• Midary anao va Ndranahary?

  • Ino iaby ty toetsiny? Ia ty anarany?

  • Azonao atao va ty mifandramby soa aminy?

1, 2. Manino tsika ro mila manontany?

ARAKINAO va hoe manao akory ty ajà lafa ta hanontany? Vo mianatsy mivola ty ankamaroany, le fa tea manontany. Manenty anao ie, le manontany ohatsy hoe: Manino ty lanitsy ro bolebolè? Manino ty basia ro mamirapiratsy? Ia ty nampianatsy ty voro hifioky? Mety hiezaky hamaly iha, fe tsy mora ty manao raha zay. Ndre fa marina ty valiny nameanao azy, le mety mbo hanontany avao ie hoe: Fa manino kay?

2 Tsy ty ajà avao ro tea manontany. Mbo manao raha zay tsika ndre fa mihabe. Mila manontany tsika, lafa tsy mahita lala, na lafa ta hiala loza, na lafa misy raha teantsika ho hay. Fe maro ty olo ro tsy tea manontany sasy. Ndre ty fanontanea bevata aza, le tsy anontaneany. Mety teany ho hay avao ty valiny, fe tsy ta hila raha zay sasy ie.

3. Manino ty olo maro ro tsy ta hila ty valy fanontanea bevata reo sasy?

3 Eritsereto fanontanea amy fono boky toy, na amy voalohan-tsafà  ao iny, na raiky amy fanomboha toko toy eo io. Sisany avao amy fanontanea bevata mila dinihinao soa reo. Ndre zay aza, maro ty olo ro tsy ta hila ty valy fanontanea reo sasy. Ino ty antony? Voavaly amy Baiboly ao va fanontanea reo? Misy mieritseritsy hoe sarotsy marè ty mahita ty valy fanontanea reo. Ty sisany mieritseritsy fa mahamenatsy ty manontany. Ao koa ty mieritseritsy fa ty mpitariky fivavaha avao ro mahay mamaly raha reo. Manao akory ty hevitsinao?

4, 5. Ino iaby ty fanontanea bevata mety ho avy an-tsainao ao? Manino tsika ro tokony hila ty valy fanontanea reo?

4 Misy fanontanea bevata maro amy fiainantsika. Azo inoa fa teanao ho hay ty valiny. Sa tsy zay? Mety fa nanontany ty vatanao vasa iha hoe: ‘Ino ty dika namorona ty olombelo? Le fa ho zao avao va ty fiainantsika, ateraky, le antitsy, le bakeo maty? Manao akory Ndranahary zao? Soa dinihy fanontanea reo. Ka mieny iha, zisiky hahaizanao ty valiny marina noho mahafa-po. Ho zao ty safà mpampianatsy malaza atao hoe Jesosy Kristy zay: “Mangataha avao, le hamea nareo. Milà avao, le hahita nareo. Paipaiho avao le hovohà nareo.”—Matio 7:7.

5 Ho afa-po vatany iha, laha tsy mieny fa “mila” valy fanontanea bevata reo avao. (Ohabolana 2:1-5) Ndre ino ndre ino nivolany taminao, le misy ty valiny, sady afaky mahita raha zay iha amy Baiboly ao. Tsy sarotsy hay ty valiny, sady hahavy antsika ho falifaly noho hitamà raha soa. Hahavy anao hana fiaina soa koa raha zay manomboky henanizao. Toy misy fanontanea raiky manahira ty sain’olo maro. Ndao hodinihintsika.

TSY MIDARY NOHO TSY MIFERINAY ANTSIKA VA NDRANAHARY?

6. Ino ty mahavy ty olo hieritseritsy fa tsy midary ty fijaleantsika Ndranahary?

6 Maro ty mihevitsy fa marina raha zay. Mieritseritsy rozy  hoe: ‘Ho nanao ho zao va ty fiaina laha midary antsika Ndranahary? Feno aly amy tany toy, maro ty olo mifankalay, maro koa ty mahantra. Marary noho mijaly koa tsika. Misy koa ty longontsika maty. Zay ro mahavy ty olo hivola hoe: ‘Laha midary antsika noho manenty ty raha raty mahazo antsika Ndranahary, tsy ho nisakanany tsy hahazo antsika va raha reo?’

