• Manao akory ty fanaova batisa ty Kristiana?

  • Ino iaby ty raha tokony hataonao vo azo atao batisa iha?

  • Ino ty raha tokony hataon’olo manoka ty vatany ho ahy Ndranahary?

  • Misy dikany manoka ty batisa. Ino raha zay?

1. Nanino ty tandapa etiopianina raiky ro nangataky hatao batisa?

“NDROA misy rano, ka ino ty misaka ahy tsy hatao batisa?” hoy ty tandapa etiopianina raiky tamy taonjato voalohany. Nisy Kristiana raiky kaihy hoe Filipo nanaporofo taminy fa Jesosy ro Mesia nampitamàny. Nidosiky ty  fo Etiopianina iny ty raha nianarany tamy Soratsy Masy ao, ka nahavy azy hanao raha. Naniry hatao batisa ie!—Asan’ny Apostoly 8:26-36.

2. Manino iha ro tokony hieritseritsy soa mikasiky ty batisa?

2 Lafa nianaranao soa niaraky tamy ty Vavolombelo Jehovah toko taloha teo rey, le mety hanontany ty vatanao iha hoe: ‘Ino ty misaka ahy tsy hatao batisa?’ Nanjary hainao fa mampitamà fiana zisiky farany amy Paradisa ao ty Baiboly. (Lioka 23:43; Apokalypsy 21:3, 4) Nianaranao koa hoe manao akory ty olo lafa maty, sady hainao fa mbo ho velomy ndraiky rozy. (Mpitoriteny 9:5; Jaona 5:28, 29) Fa mamonjy fivoria ty Vavolombelo Jehovah vasa iha, le fa hitanao ty raha ataon-drozy mba hanaraha ty fivavaha marina. (Jaona 13:35) Azo inoa koa fa manomboky mifandramby amy Jehovah Ndranahary iha sady zay ro tena vatan-draha ndre eo ty raha sisany.

3. a) Ino ty didy namea Jesosy ty mpianatsiny? b) Manao akory ty fanaova batisa?

3 Manao akory ty ampisehoanao fa ta hanompo Ndranahary iha? Hoy Jesosy tamy ty mpianatsiny: “Mandehana, anovo mpianatsy ty olo amy firenena iaby any, ka anovo batisa.” (Matio 28:19) Nanome modely mikasiky raha zay Jesosy, lafa natao batisa anaty rano. Tsy namitsipitsiha rano ie, na natetè tan-dohany teo avao ty rano. (Matio 3:16) Ty safà hoe “manao batisa” le baka amy safà grika hoe “mampijobo.” Midika zay, fa ajobo na alentiky anaty rano ao ty Kristiana lafa atao batisa.

4. Mampiseho ino ty batisa anaty rano?

4 Takỳ amy ze olo ta hifandramby amy Jehovah Ndranahary ty batisa anaty rano. Lafa atao batisa iha, le mampiseho amin’olo iaby fa ta hanompo Ndranahary, sady mahafalifaly anao ty manao ty sitrapony. (Salamo 40:7, 8) Fe misy raha tsy maintsy ataonao, vo azo atao batisa iha.

 ILÀ TY FAHAIZA NOHO TY FINOA

5. a) Ino ty dinga voalohany tsy maintsy ataon’olo, vo azo atao batisa ie? b) Manino ro ilà vatany ty famonjea fivoria tsy tampaky?

5 Fa vitanao ty dinga voalohany. Manino tsika ro mivola raha zay? Satria fa mianatsy hahay Jehovah Ndranahary noho Jesosy Kristy iha. Mety amy fianara Baiboly tsy tampaky vasa ro anaovanao raha zay. (Vakio Jaona 17:3.) Fe mbo maro ty raha azo ianara. Tokony ho ‘feno fahaiza marina soa ty sitrapo [Ndranahary]’ ty Kristiana. (Kolosianina 1:9) Hanampy anao hahavita raha zay ty fivoria atao ty Vavolombelo Jehovah. Ilà vatany ty famonjea raha rey. (Hebreo 10:24, 25) Hitombo ty fahaizanao Ndranahary lafa mivory tsy tampaky iha.

