Hanenty ty anatiny ao

Ho amy loha hevitsy any

Vavolombelo Jehovah

Hifily safà Vezo

 FANAZAVÀ FANAMPINY

Ty Marina Mikasiky ty Baba, ty Anaky, voho ty Fanahy Masy

Ty Marina Mikasiky ty Baba, ty Anaky, voho ty Fanahy Masy

MIVOLA ty olo mino Ndranahary telo fe raiky, fa Ndranahary raiky avao ty Baba noho ty Anaky voho ty Fanahy Masy. Mitovy iaby rozy telo reo hoy rozy, samby farany ze mahery sady samby tsy nana fanomboha. Araky fampianara io, le Ndranahary ty Baba, Ndranahary ty Anaky, Ndranahary ty Fanahy Masy, fe raiky avao Ndranahary.

 Maro amin’olo mino raha io ro mivola fa tsy mahay manazava azy. Fe mieritseritsy rozy fa mampianatsy raha zay ty Baiboly. Kanefa tsy hita amy Baiboly ao mihintsy ty safà hoe “Ndranahary telo fe raiky.” Sa misy hevitsy manamarina raha io ty ao? Mba hamalea fanontanea io, le hohenteantsika tse ty andinin-teny andesy ty olo hanaporofoa fa telo fe raiky Ndranahary.

“NDRANAHARY TY SAFÀ”

Hoy Jaona 1:1: “Tamy voalohany ty Safà, le ty Safà tamy Ndranahary tao, le Ndranahary ty Safà.” (Fandikan-teny Protestanta) Natoro apostoly Jaona mazava soa, amy toko io ao avao, fa Jesosy “Safà” io. (Jaona 1:14) Satria kaihy hoe Ndranahary ty Safà, le misy mieritseritsy fa ‘Ndranahary raiky avao ty Anaky noho ty Baba.’

Tiarovo fa nisoraty tamy safà grika tse ty boky Jaona, zay vo nadika tamy safà hafa. Fe mpandika teny maromaro ro tsy nampiasa ty safà hoe “Ndranahary ty Safà.” Ino ty antony? Satria nahay safà grika nanorata ty Baiboly rozy, ka nieritseritsy fa tokony ho hafa ty nandikà ty hoe “Ndranahary ty Safà.” Manao akory ty tokony handikà azy? Retoa misy ohatsy vitsivitsy baka amy fandikan-teny anglisy: “Manahaky Ndranahary ty Logos [Safà].” (Fandikan-teny Vaovao ty Baiboly) “ndranahary ty Safà.” (Testamenta VaovaoDikan-teny Nohasoavy) “Niaraky tamy Ndranahary ty Safà, sady nitovy karaza taminy.” (Ty Testamenta Vaovao ty Mpandika Teny) Tsy Ndranahary ty Safà, laha hentea dikan-teny reo. * Kaihy hoe “ndranahary” (“n” ana-tsoratsy) ie, satria mana pilasy anabo amy ty raha namboary Jehovah. Midika hoe “mahery” ty safà hoe “ndranahary” eto.

MILÀ FANAZAVÀ FANAMPINY

Tsy mahay safà grika nanorata ty Baiboly ty ankamaroan’olo. Ka manao akory ty ahaiza ty raha tea apostoly Jaona hovolany? Eritsereto hoe manazava lesona ty mpampianatsy raiky. Fe tsy mitovy ty fahazoa ty mpianatsiny fanazavà iny. Manao akory  zao ty ahaizan-drozy ty marina? Afaky mangataky fanazavà maromaro amy mpampianatsy iny rozy. Hazava soa amin-drozy lesona iny amy zay. Mba hahazoa ty hevitsy amy Jaona 1:1 ao, le azonao atao koa ty mila fanazavà fanampiny mikasiky ty pilasy tanjaha Jesosy, amy Filazantsara Jaona ao. Hanampy anao hahazo ty hevitsy marina raha zay.