7. a) Ino ty raha volany mpitariky fivavaha reo, ka mahavy ty olo hieritseritsy fa tsy miferinay olo Ndranahary? b) Ino marina ro ampianary ty Baiboly mikasiky ty raha raty mahazo antsika?

7 Ty mpitariky fivavaha mihintsy aza kindraiky ro mahavy ty olo hieritseritsy fa tsy miferinay olo Ndranahary. Nanino tsika ro mivola raha zay? Satria lafa misy loza, le volanin-drozy fa zay ro sitrapo Ndranahary. Sahala ta hivola rozy hoe, Ndranahary ro mahavy loza reo. Marina va zay? Ino marina ro ampianary ty Baiboly? Mamaly Jakoba 1:13 hoe: “Lafa misy fitsapà, le ao tsy hisy hivola hoe: ‘Fitsapà baka amy Ndranahary toy.’ Satria Ndranahary tsy azo tsapà amy raha raty, noho tsy mitsapa ndre ia ndre ia amy raha raty koa.” Midika zay fa tsy Ndranahary mihintsy ro mahavy ty raha raty iaby hitanao. (Vakio Joba 34:10-12.) Misy avao aloha ty raha raty engany hiseho. Fe samby hafa ty hoe manenga raha raiky hiseho, noho ty hoe mahavy raha zay.

8, 9. a) Hazavao amy ohatsy ty maha samby hafa raha retoa: Manenga ty raha raty hisy noho ty hoe mahavy raha zay? b) Manino ro tsy mety ty manome tsiny Ndranahary, ndre engàny hanao raha raty ty olo?

8 Toy misy ohatsy. Nisy lahilahy raiky, hendry noho soa fanahy. Niaraky nipetraky tamin-drozy morovaly anakilahin-drozy fa be raiky zay. Tsy nanoriky ty safà babany noho reniny sasy ie, ka niala tan-trano ao. Tsy nisaka azy ty babany. Nanao hadalà ie, ka tra-draha. Babany va ro nahavy raha zay? Aha. (Lioka 15:11-13) Manahaky zay koa Ndranahary. Tsy sakanany ty olo lafa mifily hanao raha raty. Fe tsy ie ro mahavy ty raha manahira azo baka amy raha zay. Ka tsy  mety mihintsy ty hivolana fa Ndranahary ro mahavy ty fahasahirana mahazo ty olo.

9 Mpamoro hendry noho mahery ie, ka misy dikany kanao engany hanao raha raty ty olo. Tsy voatery hambarany antsika ty mahavy azy hanao raha zay. Fe teany tsika, ka nambarany antsika ty dika raha zay. Ho hitantsika amy Toko faha-11 ao fanazavà zay. Fe afaky matoky tsika fa tsy Ndranahary ro mahavy raha manahira antsika reo. Ie raiky avao aza ro tamanintsika hanafaky raha reo!—Isaia 33:2.

10. Manino ro atokisantsika, fa hafaha Ndranahary ty raha manahira niazo baka amy raha raty nataon’olo?

10 Masy koa Ndranahary. (Isaia 6:3) Midika zay fa malio ie. Tsy misy raha raty aminy ao ndre raiky. Azontsika atokisa ie. Tsy manahaky zay ty olombelo satria mety hiova ho raty. Ndre ty manam-pahefà farany ze tsy manahy aza, le tsy mana hery hanarena ty raha raty nataon’olo. Tsy ho zay Ndranahary, satria ie ro mana hery faratampony. Hainy afaha ty raha manahira niazo baka amy raha raty nataon’olo, sady hataony vatany raha zay. Haravany tsy hisy sasy ty raha raty!—Vakio Salamo 37:9-11.

MANAO AKORY TY FAHITÀ NDRANAHARY TY FIJALEA MAHAZO ANTSIKA?