Mila mianatsy ty fahamarina baka amy Safà Ndranahary ao iha vo azo atao batisa

6. Ino ty raha mila hainao fara fahakeliny, vo azo atao batisa iha?

6 Fe tsy midika zay hoe tsy maintsy hainao iaby ty raha iaby amy Baiboly ao, vo azo atao batisa iha. Fa nahay raha maromaro tandapa etiopianina iny, fe mbo nila nampea ie hahay andinin-teny sisany amy Soratsy Masy ao. (Asan’ny Apostoly 8:30, 31) Mbo maro koa ty raha tokony hianaranao, satria tsy mety tampitsy ty fianara mikasiky Ndranahary. (Mpitoriteny 3:11) Fe, fara fahakeliny, le mila mahay noho maneky ty fampianara fototsy amy Baiboly ao iha, vo azo atao batisa. (Hebreo 5:12) Tafilitsy amy zay ty fahamarina mikasiky ty maty, noho ty maha vatan-draha ty anara Ndranahary noho ty Fanjakàny.

7. Tokony hahavy anao hanao akory ty fianara Baiboly?

7 Fe tsy ampy ty fahaiza, satria “laha tsy amy finoa, le tsy misy raha azo atao hampifalifalea Jehovah.” (Hebreo 11:6) Volany ty Baiboly, fa lafa nahare ty hafatsy nitorỳ ty Kristiana ty olo sisany ta Korinto tany, le ‘nanjary mpino, ka natao batisa.’ (Asan’ny Apostoly 18:8) Mitovy amy zay koa fa lafa mianatsy Baiboly iha, le hanjary hino vatany hoe Safà Ndranahary ty Baiboly. Hanampy anao hino ty raha ampitamàny Ndranahary raha zay, sady hahavy anao  hatòky, fa afaky manavotsy anao ty soro natao Jesosy.—Josoa 23:14; Asan’ny Apostoly 4:12; 2 Timoty 3:16, 17.

MIRESAKY TY FAHAMARINA AMIN’OLO HAFA

8. Ino ty hahavy anao haniry hiresaky mikasiky ty raha nianaranao?

8 Ho sarotsy aminao ty tsy hiresaky amin’olo ty raha nianaranao, lafa mitombo ty finoa am-ponao ao. (Jeremia 20:9) Haniry hiresaky mikasiky Ndranahary noho ty raha teany hatao iha.—Vakio 2 Korintianina 4:13.

Tokony hanosiky anao hiresaky amin’olo ty raha inoanao ty finoanao

9, 10. a) Ia tse ro azonao iresaha ty fahamarina amy Baiboly ao? b) Ino ty tokony hataonao laha teanao ty hitory miaraky amy Vavolombelo Jehovah?

9 Azonao iresaha ty fahamarina amy Baiboly ao tse ty longonao, ty namanao, ty olo mipetraky marìny anareo mbeny, noho ty mpiaraky miasa aminao. Fe diniho soa ty resaky ataonao tsy no hampeloky olo. Mety ta hitory miaraky amy Vavolombelo Jehovah iha, lafa mandeha ty fotoa. Ka misalasala mivola any raha zay amin’olo mampianatsy Baiboly anao. Laha hita fa fenonao ty fepetra takỳ amy mpitory, le hisy anti-panahy roe hiresaky aminao miaraky amin’olo mampianatsy Baiboly anao.

10 Hifankazatsy aminao ty anti-panahy sisany mpiaraky ty aondry Ndranahary amy zay. (Asan’ny Apostoly 20:28; 1 Petera 5:2, 3) Laha hitan-drozy fa azonao soa ty fampianara fototsy amy Baiboly ao sady inoanao, noho orihinao ty torolala Ndranahary, bakeo mbo ta ho Vavolombelo Jehovah koa iha, le hivola aminao rozy hoe afaky mitory iha. Hanjary mpitory tsy vita batisa iha amy zay.

11. Ino iaby ty fiovà tokony hataon’olo sisany, vo afaky hitory miaraky amy Vavolombelo Jehovah ie?

11 Fe, mety hisy raha tokony hovànao amy ty fiainanao noho ty fahazaranao, vo azo ekè ho mpitory iha. Mety ho tafilitsy amy zay ty raha sisany fataonao fe navoninao. Midika zay, fa mila miala amy fahotà bevata iha, manahaky  fimamoa, fampiasà raha maha ango, noho fandaisam-bata maloto, vo afaky ho mpitory tsy vita batisa.—Vakio 1 Korintianina 6:9, 10; Galatianina 5:19-21.

