Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 56: Saoly, Mpanjakan’​Israely Voalohane

Tantara 56: Saoly, Mpanjakan’​Israely Voalohane
Samoela manosotse an’i Saoly ho mpanjaka

HENTEO Samoela fa manìly menake amy loha lahilahy io eo. Io ty raha ataon-droze mba hampisehoa fa nofilìn’​i Jehovah ho mpanjaka ty olo raike. Nivòla tamin’​i Samoela Jehovah mba handrarake menake tan-dohan’​i Saoly teo. Menake manitse miavake ro nampiasà tamin’​io.

Nieritseritse Saoly fa tsy tokone hatao mpanjaka ie. Hoy ty asane: ‘Baka amy fokon’​i Benjamina, foko farane ze kelikele tamy fokon’​Israely aho. Ka ino ty antone ivolànanao fa ho mpanjaka aho?’ Tean’​i Jehovah Saoly, satria, tsy nieritseritse ty vatane ho anabo ie, ka zay ty antone nifiliànan’​i Jehovah aze ho mpanjaka io.

Fe tsy olo nahantra na ambanimbany Saoly. Baka amy fianakavia mpanarivo ie, no sady tovolahy lava bibike. Nihoatse 30 santimetatse ty ­halavane laha fa ampitovỳ amy lahilahy iaby tamin’​Israely teo! Mahalay bibike Saoly, sady matanjake kea. Falifale ty olo laha fa nofilìn’​i Jehovah ho mpanjaka Saoly. Niarake nivòla roze hoe: ‘Irìnay ho lava velo lahy mpanjaka io!’

Mbo matanjake biby manahake ty taloha avao ty fahavalon’​Israely. Mbo manday fahasahiràna maro ho ahi’​ty Israelita avao roze. Vo fotoa kelikele naha-mpanjaka an’​i Saoly, le fa niavy hanafike an-droze ty Amonita. Fe namòry tafike matanjake Saoly, ka naharesy Amonita reo roze. Nahavy vahoake reo ho tea an’​i Saoly raha zay.

Nandeha ty tao, ka nitarike Israelita reo haharesy ty fahavalon-droze avao Saoly. Nanan’​anake lahy nahery fo zay kea Saoly, Jonatana ty anarane. Nanampy ty Israelita handresy tamy aly maro Jonatana. Filistina reo ro fahavalon’​Israelita farane ze navàkan-droze biby. Ndraike andro, le nisy Filistina fa ho an’​arivo mahery, niavy mba hialy tamin’​Israelita reo.

Nivòla tamin’​i Saoly Samoela mba handìny aze vo hanao soro na fanomeza ho an’​i Jehovah. Samoela ro mahazo manao raha io. Fe mbo tsy niavy Samoela, ka tsy nahalìny sasy Saoly. Navàka ie tsy no ho avy avao ty Filistina, ka hanafike an-droze. Ka le nandeha ie raike, nanao soro iny. Fe laha fa niavy Samoela tamy farane, le nivòla tamin’​i Saoly ie, fa tsy nanorike ty safàn’​i Jehovah Saoly. Ka hoy ty asane hoe: ‘Hifìly olo hafa mba hatao mpanjakan’​Israely Jehovah.’

Mbo tsy nanorike ty safàn’​i Jehovah avao Saoly tafara atoy, ka nivòla tamine Samoela hoe: ‘Soa mandilatse ty fanaòva soro aondry farane ze soa, ty fanorìha ty safàn’​i Jehovah. Tsy hataon’​i Jehovah mpanjakan’​Israely sasy iha, satria tsy nanorike ty safàne.’

Misy fianara azontsika baka amy tantara io. Nihita teo fa tokone hanorike ty safàn’​i Jehovah avao tsika. Nianarantsika teo kea, fa ty olo soa fanahy manahake an’​i Saoly le mety hiova ho olo raty fanahy. Tsy ta ho raty fanahy mihitsy tsika, sa tsy zay?

Samoela toko faha-9 zisiky amy toko faha-11; 13:​5-14; 14:​47-52; 15:​1-35; 2 Samoela 1:23.



Fanontanea

  • Ino ty raha ataon’​i Samoela amy sary io? Ino ty antone?
  • Ino ty antone nitiavan’​i Jehovah an’​i Saoly? Lahilahy nanao akore moa Saoly?
  • Ia ty anara anake lahin’​i Saoly iny? Ino ty raha natao anane io?
  • Nataon’​i Saoly raike avao soro iny, fa tsy nandìny an’​i Samoela ie. Ino ty antone?
  • Ino ty raha ianarantsika baka amy tantaran’​i Saoly io?

Fanontanea Fanampine

  • Vakio 1 Samoela 9:​15-21 noho 10:​17-27.

    Nanetry tena Saoly. Nanampy aze tsy hamaly ty raha raty nataon’​olo tamine raha zay. Ino ty antone? (1 Sam. 9:21; 10:​21, 22, 27; Ohab. 17:​27)

  • Vakio 1 Samoela 13:​5-14.

    Ino ty fahotà nataon’​i Saoly ta-Gilgala tany? (1 Sam. 10:​8; 13:​8, 9, 13)

  • Vakio 1 Samoela 15:​1-35.

    Ino ty fahotà bevata nataon’​i Saoly mikasike an’​i Agaga, mpanjakan’​Amalekita? (1 Sam. 15:​2, 3, 8, 9, 22)

    Ino ty fialàn-tsiny nataon’​i Saoly? Nasàrane an’​ia ty hadisoane? (1 Sam. 15:​24)

    Ino ty raha tsy tokone hataontsika, laha fa misy olo manoro hevitse antsika? (1 Sam. 15:​19-21; Sal. 141:​5; Ohab. 9:​8, 9; 11:​2)