Diniho, ohatsy, ty nisoraty Jaona amy toko 1 andininy 18: “Tsy nisy nahita Ndranahary [Farany ze mahery] ndre mbia ndre mbia.” Fe nisy nahita Jesosy, Anaky Ndranahary, satria hoy Jaona: “Nanjary nofotsy ty safà [Jesosy] ka nipetraky tamintsika; le hitanay ty voninahitsiny.” (Jaona 1:14, Fandikan-teny Protestanta) Ka manino ro volany fa raiky avao Ndranahary Farany ze mahery iny noho ty Anaky? Mivola koa Jaona fa “tamy Ndranahary tao” ty Safà, na “niaraky tamy Ndranahary”, araky ty Fandikan-teny Tontolo Vaovao. Manao akory ty hahavitan’olo raiky miaraky amin’olo hafa, laha mbo ie avao olo iarahany io? Navaha Jesosy soa koa ty vatany noho Babany an-danitsy any iny, araky ty Jaona 17:3. Nikaihiny hoe “azy Ndranahary marina raiky avao iny” ty Babany. Ho zao ty namintina Jaona raha iaby rezay, lafa nanampitsy ty Filazantsarany ie: “Nisoraty raha reo mba hinoanareo fa Jesosy ro Kristy Ana Ndranahary.” (Jaona 20:31) Henteo fa tsy kaihy hoe Ndranahary Jesosy eo, fa Ana Ndranahary. Manampy antsika hahay ty raha volany amy Jaona 1:1 ao fanazavà fanampiny baka amy Filazantsara Jaona ao zay. Azo volany hoe ‘ndranahary’ Jesosy na ty Safà, satria mana pilasy anabo ie, fe tsy ie, azy Ndranahary Farany Ze Mahery iny.

HENTEO VASA MARINA TY FANAZAVÀ AZONAO

Eritsereto ndraiky ohatsy teo iny. Ndao hatao hoe misy mpianatsy misalasala, ndre fa nahazo fanazavà fanampiny. Ino ty raha azon-drozy atao? Afaky mangataky fanazavà fanampiny amy mpampianatsy raiky hafa rozy. Mety tsy hisalasala sasy ty ankamaroan-drozy laha manamarina ty fanazavà baka amy mpampianatsy voalohany iny, mpampianatsy faharoe io. Ka laha mbo tsy azonao antoky ty raha tea Jaona hovolàny mikasiky ty fifandrambesa Jesosy noho azy Ndranahary Farany Ze Mahery iny, le azonao atao koa ty mila fanazavà fanampiny  amin’olo hafa nanoratsy Baiboly. Diniho, ohatsy, ty raha nisoraty Matio. Nampoliny safà Jesosy retoa, lafa niresaky mikasiky ty fitampera tontolo toy ie: “Fa tsy misy mahay ty amy andro noho lera zay, ndre ty anjely an-danitsy any, ndre ty Anaky, laha tsy ty Baba avao.” (Matio 24:36) Manino safà reo ro manamarina fa tsy Jesosy ro Ndranahary Farany Ze Mahery?

Nivola Jesosy fa mahay raha maro mandilatsy ty Anaky ty Baba. Ho nitovy ty raha hay Jesosy noho ty Babany, laha mbo ie avao ro Ndranahary Farany Ze Mahery. Hita baka amy zay fa tsy mitovy ty Anaky noho ty Baba. Fe misy mivola hoe: ‘Ka Jesosy anè sady Ndranahary no olo! Olo zao ie tamy ie nivola an’io.’ Fe ndre ataontsika hoe marina raha zay, manao akory koa ty amy ty fanahy masy? Laha mitovy amy Ndranahary Baba, fanahy io, manino Jesosy ro tsy nivola hoe hay ty fanahy ty raha hay ty Baba?

Hahay andinin-teny maromaro mikasiky foto-kevitsy io iha, arakaraky ty ianaranao Baiboly. Manaporofo ty fahamarina mikasiky ty Baba noho ty Anaky voho ty fanahy masy andinin-teny rey.—Salamo 90:2; Asan’ny Apostoly 7:55; Kolosianina 1:15.

^ feh. 3 Laha mila fanazavà maromaro mikasiky ty Jaona 1:1 iha, le henteo Ny Tilikambo Fiambenana 1 Novambra 2008, amy lahatsoratsy hoe “Iza Marina ny ‘Teny’?” (malagasy), naboaky ty Vavolombelo Jehovah.