11. a) Manao akory ty fahità Ndranahary ty tsy rariny? b) Manao akory ty fahità Ndranahary ty fijaleanao?

11 Ka manao akory ty fahità Ndranahary ty raha misy an-tany etoy noho ty raha miseho amy fiainanao? Ampianary ty Baiboly antsika fa “tea rariny” ie. (Salamo 37:28) Misy dikany aminy ty raha soa noho ty raha raty hitany. Halany iaby lafa atao tsy rariny. Mivola ty Baiboly fa “nalahelo ty fony”, lafa nifeno raha raty tan-tany etoy taloha. (Genesisy 6:5, 6) Tsy niova Ndranahary. (Malakia 3:6) Halany ty mahita fijalea misy an-tany etoy zisiky henanizao. Hejiny koa ty mahita olo mijaly. Volany ty Baiboly fa midary antsika ie.—Vakio 1 Petera 5:7.

Ampianary ty Baiboly fa Jehovah ro mpamoro kila raha iaby, sady be fitiava ie

12, 13. a) Manino tsika ro mana fitiava? Mahavy anao hanao akory ty fitiava lafa mahita olo mijaly iha? b) Manino iha ro afaky matoky fa hanafaky ty fijalea noho ty tsy rariny an-tany etoy Ndranahary?

 12 Manino tsika ro matoky fa tsy tea Ndranahary ty mahita fijalea? Misy porofo hafa toy: Ampianary ty Baiboly fa natao manahaky tarehy Ndranahary ty olombelo. (Genesisy 1:26) Zay mahavy antsika hana toetsy soa, satria mana toetsy soa Ndranahary. Manao akory iha lafa mahita olo mijaly? Ferinesanao ie, sa tsy zay? Laha iha aza mahay miferinay olo manahaky zay, vo handraky va Ndranahary!

13 Ty fitiava ro toetsy soa marè ananan’olombelo. Anahafan-drozy a Ndranahary raha zay. Ampianary ty Baiboly fa “fitiava Ndranahary.” (1 Jaona 4:8) Mana fitiava tsika satria manahaky azy. Hanosiky anao hanafaky ty fijalea noho ty tsy rariny hitanao ty fitiava, sa tsy zay? Tsy ho nataonao va raha zay laha nana hery hanaova raha zay iha? Eka ty valiny! Afaky matoky koa iha, fa hampijano ty fijalea noho ty tsy rariny Ndranahary. Tsy manonofy na mitamà raha tsy misy tsika, lafa namaky voalohan-tsafà amy boky toy ato. Azo atokisa ty raha ampitamany Ndranahary! Fe mila mianatsy marerè mikasiky azy iha, mba hinoanao raha zay.

TEA NDRANAHARY HAHAY AZY IHA

Laha misy olo teanao hahay anao, tsy hovolaninao aminy va ty anaranao? Volany Jehovah amintsika amy Baiboly ao ty anarany

14. Ia ty anara Ndranahary? Manino tsika ro mila mampiasa anara io?

14 Ino ty hataonao laha misy olo teanao hahay anao? Hambaranao azy ty anaranao, sa tsy zay? Mana anara va  Ndranahary? Fivavaha maro ro mivola fa “Ndranahary” na “Tompo” ty anarany. Fe tsy anarany raha reo, fa anaram-boninahitsy manahaky hoe “mpanjaka” na “prezidà.” Ampianary ty Baiboly fa mana anaram-boninahitsy maro Ndranahary. Ohatsy hoe “Ndranahary” noho “Tompo.” Fe volany ty Baiboly koa fa mana anara ie, Jehovah ty anarany. Mivola ty Salamo 83:18 hoe: “Iha raiky avao, azy mana anara hoe Jehovah iny, ro Farany Anabo amy tany toy iaby.” Laha tsy misy anara io ty Baibolinao, le soa laha henteanao amy Fanazavà Fanampiny hoe “Ty Fampiasà ty Anara Ndranahary Noho ty Dikany” ty nahavy raha zay. Mimpolimpoly inarivo mahery amy  Baiboly nisoraty tana taloha marè tany ty anara Ndranahary. Hita baka amy zay, fa teany hahay noho hampiasa anarany io iha. Teany hahay soa azy iha, ka mampiasa ty Baiboly ie mba hanambarany aminao ty mikasiky azy.

