Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 58: Davida Noho Goliata

Tantara 58: Davida Noho Goliata

NIMPÒLY hialy tamin’​Israely ndraike ty Filistina. Miarake amy tafikin’​i Saoly ane ty zokin’​i Davida telo lahy. Ka nivòla tamin’​i Davida, Jese ndraike andro hoe: ‘Mangalà vary noho mofo iha, ka andeso amy rahalahinao reo ane. Mba henteo ane vasa manao akore roze rezay.’

Goliata

Laha fa niavy tamy toera nisy tafike reo tao Davida, le nilay tamy miaramila reo teny ie, soa hahita rahalahine reny. Niavy bakany Filistina bevata bibike atao hoe Goliata zay, mba hikizake Israelita reo. Nanao raha zay marain-tsihariva, tanaty 40 andro ie. Nikorakorake ie hoe: ‘Mifiliàna olo raike nareo hialy amiko. Laha maharesy ahy noho mahafaty ahy ie, le ho andevonareo zahay. Fe, laha resiko ie, le ho andevonay nareo. Andefàso olo raike aho hialy amiko.’

Nanontany sasane tamy miaramila reo Davida hoe: ‘Hahazo ino ze lahilahy mahafaty Filistina io, ka tsy hahafa-baràka ty Israely?’

Hoy ty asa miaramila reny hoe: ‘Hamean’​i Saoly hanàna maro bibike sady ho vali’​ty anak’​ampelane ze maharesy Filistina io.’

Fe navàka an’​i Goliata iaby ty Israelita, satria bevata maré ie. Mihoatse ty telo metatse ty halavane, sady nana miaramila raike nanday ty apingane ie (apinga zao, le vy boribory fisake, manahake sahafa vy reny, natao hiaròva ty vata miaramila).

Nisy miaramila sasane nivòla tamin’​i Saoly fa ta-hialy amin’​i Goliata, Davida. Fe nivòla tamin’​i Davida Saoly hoe: ‘Tsy haharesy Filistina io iha. Fa ela biby ty naha-mpialy aze. Iha mbo anak’​ajà maré.’ Namaly Davida hoe: ‘Fa namono orsa raike noho liona raike nanafike ty aondry babako reo aho. Ka hovonòko manahake rezay kea Filistina io. Jehovah ro hanampy ahy.’ Ka hoy ty asan’​i Saoly hoe: ‘Ndahàna moa, irìko hiaro anao Jehovah.’

Nandeha tamy rano zay teo Davida, nangalake vato malisoliso limy ie, ka nataone tanaty kitapony tao. Nalàne ty pilatse, ka niboake ie hialy amin’​olo bevata bibike iny. Nitaitse biby Goliata laha fa nahita an’​i Davida. Nieritseritse ie fa ho mora amine ty hamono an’​i Davida.

Davida mipilatse

Hoy Goliata: ‘Mamonjea ahy bakao iha, ami’​zay hameako ho hani’​ty voro noho ty biby ty fatinao.’ Fe hoy ty asan’​i Davida: ‘Mamonjy ahy amy sabatsy noho ty lefo voho ty mesobe iha, fa zaho mamonjy anao amy anaran’​i Jehovah. Androany ty hanomezan’​i Jehovah anao an-tanako eto, ka ho vonòko iha.’

Nilay hamonjy an’​i Goliata Davida. Ka nangalake vato baka anaty kitapone tao ie, napetrane tamy pilatse iny teo, bakeo natorane maré biby. Nilentike tan-dohan’​i Goliata tao vato iny, niràvoke tamy tany teo ie, bakeo maty! Laha fa nihita Filistina reny fa maty mahery fon-droze iny, le nilay iaby roze. Nanìa an-droze Israelita reo, ka naharesy.

1 Samoela 17:​1-54.



Fanontanea

  • Nikizake miaramilan’​Israelita reo mba hanao ino Goliata?
  • Nanao akore ty habevatan’​i Goliata? Ino ty raha nampitamànin’​i Saoly ze olo nahafaty an’​i Goliata?
  • Nivòla an’​i Davida Saoly, fa tsy haharesy an’​i Goliata ie, satria mbo anak’​ajà maré. Fe ino ty safà navalin’​i Davida an’​i Saoly?
  • Arake ty safà navalin’​i Davida an’​i Goliata, fomba manao akore ro nampisehoan’​i Davida fa niantehitse tamin’​i Jehovah ie?
  • Arake ty hitanao amy sary io, nampiasa ino Davida, mba hamonoa an’​i Goliata? Ino ty raha natao Filistina reny tafarani’​zay?

Fanontanea Fanampine

  • Vakio 1 Samoela 17:​1-54.

    Nanino Davida ro tsy navàka mihitsy? Afake mana herim-po manahake aze kea va tsika? Ami’​ty fomba manao akore? (1 Sam. 17:​37, 45; Efes. 6:​10, 11)

    Tsy tokone hana toe-tsay tea mifanìna amin’​olo hafa manahake an’​i Goliata ty Kristiana, laha fa misa na mifalifale. Ino ty antone? (1 Sam. 17:​8; Gal. 5:26; 1 Tim. 4:​8)

    Natoky Davida fa hanampy aze Jehovah. Nanao akore ty fomba nivolànan’​i Davida raha zay? (1 Sam. 17:​45-47; 2 Tant. 20:​15)

    Fomba manao akore ro ahitantsika fa tsy aly ifanaòva’​ty tafike roa avao aly io, fa aly ifanaòvan’​i Jehovah, Andranahare marina iny, noho ty andranahare diso? (1 Sam. 17:​43, 46, 47)

    Ami’​ty fomba manao akore ro ampisehoa’​ty voahosotse fa miantehitse amin’​i Jehovah manahake an’​i Davida roze? (1 Sam. 17:37; Jer. 1:​17-19; Apok. 12:​17)