Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 6: Anake Lahy Soa Noho Anake Lahy Raty

Tantara 6: Anake Lahy Soa Noho Anake Lahy Raty

HENTEO Kaina noho Abela henany zao. Fa olobé roze. Nanjary mpamboly Kaina. Mamboly voa-maina (lojy, kabaro, tsaramaso, sns.) noho voankazo (manga, papày, kida, sns.) voho tràka kea ie.

Manao fanomeza ho an’Andranahare Kaina noho Abela

Nanjary mpiarake aondry Abela. Teane ty mikarakara anak’​aondry kelikele. Nihabe aondry reny, ka tsy ela Abela le nana aondry maro haràhe.

Nanao fanomeza ho an’​Andranahare Kaina noho Abela ndraike andro zay. Kaina nanday vokatse tami’​ty raha namboléne. Voho Abela nifìly aondry farane ze soa tami’​ty bibine. Nitea-Ndranahare Abela noho ty fanomeza nataone. Fa tsy niteane Kaina noho ty sorone. Hainao va hoe ino ty antone?

Tsy hoe soa mandilatse ty an’​i Kaina ty fanomezan’​i Abela fa, lahilahy soa Abela satria tea an’​i Jehovah noho ty rahalahine ie. Fa Kaina raty say, tsy teane ty rahalahine.

Ka nivòla tamin’​i Kaina Jehovah fa tokone hovàne ty fombane raty. Fe tsy nijànjy ty safàn’​i Jehovah Kaina. Neloke bibike ie satria tea-​Ndranahare mihoatse aze Abela. Nivòla tamin’​i Abela Kaina hoe: ‘Ndao tsika handeha an-tonda any.’ Laha fa roze roe avao ro tany, le novangòan’​i Kaina Abela. Novangòane maré biby Abela ka le nimaty. Tsy raty bibike va raha nataon’​i Kaina zay?

Milay Kaina lafa baka namono Abela

Fe ndra fa nimaty aza Abela le mbo tiaro-Ndranahare avao. Olo soa Abela, ka tsy halinon’​i Jehovah mihitsy ty olo manahake aze. Ka mbo ho avy ty andro hamelòman’​i Jehovah Andranahare an’​i Abela ndraike. Amy fotoa zay le tsy ho maty sasy Abela. Ho afake hiay an-tany eto mandrakizay ie. Tsy soa va ty hahay olo manahake an’​i Abela?

Tsy tean’​i Jehovah ty olo manahake an’​i Kaina. Ka laha fa baka namono an’​i Abela rahalahine Kaina, le nosazì-Ndranahare, ka nalefane tamy tany lavitse ty fianakaviane. Laha fa nandeha nipetrake tamy faritse hafa Kaina, le nangalake raike tami’​ty anabavine ho valine.

Nanan’​anake Kaina noho ty valine laha fa nandeha ty fotoa. Nifanambaly kea ty anake lahy noho ty anak’​ampelan’​i Adama noho Eva, ka le niteraka iaby roze. Tsy ela, le fa nisy olo maro tan-tany etoy. Ndao hianarantsika ty sasane amin-droze.

Genesisy 4:​2-26; 1 Jaona 3:​11, 12; Jaona 11:25.



Fanontanea

  • Ino ty asa nataon’​i Kaina noho Abela?
  • Ino ty fanomeza namean’​i Kaina noho Abela ho an’​i Jehovah?
  • Ino ty antone nitiavan’​i Jehovah ty fanomezan’​i Abela, noho ty tsy nitiavane ty fanomezan’​i Kaina?
  • Olo nanao akore Kaina? Nanao akore ty fomba nananàran’​i Jehovah aze?
  • Olo nanao akore Kaina? Nanao akore ty fomba nananàran’​i Jehovah aze?
  • Ino ty raha nahazo an’​i Kaina laha fa baka namono rahalahine iny ie?

Fanontanea Fanampine

  • Vakio Genesisy 4:​2-26.

    Nanao akore ty fomba nivolànan’​i Jehovah ty loza hahazo an’​i Kaina? (Gen. 4:​7)

    Ino ty nahaìza ty raha tam-pon’​i Kaina tao? (Gen. 4:​9)

    Manao akore ty fahitan’​i Jehovah ty fandatsàha lion’​olo marina? (Gen. 4:10; Isaia 26:​21)

  • Vakio 1 Jaona 3:​11, 12.

    Ino ty antone nampeloke maré an’​i Kaina? Mananatse antsika hanalavitse toetsy manao akore tantaran’​i Kaina io? (Gen. 4:​4, 5; Ohab. 14:30; 28:​22)

    Ndre manohitse an’​i Jehovah aza ty longontsika iaby, le afake matoky noho tsy mivalike ami-Ndranahare avao tsika. Manao akore ty fomba anazavà’​ty Baiboly raha zay? (Sal. 27:10; Matio 10:​21, 22)

  • Vakio Jaona 11:​25.

    Nisy olo nimaty noho’​ty fahamarìna. Ino ty raha nampitamànin’​i Jehovah ho an-droze? (Jaona 5:​24)