15. Ino ty dika ty anara hoe Jehovah?

15 Misy dikany bevata ty anara finily Ndranahary ho azy. Ho zao ty dika anara hoe Jehovah: Tanterahiny iaby ze kila raha nampitamaniny noho ze raha iaby teany hatao. * Tsy misy afaky manday anara io, laha tsy ie raiky avao. Misy raha maro mampiavaky Jehovah. Ino iaby raha rezay?

16, 17. Manino Jehovah ro kaihy amy anaram-boninahitsy retoa: a) “Farany Ze Mahery”? b) “Mpanjaka ty zisiky farany”? d) “Mpamoro”?

 16 Nihitantsika tamy Salamo 83:18 tao fa Jehovah ‘raiky avao ro Farany Anabo.’ Ie raiky avao koa ro kaihy hoe Farany Ze Mahery. Mivola ty Apokalypsy 15:3 hoe: “Bevata sady mahatseriky ty asanao Jehovah Ndranahary, azy Farany Ze Mahery iny. Mahity noho marina ty lalanao, azy Mpanjaka ty zisiky farany iny.” Kaihy amy anaram-boninahitsy hoe Farany Ze Mahery Jehovah, satria tsy misy mahery mandilatsy azy, ie ro mana hery faratampony. Kaihy koa ie hoe “Mpanjaka ty zisiky farany” satria ie raiky avao ro fa nisy bakany bakany zay. Mivola ty Salamo 90:2 hoe: “Fa Ndranahary Iha bakany bakany zay, le ho zisiky farany.” Mahatseriky vatany raha zay, sa tsy zay?

17 Miavaky koa Jehovah satria ie raiky avao ro Mpamoro. Mivola ty Apokalypsy 4:11 hoe: “Maeva handramby voninahitsy noho haja voho hery iha Jehovah, iha ro Ndranaharinay, satria iha ro namoro kila raha iaby, sady ty sitraponao ro nampisy noho namoròna raha reo.” Tsy ho nisy ty anjely an-danitsy any, ty basia maro anabo eny, ty voankazo mihanto am-potony eny, ty fia anaty riaky noho ranomamy any, voho ty raha hafa, laha tsy Jehovah ro namoro azy!

AFAKY MIFANDRAMBY SOA AMY JEHOVAH VA IHA?

18. Manino ty olo sisany ro mieritseritsy fa tsy ho afaky mifandramby soa amy Ndranahary rozy? Fe ino ro ampianary ty Baiboly?

18 Somary misalasala ty olo sisany, lafa mahay ty toetsy Jehovah. Matahotsy rozy hoe mitanjaky pilasy anabo marè Ndranahary, ka tsy ho afaky hifandramby soa aminy rozy, sady tsy hodareany. Marina va raha zay? Mifanohitsy amy zay ro ampianary ty Baiboly. Volaniny ao fa “laha ty marina, le tsy lavitsy antsika kiraidraiky” Jehovah. (Asan’ny Apostoly 17:27) Ty Baiboly mihintsy aza ro mampirisiky antsika  hoe: “Mamonjea Ndranahary, le hamonjy anareo ie.”—Jakoba 4:8.

19. a) Manao akory ty hamonjeanao Ndranahary? Ino ty raha soa ho azo baka amy raha zay? b) Ino amy toetsy Ndranahary reo ro teanao marè?

