Maganu mannu oosora, huuccattotenni isi ledo hasaawatenna giddonsata isira kuꞌlate dandoo uyinonsa; tini baxxitino eltooti. Masaalaanchu Daawiti togo yee huucciꞌrino: “Mannu baalu . . . atewa daanno; atino huuccattonsa macciishshatto.” (Far. 65:2, 3) Ikkina Maganu huuccattonke macciishshanno gedenna atootesi aannonke gede hiittoonni huucciꞌra hasiissannonke?

Hojjinke huucciꞌneemmo huuccatto Maganoho giddonketa gudinse hasaaphineemmo faro fantannonke. (Faarso 62:8) Woꞌmanka Dandaanno Magani woꞌma giddonni huucciꞌneemmo huuccatto baxanno.

Maganoho duuchu suusu suꞌmi noosiha ikkirono, umisihu mittu suꞌmi calla noosi. Isi togo yiino: “Ani Yihowaati. Suꞌmiya konneeti.” (Isayaasi 42:8, NW) Yihowa yinanni suꞌmi, Qullaawa Borro giddo 7,000 meddi yaanno bayicho no. Batinye masaalaano Magano suꞌmasi gante huuccidhino. Abirihaami, “Yihowa, ballo xaano coyiꞌreemmo” yiino. (Kalaqama 18:30, NW) Ninkeno huuccatto assiꞌneemmo woyite, Yihowa yinanniha Maganu suꞌma ganne huucciꞌra hasiissannonke.

Coyiꞌneemmo qaali ikkihano ikkiro, Maganoho hedonkenna hasattonke leeltannosi. Qaalisi togo yee jawaachishannonke: “Maganu manna [dimallaadanno]; . . . Aye gosano ikkiro Maganu waajjannosihanna dancha loosannoha baxanno.”—Soqqamaasinete Looso 10:34, 35.

Ikkirono, Maganu aanno atoote afiꞌrate huucciꞌratenni sainore assa hasiissannonke. Aananno birxichira, maa assa hasiissannonkero laꞌneemmo.