TAFARA’​TY namonoan’​i Davida an’​i Goliata, le nandesin’​i Abnera filoha’​ty tafik’​Israely ho amin’​i Saoly ane ie. Tean’​i Saoly ty raha nataon’​i Davida, ka le nataone filoha’​ty tafine Davida, sady napetrane tamy trano-mpanjaka tao.

Laha fa baka naharesy ty Filistina ty tafik’​Israely, tafara atoy, le niarake nihira ty ampela hoe: ‘Nahafaty olo arivoarivo Saoly, fa ty an’​i Davida alinaly.’ Nialo an’​i Davida Saoly, satria hita tamy hira nataon’​olo reo, fa Davida ro tean’​olo mandilatse an’​i Saoly. Fe tsy nialo an’​i Davida, Jonatana, anake lahin’​i Saoly. Mifankatea biby Jonatana noho Davida. Ka, nifaneke roze roe lahy, fa ho mpinama avao zisiky am-parane.

Saoly Mpanjaka mitorake lefo

Mahay mititike harpa Davida, ka tean’​i Saoly bibike ty feo’​ty moziky titìhine. Nihalan’​i Saoly maré Davida, ka nitarike an’​i Saoly hamono an’​i Davida raha zay. Tamin’​i Davida nititike harpa, le nalàn’​i Saoly ty lefone ka natorane an’​i Davida, sady nivòla ie hoe: ‘Hofantsìhiko amy rindry eo Davida!’ Fe nihorìra Davida, ka tsy nahavoa aze lefon’​i Saoly iny. Mbo tsy nahavoa an’​i Davida avao lefo iny, tafara atoy. Hain’​i Davida henany zao, fa mila miamby soa ie tsy no ho maty avao.

Tiaronao va safà nampitamànin’​i Saoly iny? Nivòla ie, fa hameane ho vali’​ty anak’​ampelane ze lahilahy mahafaty an’​i Goliata. Nivòla tamin’​i Davida Saoly tamy farane, fa afake manambaly an’​i Mikala, anak’​ampelane iny Davida. Fe mila mamono Filistina 100 tseky Davida. Eritsereto soa moa! Nitamà Saoly fa hahafaty an’​i Davida Filistina reo. Fe tsy zay ty raha niseho. Ka le namean’​i Saoly ho valin’​i Davida avao anak’​ampelane iny.

Ndraike andro Saoly, le nivòla tamin’​i Jonatana noho ty miaramilane, fa teane hovonòa Davida. Fe hoy ty asan’​i Jonatana, tamy babane hoe: ‘Ka mampijaly an’​i Davida iha. Mbo tsy nanao raha raty anao mihitsy ie, fa nanampy anao avao bakany bakany zay. Mba henteo soa tamin’​i Davida namono an’​i Goliata iny, ndra fa hainy fa hahafaty aze aza raha zay, le mbo nialy tamin’​i Goliata avao ie. Nifalifale bibike iha, laha fa naharesy ie.’

Davida miala tsy ho azo lefo

Nijànjy an’​i Jonatana soa Saoly, ka nampitamà aze fa tsy hampijaly an’​i Davida sasy. Nimpòly tamin’​i Saoly tao ndraike Davida, ka nanompo aze manahake ty taloha. Fe ndraike andro, laha fa nititike moziky Davida, le natoran’​i Saoly aze ndraike lefone iny. Nihorìra Davida, ka tsy nahavoa aze lefo iny fa nitsatoke tamy rindry teo. Fa fanintelone zay! Hain’​i Davida henany zao, fa tokone hiala bakeo ie, ka hilay!

Nandeha tan-tranone tany Davida, tamy halike io avao. Fe, nandefa lahilahy maromaro hamono aze Saoly. Nihain’​i Mikala raha hatao babane io, ka nivòla tamin’​i Davida ie hoe: ‘Laha tsy miala eto iha androany haly, le ho maty hamaray.’ Nampian’​i Mikala Davida, ka tamy halike iny avao, le novolànine ie hitsambòka tamy lafonetin-droze teo. Nivòny an’​i Saoly Davida, ka nifindrafindra tan-tany hafa tany ie tanaty fito tao. Tsy afake nahita aze sasy Saoly.

1 Samoela 18:​1-30; 19:​1-18.



Fanontanea

  • Ino ty antone nialònan’​i Saoly an’​i Davida? Fe ino ty raha tsy nampitovy an’​i Saoly noho Jonatana, anane lahy?
  • Ino ty raha niseho ndraike andro, laha fa nititike harpa ho an’​i Saoly, Davida?
  • Ino ty raha nilàn’​i Saoly tokone hataon’​i Davida, mba hahafane hanambaly anak’​ampelan’​i Saoly atao hoe Mikala iny? Ino ty antone nivolànan’​i Saoly raha zay?
  • Ino ty raha niseho fanintelone, laha fa nititike harpa ho an’​i Saoly Davida, arake ty hita amy sary io?
  • Tamy fomba manao akore ro nanampian’​i Mikala an’​i Davida? Ino ty raha tsy maintsy nataon’​i Davida tanaty fito tao nanarake?

Fanontanea Fanampine

  • Vakio 1 Samoela 18:​1-30.

    Ino antone mampitovy ty fifankatiava’​ty “aondry hafa” noho ty “aondry vitsy” amy fifankatiava fatratse nisy tamin’​i Jonatana noho Davida? (1 Sam. 18:​1; Jaona 10:16; Lioka 12:32; Zak. 8:​23)

    Amy fomba manao akore ty 1 Samoela 18:​4 ro mampiseho fa naneke ze nofilìn’​i Jehovah ho mpanjaka Jonatana, ndra ie aza ro tokone hisolo an’​i Saoly?

    Mety hitarike ty olo hanao fahotà bevata ty fialòna. Nanao akore ty nahità an’​io tamin’​i Saoly? (1 Sam. 18:​7-9, 25; Jak. 3:​14-16)

  • Vakio 1 Samoela 19:​1-17.

    Nanino tsika ro mivòla fa mety ho nahafaty an’​i Jonatana safà nataone amy 1 Samoela 19:​4, 5 ao io? (1 Sam. 19:​1, 6)