MIBEBAKY NOHO MIOVA

12. Manino ro ilà ty mibebaky?

12 Misy raha hafa tsy maintsy ataonao koa, vo azo atao batisa iha. Hoy ty apostoly Petera: “Mibebaha, ka mimpolia hamonoa ty fahotanareo.” (Asan’ny Apostoly 3:19) Ty hoe mibebaky, le maneny vatany amy ty raha raty natao. Tokony hibebaky ty olo naloto fandaisam-bata. Fe mila mibebaky koa, ndre ty olo azo volany hoe soa fandaisam-bata aza. Ino ty antony? Satria mpanota iaby tsika, ka mila fanengà hadisoa. (Romanina 3:23; 5:12) Tsy nahay ty sitrapo Ndranahary iha taloha ty nianaranao Baiboly. Ka le azo antoky va fa nifanaraky soa amy ty sitrapony ty fiainanao iaby? Hita baka amy zay, fa ilà ty mibebaky.

13. Manao akory miova zao?

13 Tsy maintsy ‘mimpoly’, na miova ty olo raiky lafa baka nibebaky. Tsy ampy ty maneny avao, fa mila manova ty fiainanao iha, sady ho tapa-kevitsy hanao raha soa avao manomboky henanizao. Tsy maintsy mibebaky noho miova iha, aloha ty hanaova batisa anao.

MANAO FANOKANAM-BATA

14. Ino ty raha bevata tsy maintsy hataonao aloha ty batisa?

14 Misy raha raiky bevata koa tsy maintsy atao aloha ty batisa. Tsy maintsy manoka ty vatanao ho ahy Jehovah Ndranahary iha.

Nanoka ty vatanao ho ahy Ndranahary tamy vavaky va iha?

15, 16. Ino ty dika ty hoe manokam-bata ho ahy Ndranahary, ino ro mahavy ty olo hanao raha zay?

15 Ty hoe manokam-bata ho ahy Jehovah, le midika hoe manao vavaky baka am-po, ka mampitamà azy fa ie raiky avao ro hotompoenao zisiky farany. (Deoteronomia 6:15)  Ino ty mahavy ty olo hanao raha zay? Ndao atao hoe misy lahilahy raiky manomboky miaraky amy ampela raiky. Manjary miha teany avao ampela io lafa hainy soa ty mikasiky azy sady hitany ty toetsy soa ananany. Hahatseriky va laha mangataky azy ho valiny ie? Marina fa hitombo ty andraikitsiny lafa hanambaly ie, fe parè hanao dinga bevata io ie satria tea azy.

16 Lafa mahay any Jehovah noho tea azy koa iha, le tsy heferanao ty fanompoa azy sady hafoinao ho azy ty raha iaby. Tsy maintsy “mandà ty vatany” ty olo iaby ta ho mpianatsy Jesosy Kristy, Anaky Ndranahary. (Marka 8:34) Mandà ty vatantsika tsika, lafa tsy engantsika hisaka antsika tsy hanoriky ty safà Ndranahary ty raha teantsika noho ty raha kendrentsika. Midika zay, fa ty fanaova ty sitrapo Ndranahary ro vatan-draha marè tsy maintsy kendrenao amy ty fiainanao, vo azo atao batisa iha.—Vakio 1 Petera 4:2.

RESEO TY TAHOTSY

17. Ino ty mahavy ty olo sisany hisalasala hanoka ty vatany ho ahy Ndranahary?

17 Misy misalasala hanoka ty vatany ho ahy Jehovah, satria matahotsy hanao dinga bevata io. Mety hatahotsy rozy tsy no hodìny Ndranahary, laha manjary Kristiana vita fanokanam-bata. Ka aleony tsy manoka ty vatany ho ahy Ndranahary, satria matahotsy ie tsy no tsy hahavita hiay mifanaraky amy raha zay, ka handiso fanantenà azy.

18. Ino ty hanosiky anao hanoka ty vatanao ho ahy Jehovah?

18 Lafa mianatsy ho tea Jehovah iha, le voatosiky hanoka ty vatanao ho azy noho hanao ze farany vitanao mba hiay mifanaraky amy raha zay. (Mpitoriteny 5:4) Azo antoky fa haniry ‘handeha maeva Jehovah iha mba ho teany vatany’, lafa baka nanoka ty vatanao ho azy. (Kolosianina 1:10) Tsy hieritseritsy mihintsy iha hoe sarotsy marè ty  manao ty sitrapo Jehovah satria tea azy iha. Azo antoky fa haneky safà apostoly Jaona toy iha hoe: “Ho zao fitiava a Ndranahary zao, le ty hanorihantsika ty didiny. Fe tsy mavesatsy ty didiny.”—1 Jaona 5:3.

