Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 54: Lahilahy Natanjake Bibike

Tantara 54: Lahilahy Natanjake Bibike

HAINAO va hoe ia ty anara lahilahy matanjake bibike tan-tany etoy? Mpitsara ie, ka Samsona ty anarane. Jehovah ro nanome hery an’​i Samsona. Nivòla tamy renin’​i Samsona Jehovah, taloha’​ty nahaterahane hoe: ‘Tsy ho ela, le hanan’​anake lahy iha. Ka ie ro hanavotse ty Israely amy tana’​ty Filistina.’

Samsona mialy amin’ny liona

Olo raty fanahy nipetrake ta-Kanana tao, Filistina reo. Nana miaramila matanjake maro roze, ka nampijalìn-droze ty Israelita. Ndraike andro, laha fa nandeha hanenty ty toera misy Filistina reo Samsona, le nisy liona bevata raike zay, namonjy aze ka, nanehitse aze. Fe novonòn’​i Samsona tamy tanane liona io. Namono Filistina an-jatone maro kea ie.

Tafara atoy, le nanjary nitea ampela raike atao hoe Delila zay Samsona. Nampitamà ty filoha’​ty Filistina, fa hanome an’​i Delila farantsa volafoty 1 100 ty miaramila kiraidraike, laha mivòla amin-droze Delila hoe ino ty antone mampatanjake an’​i Samsona io. Tean’​i Delila ho azo iaby drala reo. Tsy tea an’​i Samsona ie, no sady tsy tea ty vahoaki-Ndranahare kea. Ka nametrake fanontanea maro tamin’​i Samsona Delila, mba hahaìzane ty antone nampatanjaka an’​i Samsona.

Delila noho Samsona

Farane, le niazon’​i Delila Samsona, ka nivòla tamine ty sekiré mikasike herine io. Nivòla Samsona hoe: ‘Mbo tsy notampàha mihitsy ty voloko. Vo naterake aho, le fa nofilì-Ndranahare ho lahilahy miavake nokaìhy hoe Nazirita. Laha ohatse ka tampàhy ty voloko, le tsy misy kea ty heriko.’

Laha fa nihain’​i Delila raha iaby rezay, le nengàne hiroro bibike tamy feny teo Samsona. Bakeo nikaike lahilahy ie, ka nampilìrine tao mba hanampake ty volon’​i Samsona. Laha fa nifoha Samsona, le tsy nana hery sasy. Nilitse tamine tao Filistina reo, ka namehy aze. Nopotsehin-droze ty masone, bakeo nataone andevo ie.

Samsona manosike vato mitanjake trano

Nanao fety mba hivavake tamin’​i Dagona, andranaharen-droze Filistina reo ndraike andro. Nalàn-droze baka am-pigadrà tao Samsona, mba hokizàhin-droze. Fe fa nitìry ndraike ty volon’​i Samsona tamy fotoa io. Hoy Samsona tamy anak’​ajà nitarike ty tanane zay hoe: ‘Engào aho, hitsapa vato mitanjake trano toy reo.’ Nangatake hery tamin’​i Jehovah Samsona, ka notanjahine maré vato nitanjake trano iny. Nikiakiake maré biby Samsona hoe: ‘Engào aho ho maty miarake amy Filistina reto ato.’ Nisy 3 000 ty Filistina tamy fety io tao. Ka laha fa natosin’​i Samsona maré vato reny, le niropake trano iny, ka maty tao iaby olo raty fanahy reny.

Mpitsara toko faha-13 zisiky amy toko faha-16.



Fanontanea

  • Ia va ty anara lahilahy natanjake bibike taloha fa ela iny? Ia ty nanome aze tanjakine io?
  • Nataon’​i Samsona akore ty liona raike, arake ty hita amy sary io?
  • Ino va sekiré nambaran’​i Samsona an’​i Delila amy sary io? Nahavy an’​i Samsona hosambòry Filistina reo raha zay. Ino ty antone?
  • Nahavita namono Filistina 3 000 Samsona, tamy andro nahafatesane. Nanao akore ty fomba nahavitàne raha zay?

Fanontanea Fanampine

  • Vakio Mpitsara 13:​1-14.

    Ino ty ohatse soa namean-dr’​i Manoa morovale ty rae noho reny miteza anake henany zao? (Mpits. 13:​8; Sal. 127:​3; Efes. 6:​4)

  • Vakio Mpitsara 14:​5-9 noho 15:​9-16.

    Manao akore ty fomba fiasa’​ty fanahy masin’​i Jehovah, laha ty fomba namonoan’​i Samsona liona, noho ty nanapahane taly vaovao naféhy aze, voho ty namonoane lahilahy 1 000 tamy taòlan’​ampondra reny, ro resahy?

    Manao akore ty fomba anampia’​ty fanahy masy antsika henany zao? (Mpits. 14:​6; 15:14; Zak. 4:​6; Asa. 4:​31)

  • Vakio Mpitsara 16:​18-31.

    Ino ty raha nahazo an’​i Samsona laha fa niarake tamy nama raty ie. Ka ino kea ty fianara azontsika baka amy raha zay? (Mpits. 16:​18, 19; 1 Kor. 15:​33)