19 Manao akory ty hamonjeanao Ndranahary? Tohizo avao tse raha fa ataonao henanizao io, tsy ino zay fa ty fianara mikasiky Ndranahary. Nivola Jesosy hoe: “Mba hahavy an-drozy ho velo zisiky farany, le ilàn-drozy ty mianatsy hahay mikasiky anao, azy Ndranahary marina raiky avao iny noho Jesosy Kristy, azy nirahinao iny.” (Jaona 17:3) Ampianary ty Baiboly fa “ho velo zisiky farany” ze olo mazoto mianatsy mikasiky Jehovah noho Jesosy! Fa nivolany taloha teo koa fa “fitiava Ndranahary.” (1 Jaona 4:16) Mana toetsy soa sady maninto koa ie. Mivola ohatsy ty Baiboly fa “Ndranahary mamindra fo noho soa fanahy, tsy mora meloky, atsiky hasoa fanahy feno fitiava sady tea fahamarina marè” Jehovah. (Eksodosy 34:6) “Soa toetsy noho parè hanenga hadisoa” ie. (Salamo 86:5) Manam-pahareta ie. (2 Petera 3:9) Tsy mivaliky koa ie. (Apokalypsy 15:4) Laha tohizanao avao ty famakianao Baiboly, le ho hainao hoe manao akory ty nampisehoa Jehovah toetsiny reo noho ty toetsiny maro hafa koa.

20-22. a) Tsy afaky mahita Jehovah tsika, midika va zay fa tsy afaky mifandramby aminy tsika? Hazavao. b) Mety hampirisiky anao hanao ino ty olo sisany, fe ino ty tokony hataonao?

20 Tsy afaky mahita Ndranahary iha, satria fanahy ie. (Jaona 1:18; 4:24; 1 Timoty 1:17) Fe lafa mianatsy mikasiky azy amy Baiboly ao iha, le haneky fa misy vatany ie. Haneky manahaky mpanoratsy salamo raiky zay koa iha hoe, soa Ndranahary. (Salamo 27:4; Romanina 1:20) Lafa mihamitombo ty fahaizanao mikasiky azy, le hekenao fa misy vatany ie. Hitombo koa ty fitiavanao azy sady hihamariny azy iha.

Mbo mandilatsy ty fitiava ty baba ty anany, ro itiava Babantsika an-danitsy any iny antsika

21 Hazava aminao lafa afarafara ao ty mahavy ty Baiboly hampianatsy antsika hoe, sahala Babantsika Jehovah. (Matio  6:9) Manahaky baba tea anaky io ie. Teany hana fiaina farany ze soa tsika, fa tsy hoe nameany ay avao. (Salamo 36:9) Ampianary ty Baiboly koa, fa afaky ho nama Jehovah ty olombelo. (Jakoba 2:23) Mba diniho avao tse moa hoe, afaky ho nama azy Mpamoro kila raha iaby iny iha!

22 Lafa mandeha soa ty fianaranao Baiboly, le mety hisy olo hampirisiky anao tsy hianatsy raha io sasy. Matahotsy vasa rozy hoe hiala amy ty finoanao iha. Fe ka engà hisy hisaka anao tsy hifandramby amy nama farany ze soa iny.

23, 24. a) Manino iha ro mila manontany avao lafa mianatsy? b) Ino ro hohazavà amy toko manaraky ao?

23 Mety tsy hazava soa aminao ty raha sisany, amy voalohany. Mety ho sarotsarotsy aminao ty hanontany, fe ka atao mahamenatsy anao raha zay. Nivola Jesosy hoe, soa laha miambany manahaky ty ajà tsika. (Matio 18:2-4) Fa haintsika fa tea manontany ty ajà. Tea Ndranahary hahita ty valy ty fanontaneanao iha. Mivola ty Baiboly, fa soa ty mahita olo mazoto mianatsy mikasiky Ndranahary. Dinihin-drozy soa baka amy Baiboly ao hoe marina vatany va ty raha ianarany.—Vakio Asan’ny Apostoly 17:11.

24 Laha mazoto mianatsy Baiboly iha, le hahay soa mikasiky Jehovah. Tsy mitovy amy boky hafa ty Baiboly. Fa manino? Hanazava raha zay ty toko manaraky.

^ feh. 15 Misy fanazavà maromaro mikasiky ty dika anara Ndranahary noho ty fanonona azy, amy Fanazavà Fanampiny hoe “Ty Fampiasà ty Anara Ndranahary Noho ty Dikany”.