Diru kiiro lowo miliyoone ikkannoha Qullaawa Maxaafanna Qullaawu Maxaafi aana xintantino borro attamme mannaho tuqinseemmo. Alamete deerrinni sinu biironna borro attammanni maashine worranni bayicho minneemmo. Lowo kume ikkitanno songuwa Mangistete Addaraashe yinannihu biifadunna mereerimu magansiˈnanni bayichira gamba yitanno. Konne baala assate woxe afiˈneemmohu hiikkiinniiti?

Loonseemmo loosira woxe afiˈneemmohu meessi fajjonni fushshinanni fushshonniiti. (2 Qorontoosi 9:7) Tonaasettu lamalayina honsunni fultinoti tenne metseeteti layinki ittime togo yitanno: “‘Tsiyoonita Agarooshshu Shae’ [hakkawaro tenne metseete suˈmaati] YIHOWA umisi irkisannota ammanneemmo; hakko daafira, Agarooshshu Shae manna woxe dihuuccidhanno, hattono dieegantanno.” Xaano ikkiro tini hedonke disoorrantino.

Mannu uminsanni fushshanno fushsho sinu biironke sonkanni, woy mitte mittente Mangistete Addaraashenke giddo noote fushshote saaxinera worranni. Ikkollana kayinni asaraate, woy mutsuwaate gamba diassineemmo; hattono soqqanshotenna borronkera woxe dixaˈmineemmo. Qoleno sabbankoommo daafira, songote giddo rosiinseemmohura woy magansiˈnanni mine mina kaaˈlinoommo daafira woxe dibaantanninke. Ee, Yesuusi, “Mulla adhitinoonniha mulla uuyye” yiino. (Maatewoosi 10:8) Addi addite sinu biironkeranna qara biironkera soqqantannori hattono Yihowa Farciˈraasinehu Aliidi Bisi damooza baantannikkihu ammaˈnote maamari giddo soqqantanno miillaati.

“Yihowa Farciˈraasine wole baalanka loosonsa fajjotenni loossannonte gede, ammaˈnonsarano woxe fushshitannohu uminsa fajjonniiti; mittu mittunku manchi mageeshshi woxe fushshannoronna mamoote mamoote fushshannoro umisi hedanno.”—Awuroppunnihu Kalaqamu Qoosso Yoo Mini, 2011

Fushshinanni woxe kalaqamu dano iillitinonsare kaaˈlateno horoonsiˈneemmo. Hundi Kiristaani qarru giddo noorira noonsare hagiirrunni uyino. (Roomu Sokka 15:26). Hatteente gede, ninkeno dano iillitinonsa roduuwira galtannonna magansidhanno mine gatamarre, hattono sagale, uddidhannorenna xagga uyine kaaˈlineemmonsa.