Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 29: Nanino Mosesy ro Nilomay?

Tantara 29: Nanino Mosesy ro Nilomay?

HENTEO moa Mosesy milay baka a-Ejipta ane io. Hitanao va lahilahy manìa azy io? Hainao va hoe ino ty antone hamonoan-droze an’​i Mosesy? Ndao hianarantsika.

Mosesy nilay baka Ejipta

Nihabe tan-tranon’​i Farao mpanjakan’​i Ejipta tao Mosesy. Nanjary lahilahy hendry noho nalaza ie. Hain’​i Mosesy fa tsy Ejipsiana ie, satria andevo israelita ty rane noho ty renine niterake aze.

Ndraike andro, laha fa nifeno 40 tao Mosesy, le nanapa-kevitse fa hanenty ty fiaìnan’​Israelita rahalahine reo. Nandesy tamy fomba raty roze. Nahita Ejipsiana namàngo andevo israelita ie. Nitolitolike manodidy azy Mosesy, ka laha fa tsy nisy olo nahita aze, le novangòane kea Ejipsiana iny, ka nalevine tam-pasy tao ty fatine.

Nandeha niboake hanenty ty olo karàza raike amine ndraike Mosesy, ndraike andro. Nieritseritse ie fa ho afake hanampy ty Israelita mba tsy ho andevo sasy. Fe nahita Israelita roe nialy Mosesy ka neloke sady nivòla tamy raike diso iny hoe: ‘Ino va ty antone amangòanao rahalahinao io?’

Nivòla lahilahy iny hoe: ‘Ia olo nifìly anao ho sefonay ka hitsara anay io? Sa, ta hamono ahy kea va iha manahake namonoanao Ejipsiana iny?’

Navàka Mosesy henany zao, satria nanjary nihain’​olo fa ie ro namono Ejipsiana iny. Sady ndra Farao kea aza le fa naharé raha zay, ka nandefa olo hamono an’​i Mosesy ie. Zay ty antone nilaìsan’​i Mosesy baka Ejipta ao io.

Laha fa niala ta-Ejipta ao Mosesy, le nandeha tan-tany lavitse tamy tany Midiana ane. Nahita ty fianakavian’​i Jetro ie tany, ka nangalake an’​i Zipora anak’​ampelan’​i Jetro mba ho valine. Nanjary mpiarake aondry Mosesy, ka nikarakara ty aondrin’​i Jetro. Fa ho 40 tao henany zao ty nipetrahan’​i Mosesy tamy tany Midiana ane. Fa 80 tao Mosesy henany zao. Ka laha fa niarake ty aondrin’​i Jetro Mosesy ndraike andro, le nisy raha nahatserike niseho, ka nanova ty fiaìnan’​i Mosesy manontolo. Ndao ho henteantsika hoe ino raha nahatserike io.

Eksodosy 2:​11-25; Asan’​ny Apostoly 7:​22-29.



Fanontanea

  • Taìa ty nahabe an’​i Mosesy? Fe ino ty raha hainy mikasike ty rae amin-drenine?
  • Ino ty raha nataon’​i Mosesy laha fa nifeno 40 tao ie?
  • Nisy lahilahy israelita raike zay hitan’​i Mosesy nialy, ino ty raha novolànin’​i Mosesy aze? Ino ty safà navaly lahilahy israelita io aze?
  • Ino ty antone nilaìsan’​i Mosesy baka Ejipta ao io?
  • Nilay taìa Mosesy? Ia ty olo nihitane tany?
  • Ino ty raha nataon’​i Mosesy tanaty 40 tao, tafara’​ty nilaìsane baka Ejipta ane?

Fanontanea Fanampine

  • Vakio Eksodosy 2:​11-25.

    Ndre fa an-taony maro aza ty nianaran’​i Mosesy ty fahendrean’​Ejipsiana, le tsy nivalike tamin’​i Jehovah noho ty vahoakine ie. Tamy fomba manao akore ro nampisehoane raha zay? (Eks. 2:​11, 12; Heb. 11:​24)

  • Vakio Asan’​ny Apostoly 7:​22-29.

    Mosesy raike avao ro nanao ze hahafake Israelita reo tamy fanandevozan’​Ejipsiana. Ino ty fianara azontsika baka amy raha zay? (Asa. 7:​23-25; 1 Pet. 5:​6, 10)