Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 22: Nogadrà Josefa

Tantara 22: Nogadrà Josefa

VO FOLO fitoamby tao Josefa laha fa nandesy ta-Ejipta tany. Navìly tamy lahilahy natao hoe Potifara zay ie laha fa tany. Niasa ho an’​i Farao, mpanjakan’​i Ejipta, Potifara io.

Josefa tam-pigadrà tao

Niasa mafy ho an’​i Potifara mpampiasa aze, Josefa. Ka laha fa nihabe ie, le nampikarakaràn’​i Potifara ty tranone iabiaby. Nanino Josefa ro nogadrà? Valin’​i Potifara iny ro nampigadra aze.

Nanjary tovolahy soa vata noho soa tarehy Josefa laha fa nihabe, ka naniry handry amin’​i Josefa valin’​i Potifara iny. Fe tsy hanao raha io mihitsy Josefa, satria nihaine fa raty raha zay. Nimeloke maré tamin’​i Josefa valin’​i Potifara iny. Ka laha fa niavy tan-trano tao ty valine, le namoro vandy tamine ie ka nivòla hoe: ‘Ta ho nandrava ahy, Josefa raty iny!’ Nimeloke maré Potifara, satria ninoane resake valine iny, ka le nogadràne Josefa.

Tsy ela, le nihita lahilahy mpikarakara trano figadrà iny fa olo soa fanahy Josefa. Ka nampikarakaràne gadra sasane reo. Tafarafara atoy, le nimeloke tamy mpanday kôpine noho ty mpanao mofone Farao, ka nampilitse an-droze reo tam-pigadrà tao. Ndraike haly le samby nanonofy roze roe lahy reo, fe tsy hain-droze ty dika nofy iny. Nivòla Josefa ­hamarain’​iny hoe: ‘Ambarao ahy ty nofinareo.’ Le samby nitantara ty aze lahilahy reo. Fe noho’​ty fanampia-Ndranahare, le afake nanambara ty dika nofin-droze reny Josefa.

Nivòla tamy mpanday kôpy iny Josefa hoe: ‘Afake telo andro le tsy ho gadra sasy iha fa halà baka ato, ka ho mpanday kôpin’​i Farao ndraike.’ Le mbo nampian’​i Josefa hoe: ‘Laha fa tafaboake ato iha, le mba iresàho ty mikasike ahy Farao, ka ampio koa aho mba ho afake ato.’ Fe ho’​zao ty raha novolànine tamy mpanao mofo iny: ‘Afake telo andro le hotampahin’​i Farao ty lohanao.’

Laha fa afake telo andro, le nitanterake iaby raha novolànin’​i Josefa reny. Nampanapahin’​i Farao ty loha lahilahy mpanao mofo iny. Fa mpanday kôpy iny le naboake baka am-pigadrà ao sady mbo niasa ho an’​i mpanjaka iny ndraike. Fe tsy nahatiaro an’​i Josefa mihitsy mpanday kôpy iny! Tsy noresahine tamin’​i Farao ty mikasike an’​i Josefa, ka mbo nijàno tam-pigadrà tao avao Josefa.

Genesisy 39:​1-23; 40:​1-23.



Fanontanea

  • Firy tao Josefa laha fa nandesy ta-Ejipta tany? Ino ty raha niseho laha fa niavy tany ie?
  • Nanino Josefa ro nogadrà?
  • Ino ty asa nampanaòvy an’​i Josefa laha fa tam-pigadrà tany?
  • Ino ty raha nataon’​i Josefa ho ahy mpanday kôpy noho mpanao mofon’​i Farao niarake nogadrà tamine tao reny?
  • Ino ty raha niseho laha fa nafàha tam-pigadrà ao mpanday kôpy iny?

Fanontanea Fanampine

  • Vakio Genesisy 39:​1-23.

    Tamy andron’​i Josefa le mbo tsy nisy lalàna voasoratse nandrara hoe tsy azo atao ty mangalake valin’​olo na mandrànto, fe ino ro nitarike an’​i Josefa hilay valin’​i Potifara iny? (Gen. 2:24; 20:​3; 39:​9)

  • Vakio Genesisy 40:​1-23.

    Mba tantarao kelikele hoe ty nofy mpanday kôpy iny, noho ty fanazavà namean’​i Jehovah an’​i Josefa mikasike raha zay. (Gen. 40:​9-13)

    Ino ty nofy mpanao mofo iny? Hazavao koa ty dikane. (Gen. 40:​16-19)

    Amy fomba manao akore ro anahàfa’​ty mpanompo mahatoky sy malina ty raha nataon’​i Josefa amy andro henany zao? (Gen. 40:​8; Sal. 36:​9; Jaona 17:17; Asa. 17:​2, 3)

    Mety amy Kristiana va ty mankalaza ty andro nahateraha, laha Genesisy 40:20 io ro hentea? (Mpit. 7:​1; Marka 6:​21-28)