Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 42: Ampondra Mivòla

Tantara 42: Ampondra Mivòla

BIBY manahake sôvaly kelikele io ampondra zao. Mbo tsy naharé ampondra niresake va iha? ‘Aha’, hoasanao, satria ‘tsy afake mivòla ty biby.’ Fe amy Baiboly ao le misy tantaran’​ampondra raike niresaka zay. Ndao ho henteantsika ty raha niseho.

Anjele

Fa marìny hilitse amy tany Kanana ao ty Israelita henany zao. Fe natahòran’​i Balaka, mpanjakan’​i Moaba, ty Israelita. Ka, nandefa lahilahy atao hoe Balama zay ie, mba hanozo ty Israelita. Nampitamà an’​i Balama, Balaka Mpanjaka, fa hanome drala be aze. Nalàn’​i Balama ty ampondrane, ka nandeha namonjy an’​i Balaka ie.

Tsy tean’​i Jehovah ty hanozònan’​i Balama ty Israelita, vahoakine. Ka nanirake anjele nanday sabatsy zay Jehovah, mba hanàka an’​i Balama tan-dàla teny. Tsy nihitan’​i Balama anjele io, fa ampondra iny ro nahita aze. Nijàno ampondra iny, ka nivìo lala hafa, laha fa nihitane anjele io. Tamy farane le nipetrake tan-dalavato teo ampondra iny. Neloke biby Balama, ka novangòane tamy hazo ampondra iny.

Nataon’​i Jehovah ty haharenesan’​i Balama ampondrane iny miresake amine. Nanontany aze ampondra iny hoe: ‘Ino ty raha nataoko anao amangòanao ahy manao an’​io?’

Balama anabo ampondra

‘Nikizake ahy iha’, hoy Balama. ‘Laha nana sabatsy aho le novonòko iha!’

‘Fa nataoko manahake an’​io va iha taloha?’, hoy ndraike ampondra iny nanontany an’​i Balama.

‘Aha’, hoy Balama

Bakeo, nampahitàn’​i Jehovah an’​i Balama ami’​zay anjele nitanjake sabatsy nijàno tan-dala teo iny. Nivòla anjele iny hoe: ‘Manino ampondranao io ro vangoanao? Hanàka ty lalanao ty antone niaviako eto, satria tsy tokone hanozo ty Israelita iha. Laha tsy nivìo lala hafa ampondranao io, le iha ro ho novonòko, fa ampondranao io tsy ho nataoko ino.’

Nivòla Balama hoe: ‘Nanota aho; tsy haiko hoe nitsanga tan-dala teo iha.’ Nengàn’​anjele iny handeha Balama laha fa bakeo, ka nandeha tamin’​i Balaka Mpanjaka tany ie. Mbo te hanozo an’​Israely avao ie, fe nataon’​i Jehovah ze hitsòfane rano intelo ty Israelita.

Nomery 21:​21-35; 22:​1-40; 23:​1-30; 24:​1-25.



Fanontanea

  • Ia va Balaka zao? Ino ty antone nampangalàne an’​i Balama io?
  • Nanino va ty ampondran’​i Balama ro nipetrake tan-dalavato teo?
  • Ino ty raha novolàny ampondra iny tamin’​i Balama?
  • Ino ty raha novolàni’​ty anjele raike tamin’​i Balama?
  • Ino ty raha niseho laha fa ho nanòzo ty Israely Balama?

Fanontanea Fanampine

  • Vakio Nomery 21:​21-35.

    Nanino va Israelita reo ro naharesy an’​i Sihona, mpanjaka’​ty Amorita, noho Oga, Mpanjakan’​i Basana? (Nom. 21:​21, 23, 33, 34)

  • Vakio Nomery 22:​1-40.

    Ino ty antone naneken’​i Balama hanòzo ty Israelita, ka ino ty fianara azontsika baka amy raha zay? (Nom. 22:​16, 17; Ohab. 6:​16, 18; 2 Pet. 2:15; Joda 11)

  • Vakio Nomery 23:​1-30.

    Atao ho mpivavake amin’​i Jehovah io Balama laha fa niresake, fe ino ro nahità fa tsy marina raha zay? (Nom. 23:​3, 11-14; 1 Sam. 15:​22)

  • Vakio Nomery 24:​1-25.

    Manatanjake ty finoantsika tantara io. Hita ao fa tsy maintsy ho tanterake ty fikasàn’​i Jehovah. Hazavao. (Nom. 24:10; Isaia 54:​17)