19. Manino iha ro tsy tokony hatahotsy hanoka ty vatanao ho ahy Ndranahary?

19 Tsy voatery ho lavorary iha, vo afaky manoka ty vatanao ho ahy Ndranahary. Hainy hoe zisiky aia avao ty ho vitanao, sady tsy mitamà anao hanao mandilatsy any zay mihintsy ie. (Salamo 103:14) Teany ho tafavoaky iha, ka hanampy anao ie. (Vakio Isaia 41:10.) Matokisa fa ‘hatao Jehovah mandeha soa ty fiainanao’, laha matoky azy amy fonao iaby iha.—Ohabolana 3:5, 6.

 ATORÒ AMY ALALA TY BATISA FA NANOKA TY VATANAO IHA.

20. Manino ro tokony ataonao hain’olo hafa fa nanoka ty vatanao ho ahy Jehovah iha?

20 Mety hanampy anao hanoka ty vatanao ho ahy Jehovah ty fandiniha soa ty raha nianarantsika teo. Tsy maintsy ‘manao fanambarà an-kavoria mba hahazoa fanavota’ koa ze olo iaby tea a Ndranahary vatany. (Romanina 10:10) Manao akory ty hanaovanao raha zay?

Lafa atao batisa iha, le sahala hoe maty, na hoe tampitsy eo ty fiainanao taloha, noho velo ndraiky mba hanao ty sitrapo Ndranahary

21, 22. Manao akory ty anaovanao “fanambarà an-kavoria” ty finoanao?

 21 Ambarao amy anti-panahy mpandrindra amy fiangona misy anao ao fa ta hatao batisa iha. Hisy anti-panahy hiaraky midiniky aminao fanontanea maromaro mikasiky ty fampianara fototsy amy Baiboly ao. Laha ekè anti-panahy reo fa mahafeno fepetra takỳ amin’olo azo atao batisa iha, le hivola aminao rozy fa azo atao batisa iha amy fivoriambe manaraky. * Matetiky ro misy lahateny manazava mikasiky batisa amy fivoriambe rey. Bakeo, misy fanontanea roe ampamalea azy hatao batisa reo, mba hanaovan-drozy “fanambarà an-kavoria” ty finoan-drozy.

22 Ty batisa ro ahaizan’olo iaby fa nanoka ty vatanao ho ahy Ndranahary iha, sady nanjary Vavolombelo Jehovah. Alentiky anaty rano ao ty olo atao batisa, mba ho hitan’olo iaby fa nanoka ty vatany ho ahy Jehovah ie.

TY DIKA TY BATISANAO

23. Ino ty dika ty hoe atao batisa “amy anara ty Baba, noho amy anara ty Anaky, voho amy anara ty fanahy masy”?

23 Nivola Jesosy fa hatao batisa “amy anara ty Baba, noho amy anara ty Anaky, voho amy anara ty fanahy masy” ty mpianatsiny. (Matio 28:19) Midika zay, fa maneky ty fahefà Jehovah Ndranahary noho Jesosy Kristy ze olo atao batisa. (Salamo 83:18; Matio 28:18) Ekeny koa ty asany fanahy masy Ndranahary, na ty hery ampiasàny.—Galatianina 5:22, 23; 2 Petera 1:21.

24, 25. a) Ino ty dika ty batisa? b) Ino ty fanontanea tokony hovalea?

24 Fe misy dikany bevata ty batisa, fa tsy hoe fampijobona anaty rano avao. Lafa alentiky anaty rano ao iha, le  sahala hoe maty, na hoe tampitsy eo ty fiainanao taloha. Fa lafa aboaky bakao iha, le midika zay fa velo mba hanao ty sitrapo Ndranahary. Tiarovo koa fa Jehovah ro nanokananao ty vatanao, fa tsy asa, na olo, na fikambana, na raha kendrè hafa. Manomboky mifandramby aminy manahaky ty ataon’olo mpinama marè io iha, lafa manoka ty vatanao ho azy noho atao batisa—Ohabolana 25:14.

25 Fe, tsy antoky hahazoa fanavota ty batisa. Hoy ty apostoly Paoly: “Miezaha marè avao miaraky amy tahotsy noho hitikitiky, mba hahazoanareo fanavota.” (Filipianina 2:12) Vo fanombohany avao ty batisa. Ka manao akory zao ty ijanonanao amy fitiava Ndranahary ao? Hamaly fanontanea zay ty toko farany.

^ feh. 21 Misy batisa avao amy fivoriambe atao ty Vavolombelo Jehovah.