Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 44: Navònin’​i Rahaba Mpisafo Tany Reny

Tantara 44: Navònin’​i Rahaba Mpisafo Tany Reny

SAHÌRA lahilahy reo. Mila milay roze, laha tsy zay le ho maty. Mpisafo tany lahilahy israelita roe reo. Rahaba ty anaran’​ampela manampy an-droze io. Mipetrake amy trano raike amy rindrin’​i Jeriko eo Rahaba. Ndao ho henteantsika ty antone maha sahìra lahilahy reo.

Fa paré hitsàky Ranon’​i Jordana io ty Israelita mba hilìra amy tany Kanana ane. Fe nandefa mpisafo tany roe tseky Josoa. Hoy ty asane tamin-droze: ‘Ndahàna nareo hanenty ty raha miseho amy tany Jeriko ane.’

Rahaba noho Israelita mpisafo tany roe

Laha fa niavy ta-Jeriko tao mpisafo tany reny, le nandeha tamy tranon’​i Rahaba tao. Fe nisy olo raike nivòla tamy mpanjakan’​i Jeriko hoe: ‘Misy Israelita roe niavy amintsika eto, hanenty ty raha miseho amy tanintsika toy.’ Laha fa naharé raha zay mpanjaka iny, le nandefa lahilahy ho amin’​i Rahaba ane ie, ka nivòla tamin’​i Rahaba lahilahy reo hoe: ‘Aboàho amonto atoy, lahilahy an-tranonao ao reo!’ Fe navònin’​i Rahaba tamy tafon-tranone tao mpisafo tany reny. Hoy ami’​zay ty asan’​i Rahaba tamy lahilahy nirahin’​i mpanjaka reny hoe: ‘Nisy lahilahy rezay niavy tamiko teto, fe tsy haiko hoe baka aìa roze. Laha fa nihain-droze ami’​zay fa hihìly vavahady be io, le nandeha malaky roze. Ndahàna hiàno malaky roze, fa mety mbo ho tratsinareo!’ Ka le nandeha hanìa mpisafo tany reny olo reo.

Laha fa nandeha lahilahy nirahy mpanjaka reny, le niakatse tamy tafon-tranone tao ndraike Rahaba. Nivòla tamy mpisafo tany reny ie hoe: ‘Matoky vatane aho fa hamean’​i Jehovah anareo tany toy. Fa nirenay ty nanasarahane Riake Mena iny laha fa niala ta-Ejipta tao nareo, noho ty namonoanareo ty mpanjakan’​i Sihona noho Oga. Soa fanahy taminareo aho, ka mba mangatake aminareo kea aho, mba ho soa fanahy amiko. Mba avòto ty babako noho ty reniko, miarake ami’​ty anadahiko noho ty rahavaviko.’

Nivòla tamin’​i Rahaba mpisafo tany reo, fa hotanterahin-droze raha ­nangatahine zay, fe mila manao raha tseky Rahaba. Nivòla tamine mpisafo tany reny hoe: ‘Ahantòno amy lafonetinareo eo taly mena toy, bakeo avorio an-tranonao ato iaby ty fianakavianao. Ka laha fa mimpòly a-Jeriko atoy ndraike zahay, hangalake tany toy, le ho hitanay taly mena mihanto amy lafonetinareo io, ka tsy hovonòanay ty olo an-tranonao ato.’ Laha fa nimpòly tamin’​i Josoa tany mpisafo tany reny, le nitantara tamine iaby ty raha niseho.

Josoa 2:​1-24; Hebreo 11:31.



Fanontanea

  • Nipetrake taìa Rahaba?
  • Ia lahilahy roe hitantsika amy sary eo reo? Ino ty nataon-droze ta-Jeriko ane?
  • Ino ty raha nampanaòvy mpanjakan’​i Jeriko iny an’​i Rahaba? Fe ino ty navalin’​i Rahaba aze?
  • Tamy fomba manao akore ro nanampian’​i Rahaba lahilahy roe reny? Ino koa ty raha nangatahin’​i Rahaba tamin-droze?
  • Nampitamà ino an’​i Rahaba mpisafo tany roe lahy reo?

Fanontanea Fanampine

  • Vakio Josoa 2:​1-24.

    Tamy fomba manao akore ro nahatanterake safà nampitàmanin’​i Jehovah amy Eksodosy 23:28 ao iny, laha fa nanafike an’​i Jeriko ty Israelita? (Josoa 2:​9-11)

  • Vakio Hebreo 11:​31.

    Laha ohatsin’​i Rahaba io ro hentea, nanino ro ilà vatane ty finoa? (Rom. 1:17; Heb. 10:39; Jak. 2:​25)