Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 53: Voady Nataon’​i Jefta

Tantara 53: Voady Nataon’​i Jefta
Anak’ampelany Jefta

FA NAMPITAMÀ raha olo va iha, ka hitanao laha fa bakeo fa sarotse ty manatanterake aze? Nitratsy raha zay lahilahy hitanao amy sary eo io, ka zay ty antone mampalahelo aze io. Lahilahy nahery fo tamin’​Israely teo lahilahy io, Jefta ty anarane.

Niay tamy fotoa tsy nanompoan’​Israelita reo sasy an’​i Jehovah Jefta. Nimpòly nanao raty ndraike roze, ka nengàn’​i Jehovah hampijalì’​ty Amonita. Nitaray tamin’​i Jehovah ndraike roze ka nanao hoe: ‘Nanota taminao zahay, ka mba vonjeo!’

Jefta noho ty namane

Naneny tami’​ty raha raty nataon-droze vahoake reo. Nasehon-droze raha zay laha fa nimpòly nivavake tamin’​i Jehovah ndraike roze. Ka, nanampy an-droze ndraike Jehovah.

Jefta ro nofilì’​ty vahoake mba hialy amy Amonita raty fanahy reo. Nirìn’​i Jefta bibike ty hanampian’​i Jehovah aze amy aly io. Ka nampitamà ho’​zao an’​i Jehovah ie hoe: ‘Laha ataonao maharesy Amonita reo aho, le hameako anao ze olo raike miboake baka an-tranoko ao voalohane hitsena ahy, laha fa mimpòly atoy aho.’

Nojanjìnin’​i Jehovah soa ty voady nataon’​i Jefta ka nanampy aze ie mba handresy amy aly io. Laha fa nimpòly tan-tranone tany Jefta, hainao va hoe ia ty olo niboake voalohane mba hitsena aze? Ty anak’​ampelane; io avao ty anane. Nikiakiake Jefta hoe: ‘Nao lahy anak’​ampelako e! Ino lahy raha mampalahelo ataonao ahy toy. Fe fa nanao voady tamin’​i Jehovah aho ka tsy afake manova raha zay sasy.’

Nalahelo biby anak’​ampelan’​i Jefta iny, laha fa naharé voady nanòvy babane tamin’​i Jehovah io, satria midika raha zay fa tokone hiala amy babane eo noho ami’​ty namane eo iaby ie. Handany ty fiaìnane manontolo mba hanompoa an’​i Jehovah amy tabernakely a-Silo ane ajà ampela io. Ka hoy ty asane tamy babane hoe: ‘Laha fa nanao voady tamin’​i Jehovah iha, le tokone hotanterahinao raha zay.’

Ka nandeha ta-Silo tany anak’​ampelan’​i Jefta iny, sady nolanìane tamy fanompoane an’​i Jehovah tamy tabernakely tao ty fiaìnane manontolo. Nanòka efatse andro isan-tao hamangìa anak’​ampelan’​i Jefta io ta-Silo tany, ty ampela israelita. Niarake nifalifale roze tamy fotoa io. Tean’​olo iaby anak’​ampelan’​i Jefta io, satria nanompo an’​i Jehovah soa ie.

Mpitsara 10:​6-18; 11:​1-40.



Fanontanea

  • Ia va Jefta zao? Velo tamy fotoa nanao akore ie?
  • Ino ty fanta nataon’​i Jefta tamin’​i Jehovah?
  • Nimpòly an-tranone ane Jefta, laha fa baka naharesy Amonita reo. Fe nanino ie ro nalahelo?
  • Ino ty raha novolàny anak’​ampelan’​i Jefta iny, laha fa nihaine voady natao babane io?
  • Nanino anak’​ampelan’​i Jefta iny ro tean’​olo?

Fanontanea Fanampine

  • Vakio Mpitsara 10:​6-18.

    Mananatse antsika amin’​ino ty fivalìhan’​Israely tamin’​i Jehovah? (Mpits. 10:​6, 15, 16; Rom. 15:​4; Apok. 2:​10)

  • Vakio Mpitsara 11:​1-11, 29-40.

    Tsy noròan’​i Jefta manahake olo atao soro amy afo io anak’​ampelane iny. Fe, ino ro ahaìzantsika raha zay, laha ty dika safà toy ro hentea: nataon’​i Jefta “fanatitse doròa” anak’​ampelane iny? (Mpits. 11:31; Lev. 16:24; Deot. 18:​10, 12)

    Tamy fomba manao akore ro nanaòvan’​i Jefta soro ty anak’​ampelane?

    Notanterahin’​i Jefta tamin’​i Jehovah soa voady nataone iny. Ino ty fianara azontsika baka amy raha zay? (Mpits. 11:​35, 39; Mpit. 5:4, 5; Matio 16:​24)

    Ino ty ohatse soa nengà anak’​ampelan’​i Jefta iny, ho fampirisìha ty tanora kristiana hanompo an’​i Jehovah manontolo andro? (Mpits. 11:36; Matio 6:33; Fil. 3:​8)