Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

Tantara 5: Nanomboke Nihasarotse ty Fiaìna

Tantara 5: Nanomboke Nihasarotse ty Fiaìna

NAHITA fahasahiràna maro Adama noho Eva laha fa tsy tamy zariday Edena tao. Nila niasa mafy roze vo nahazo hany. Nanjary fatike ro nitìry nanodidy an-droze fa tsy voankazo soa. Reo ty raha niseho laha fa tsy nanorike ty safà-Ndranahare Adama noho Eva noho tsy ninama tamine sasy.

Miasa mafy Adama noho ty anake lahine

Fe ty raha raty maré mandilatse zay, le nanomboke nimaty Adama noho Eva. Tiaròvo fa, nananatsy an-droze Andranahare hoe, laha mihina amy voa hazo fa nandraràne an-droze iny roze le ho maty. Ka nanomboke nimaty roze tamy andro nihinanan-droze raha iny. Hagegea mihitsy ty tsy nanorìhan-droze ty safàn’​i Jehovah!

Tafara’​ty nandroàha-Ndranahare an’​i Adama noho Eva tsy ho amy zariday Edena tao sasy ro niterake ty anane iabiaby roze. Midika raha zay fa ho antitse noho ho maty iaby kea anane reo.

Laha mba nanorike ty safàn’​i Jehovah moa Adama noho Eva, le mety ho nana fiaìna soa bibike niarake tami’​ty anane roze. Ho afake niay tamim-pahasambàra mandrakizay tan-tany etoy. Tsy ho nisy olo nihantitse noho narary voho maty zao mihitsy.

Tean’​i Jehovah hiay mandrakizay anaty fahasambàra ty olo, ka nampitamà Ie fa hahazo fiaìna soa io roze ndraike andro ane. Tsy ty tany manontolo avao ro ho soa amin’​io, fa ho salama noho ho mpinama soa iaby ty olo sady hilongo soa ami-Ndranahare.

Eva noho anane reo

Fe tsy nama-Ndranahare sasy Eva. Ka laha fa niterake anane reo ie, le nijaly maré noho naharary bibike. Azo antoke fa nitarike fijalea be ho aze ty tsy fanorìhan’​i Eva ty safà-Ndranahare, tsy ekenao va raha zay?

Nanan’​anake lahy noho anak’​ampela maro Adama noho Eva. Kaina ro anara namea ty anake lahin-droze voalohane. Abela ty anara nameane ty anake lahin-droze faharoe. Ino ty raha nahazo an-droze reo? Hainao va?

Genesisy 3:​16-23; 4:​1, 2; Apokalypsy 21:​3, 4.



Fanontanea

  • Nanao akore ty fiaìnan’​i Adama noho Eva laha fa tsy tamy zariday Edena tao?
  • Ino ty raha nahazo an’​i Adama noho Eva voalohane. Ino ty antone?
  • Nanino ty anan’​i Adama noho Eva ro nihaantitse noho maty?
  • Ho nanao akore ty fiaìnan’​i Adama noho Eva noho ty anan-droze laha nanorike ty safàn’​i Jehovah roze?
  • Ino ty fijalea nahazo an’​i Eva laha fa tsy nanorike ty safà-Ndranahare ie?
  • Ia ty anara’​ty anake lahin’​i Adama noho Eva roe voalohane?
  • Ia iaby ajà sasane amy sary eo reo?

Fanontanea Fanampine

  • Vakio Genesisy 3:​16-23 noho 4:​1, 2.

    Nanao akore ty fiaìnan’​i Adama laha fa niozòni-Ndranahare ty tany? (Gen. 3:​17-19; Rom. 8:​20, 22)

    Midika hoe “Ay” ty anara hoe Eva. Ino ty antone mampety anara io? (Gen. 3:​20)

    Mbo nisoa fanahy tamin’​i Adama noho Eva avao Jehovah ndre fa nanota tamine aza roze. Tamy fomba manao akore ro nampisehoan’​i Jehovah raha zay? (Gen. 3:​7, 21)

  • Vakio Apokalypsy 21:​3, 4.

    Ino iaby ty “raha taloha” fa tsy lininao sasy ty hangalà aze?