Qullaawu Maxaafi mayyaanno?

 Dihasiissannonke. Niwu Kaatoliki Insaykilopiidiya Maganu Israeelete dagara uyino seera xawisanni togo yaanno: “Babbaxxitino xagge Qullaawu Maxaafiti xawissannonte gede, Magano halaalunni magansidhannori bashshonni misilla dihoroonsidhanno.” Aante noo qummeeshshuwa yitannore wodanchi:

•   “Gordohono ikko baattote, baattote woroonni wayi giddo noorichinnino ikkiro magansiꞌrate yitine ayee misileno seekkidhinoonte. Kaphu magannara kumbuultinoonte; insano magansidhinoonte. Ani hinaasaancho Maganootina.” (Fulo 20:4, 5) Maganu ‘woꞌmu wodaninkenni’ magansiꞌnammosira hasiꞌranno daafira, misillate, sooddiyyete, hawultete, bonce seekkinoonni magannara, woy malaattate ayirrinye uyinummoro woy insa magansiꞌnummoro dihagiidhanno.

•   “Misillano galataꞌya beeqqitara dihasiꞌreemmo.” (Isayaasi 42:8) Maganu misilla horoonsiꞌne magansiꞌnannisita dibaxanno. Israeelete giddo gamu siitu misile seekkidhe Magano magansidhara woꞌnaaltu yannara, isi insa jawa “cubbo” loossinota coyiꞌrino.—Fulo 32:7-9.

•   “Maganu mannu hayyonninna ogimmanni culka, birranna kincho bonce seekkinoonni misile lawanno yine heda dihasiissannonke.” (Soqqamaasinete Looso 17:29) Kiristaanu, “birranna kincho bonce seekkinoonni misile” horoonsidhanno daga gedeeha diꞌꞌikkino; hatteentenni Qullaawu Maxaafi yaannonte gede, insa heedhannohu “ammanatenniiti ikkinnina laꞌꞌatenni diꞌꞌikkino.”—2 Qorontoosi 5:7.

•   “Kaphu magannawiinni xeertidhe.” (1 Yohaannisi 5:21) Israeelete dagarano ikko Kiristaanaho uyinoonni hajajo leellishshannonte gede, Magano magansiꞌrate misillanna malaatta horoonsiꞌra soꞌro ikkitinota Qullaawu Maxaafi hige hige kulanno.