HENTEO moa Josoa. Mivòla ie eo hoe: ‘Masoandro, mijanòna iha!’ Le nijàno ty masoandro. Tsy nihetsike tanivo lanitse iny teo masoandro io tanaty andro raike manontolo. Jehovah ro nanao raha zay! Fe ndao ho henteantsika hoe nanino ty masoandro ro nitean’​i Josoa hazava eo avao.

Masoandro

Laha fa nanomboke nialy tamy Gibeonita, mpanjaka limy, raty fanahy ta-Kanana tao reny; le nanirake lahilahy raike hangatake fanampia amin’​i Josoa ane ty Gibeonita. ‘Miavia malaky aminay atoy!’, hoy ty asane. ‘Vonjeo zahay! Fa avy hialy aminay mpanomponao ty mpanjaka amy faritany be vohitse ane reny.’

Avy le nandeha malaky Josoa noho lahilahy mpanafike namane reny. Nandeha tomboke tanaty hale manontolo roze. Laha fa niavy ta-Gibeona tao roze, le navàka iaby ty miaramila’​ty mpanjaka limy raty fanahy tao reny, ka nanomboke nilay. Bakeo nandatsake havandra bevata baka an-danitse ane Jehovah. Maro bibike ty miaramila nimaty havandra io laha ohàry tamy aze novonò’​ty mpanafike naman’​i Josoa reny.

Josoa

Hitan’​i Josoa fa hanomboke ho tsofotse ami’​zay ty masoandro. Maro amy miaramila’​ty mpanjaka limy raty fanahy reo ro hilay laha fa haìky ty andro. Zay ty antone nivavàhan’​i Josoa tamin’​i Jehovah, no sady nivolànane hoe: ‘Masoandro, mijanòna iha!’ Afake handresy Israelita reo satria, mbo nijàno teo avao masoandro iny.

Mbo maro ty mpanjaka raty fanahy tsy tea ty mpanompo-Ndranahare, nipetrake ta-Kanana tao. Nila enin-tao Josoa noho ty miaramilane mba handresea mpanjaka 31, tamy tany io tao. Laha vo nivita raha zay, le nozaràn’​i Josoa tamy foko mbo nila faritany reny, tany Kanana io.

Lasa ty tao maromaro, le nimaty Josoa laha fa nifeno 110 tao. Nanarake soa ty safàn’​i Jehovah ty vahoake tamin’​i Josoa noho namane reo mbo nivelo. Fa laha fa nimaty lahilahy soa fanahy reo, le nanomboke nanao raha tsy mety ty olo, ka nahita fahasahiràna. Ka tami’​zay roze vo tena nila ty fanampia-Ndranahare.

Josoa 10:​6-15; 12:​7-24; 14:​1-5; Mpitsara 2:​8-13.



Fanontanea

  • Ino va raha volànin’​i Josoa amy sary eo io, voho ino ty antone?
  • Tamy fomba akore ro nanampian’​i Jehovah an’​i Josoa noho ty miaramilane?
  • Firy ty mpanjaka resin’​i Josoa? Nila firy tao ie mba handresea fahavalone reo?
  • Ino ty antone nizaràn’​i Josoa tany Kanana io?
  • Firy tao Josoa vo nimaty? Ino ty raha niseho tafara raha zay?

Fanontanea Fanampine

  • Vakio Josoa 10:​6-15.

    Ino ty raha azontsika antoke, laha fa haintsika fa nampijàno ty masoandro noho ty vola ho an’​Israelita reo Jehovah? (Josoa 10:​8, 10, 12, 13; Sal. 18:​3; Ohab. 18:​10)

  • Vakio Josoa 12:​7-24.

    Ia ty naharesy mpanjaka 31 ta-Kanana tao reny? Manino raha zay ro misy dikane bevata ho antsika? (Josoa 12:​7; 24:​11-13; Deot. 31:​8; Lioka 21:​9, 25-28)

  • Vakio Josoa 14:​1-5.

    Nanao akore ty fomba nizarà tany ho ahi’​ty fokon’​Israely? Mampiseho ino mikasike ty lova ho azontsika amy Paradisa ao raha zay? (Josoa 14:​2; Isaia 65:21; Ezek. 47:​21-23; 1 Kor. 14:​33)

  • Vakio Mpitsara 2:​8-13

    Ia henany zao ro manàka ty fiparitaha’​ty fivaliham-pinoa, manahake ty nataon’​i Josoa ta-Israely tany? (Mpits. 2:​8, 10, 11; Matio 24:​45-47; 2 Tes. 2:​3-6; Tit. 1:​7-9; Apok. 1:​1; 2:​1, 2)