tamy fomba manao akore ro nanatanterahan’​i Kyrosy ty faminania-Ndranahare nampanoratine an’​i Isaia?
  • Ino ty raha novolànin’​i Kyrosy tamin’​Israelita tsy afake nimpòly ta-Jerosalema ane reny?
  • Namean’​i Kyrosy ino vahoake himpòly a-Jerosalema ane reny?
  • Afake firy vola Israelita reo vo niavy ta-Jerosalema tao?
  • Tsy nisy olo tanaty firy tao tanà io?

Fanontanea Fanampine

  • Vakio Isaia 44:28 noho 45:​1-4.

    Tamy fomba manao akore ro nampisehoan’​i Jehovah fa ho tanterake vatane faminania mikasike an’​i Kyrosy iny? (Isaia 55:​10, 11; Rom. 4:​17)

    Hita amy faminanian’​I Isaia mikasike an’​i Kyrosy iny, fa hain’​i Jehovah soa ty manambara mialoha ty raha mbo hoavy. Hazavao. (Isaia 42:​9; 45:21; 46:​10, 11; 2 Pet. 1:​20)

  • Vakio Ezra 1:​1-11.

    Mba hanahàfantsika ty ohatse soa namean’​Israelita tsy afake nimpòly ta-Jerosalema tany reny, le tokone ‘hohatanjahintsika koa ze tanan’​olo’ afake manompo manontolo andro. Manao akore ty fomba azontsika anaòva raha zay? (Ezra 1:​4, 6; Rom. 12:13; Kol. 4:​12)