Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 37: Tranolay Hanaòva Fanompoam-pivavàha

Tantara 37: Tranolay Hanaòva Fanompoam-pivavàha

HAINAO va hoe ino trano eo io? Tranolay natòka hanaòva fanompoam-pivavàha ho an’​i Jehovah io, ka tabernakely ro nikaìha aze. Tao raike tafara’​ty nialà vahoake reo ta-Ejipta tao ro nahavitan-droze aze. Ia ty nanome hevitse an-droze hanamboatse raha io?

Tabernakely

Hevitse baka amin’​i Jehovah. Laha fa tamy Vohitse Sinay teny Mosesy, le natoron’​i Jehovah aze ty fomba hanamboara tranolay io. Nivòla tamin’​i Mosesy ie, fa tokone ho trano azo saratsarahy ka ho azo atambatse ndraike laha fa bakeo, tranolay io. Tokone ho azo afindrafindra kea tranolay io, soa tsy ho sarotse amin-droze ty handay aze. Ka laha fa nifindrafindra tan’​efitsy tany ty Israelita, le nandesin-droze niarake tamin-droze avao tranolay io.

Laha henteanao ty anaty efitse kelikele, amy fara tranolay io ao, le afake mahita vata, na kesike bevata raike iha. Kaìhy hoe fiara’​ty fanekea raha io. Nasia anjele na kerobima roe vita amy volamena, ty sisine kiraidraike amy fiara’​ty fanekea io. Nosorata-Ndranahare tamy vato fisake roe hafa ndraike ty Didy Folo, satria fa notorotoròn’​i Mosesy vato roe voalohane reny. Natao tanaty fiara’​ty fanekea tao vato reo. Najarìn-droze tao kea valàny volamena nisy mana zay. Tiaronao va mana io?

Nofilìn’​i Jehovah mba ho mpisoronabe, Arona rahalahin’​i Mosesy. Ie ro nitarike ty olo hanompo an’​i Jehovah. Mpisoro iaby kea anake lahine reo.

Mba henteo ndraike moa efitse bevata amy tranolay io. In-droe’​ty habe tranolay kelikele io ty habevatane. Hitanao va vata na kesike kelikele misy setroke miboake baka anatine ao io? Io alitara fandoroa’​ty mpisoro raha manitse atao hoe: ditin-kazo manitse iny. Anilany eo, ahità fasia jiro, misy jiro fito. Ankoatse zay, misy latàbo koa anaty trano io eo. Mofo 12 ro apetrake anabo eo.

Aloha’​ty filìra amy tabernakely ao, le misy kovety bevata zay amonto eo. Natao eo raha io soa hisasà’​ty mpisoro. Misy alitara bevata raike koa ty teo. Noròa teo ty biby natao soro ho an’​i Jehovah. Natao tanivo tanà nipetrahan’​Israelita reo teo tranolay iny. Fa, roze nipetrake tamy lay manodidy raha io.

Eksodosy 25:​8-40; 26:​1-37; 27:​1-8; 28:​1; 30:​1-10, 17-21; 34:​1, 2; Hebreo 9:​1-5.



Fanontanea

  • Ino va trano hitantsika amy sary eo io? Natao hanaòva ino trano io?
  • Nanino va Jehovah ro nivòla tamin’​i Mosesy mba hanao tranolay io ho mora saratsarahy?
  • Ino va ty anara vata amy efitse kelikele, hita amy farane amy tranolay io ao? Ino iaby ty raha anatine ao?
  • Ia ro nofilìn’​i Jehovah ho mpisoronabe? Ino ty asa nampanaòvy aze?
  • Misy raha telo amy efitse bevata amy tranolay io ao. Mba volàno iaby hoe!
  • Ino raha roe hita amy lakoro tabernakely io eo? Hanaòva ino raha reo?

Fanontanea Fanampine

  • Vakio Eksodosy 25:​8-40; 26:​1-37; 27:​1-8; noho 28:​1.

    Ino ty dika kerobima napetrake tanabo “fiara’​ty vavolombelo” teo reny? (Eks. 25:​20, 22; Nom. 7:89; 2 Mpanj. 19:​15)

  • Vakio Eksodosy 30:​1-10, 17-21; 34:​1, 2; noho Hebreo 9:​1-5.

    Tean’​i Jehovah halio avao ty mpisoro manompo amy tabernakely ao. Ino ty antone? Tokone hanao akore kea tsika mpanompo-Ndranahare? (Eks. 30:​18-21; 40:​30, 31; Heb. 10:​22)

    Tamy apostoly Paoly nanoratse taratasy ho ahi’​ty Kristiana hebreo le natorone fa lany daty ty tabernakely noho ty Lalàna. Hazavao. (Heb. 9:​1, 9; 10:​1)