Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 1: Nanomboke Namoro ty Raha Iaby Andranahare

Tantara 1: Nanomboke Namoro ty Raha Iaby Andranahare

BAKA ami-Ndranahare iaby ty raha soa ananantsika. Nanao ty masoandro ie mba hahazoantsika hazavà isan’andro, noho vola voho kinta mba hanome hazavà laha fa halike. Nanamboatse ty tany kea Andranahare mba hipetràhantsika.

Fe, tsy ty masoandro, vola, kinta, noho ty tany ro raha namboari-Ndranahare voalohane. Hainao va hoe ino ty namboarine voalohane? Nanamboatse olo manahake aze tseky ie. Tsy hita maso manahake an’Andranahare roze. Anjele ro ikaìha’ty Baiboly aze. Napetra-Ndranahare an-danitse ane miarake amine roze.

Le vatane niavake ty anjele voalohane namboari-Ndranahare. Ie ro Ana-Ndranahare voalohane. Niarake niasa tamy Babane ie. Nanampy an’Andranahare nanamboatse raha maro hafa ie. Nanampy an’Andranahare tamy fanamboara masoandro, vola, kinta noho tanintsika toy kea ie.

Nanao akore ty tany tami’zay? Tamy voalohane le tsy niazo niaìna tan-tany etoy. Tsy nisy raha tetoy, fa riake avao ro nameno tany toy. Fe tea-Ndranahare ty hipetràhan’olo an-tany etoy, ka le nanomboke nanao raha ho antsika ie. Ino ty raha nanòvine?

Voalohane le nila hazavà ty tany. Ka nalefa-Ndranahare an-tany etoy ty hazavà baka amy masoandro. Nataone raha zay, ka nisy ty andro noho ty haly. Bakeo le nampisarahi-Ndranahare tamy riake ty tany.

Manahake sary hitantsika eto, le tsy nisy raha tan-tany etoy tamy voalohane. Tsy nisy folera ndra hazo ndra biby. Tsy nisy fia iaby ndra tan-driake tany aza. Mbo maro ty asa tokone hatao-Ndranahare mba hahasoa ty tany hipetràha’ty biby noho ty olombelo.

Jeremia 10:12; Kolosianina 1:15-17; Genesisy 1:1-10.

Tany tsy misy raha


Fanontanea

  • Baka amin’ia iaby ty raha soa ananantsika. Afake manome ohatse va iha?
  • Ino ty raha noforòni-Ndranahare voalohane?
  • Ino ty antone nampiavake ty anjele voalohane?
  • Nanao akore ty tany tamy voalohane? (Henteo sary io.)
  • Ino ty raha voalohane natao-Ndranahare mba hahafàha’ty olo noho ty biby hiay an-tany etoy?

Fanontanea Fanampine

  • Vakio Jeremia 10:12.

    Ino iaby ty toetsin’i Jehovah hita tamin’ie namoro ty kila raha iaby? (Isa. 40:26; Rom. 11:33)

  • Vakio Kolosianina 1:15-17.

    Ino ty anjara asan’i Jesosy tamy famoròna? Manao akore ty tokone hiheverantsika aze? (Kol. 1:15-17)

  • Vakio Genesisy 1:1-10.

    Ia ty nanamboatse tany toy? (Gen. 1:1)

    Ino ty raha niseho tamy andro famoròna voalohane? (Gen. 1:3-5)

    Mba tantarao ty raha niseho tamy andro faharoa namoròna. (Gen. 1:7, 8)