Qara amadowa massie

Cinaanchu doorshiwa massie

Furchonniwa massie

Yihowa Farci'raasine

Sidaamu Afoo

Agarooshshu Shae—Xiinxallote Ittime  |  Maaja 2017

Aliisa

Insaneeto Uminsa Fajjonni Shiqishshino—Turkete

Insaneeto Uminsa Fajjonni Shiqishshino—Turkete

UMI XIBBI DIRI Kiristaani, Maganu Mangisteha ‘Dancha Duduwo’ dandaaminsa deerrinni batinyu mannira duduwate baasa sharramino. (Mat. 24:14) Mitu isinni wole gobbuwa nafa haˈrino. Lawishshaho soqqamaasinchu Phaawuloosi misiyoone ikke soqqami yannara, xa Turke yinanni gobbara noo qooxeessuwa haˈre soqqamino. * Mitu 2,000 diri gedensaanni, 2014nni Turkete baxxinoha soqqanshote zamacha assinoonni. Konne zamacha qixxeessinoonnihu mayiraati? Konni zamachi yannara ayeoo soqqantino?

“KOYE MAA AFIDHINOONNI?”

Turkete gobbara noo halashshaano 2,800 saˈanno; hatte gobbara heeˈranno manni kayinni 79 miliyooneeti. Togo yaa mittu halashshaanchira 28,000 manni iillanno yaate. Tini kiiro tenne gobbara heedhanno halashshaano shiima manna calla hasaawisa dandiitannota leellishshanno. Baxxino zamacha qixxeessinoonnihu shiima yanna giddo dandaami deerrinni lowo mannira sabbakateeti. Konni zamachira 550 ikkitannoti Turkete Afoo coyidhanno halashshaano addi addi gobbanni dagge, hatte gobbara heedhanno halashshaano ledo soqqantino. Tini mayi guma abbituyya?

Lowo mannira farciˈnoonni. Istaambuli yinanniwa nooti mitte songo togo yite borreessitino: “Mannu ninke laˈˈanno wote togo yee xaˈmannonke: ‘Koye gambooshshu nooˈne? Marriwa baalawa Yihowa Farciˈraasine no!’” Izmiri katamira noo songono togo yite borreessitino: “Kaameelu uurrannowa loosanno manchi, mittu songote cimeessiwa shiqqi yee togo yee xaˈmino: ‘Koye maa afidhinoonni? Looso albinni roorsitine loosa hanaffinooni?’” Ee, kuni zamachi diteeˈlinoho.

Isteefeni

Wole gobbanni konni zamachira soqqamate hadhinori hagiidhite sabbakkino. Denimaarketenni haˈrinohu Isteefeni togo yiino: “Yihoware macciishshe egenninokki mannira barru baala farciˈroommo. Tini, mannu Yihowa suˈma afanno gede assanni noommo yee hedeemmo gede assitinoe.” Faransayetenni haˈrinohu Jiini-Deevidi togo yee borreessino: “Mitte doogora calla haammata saate soqqammoommo. Tini hagiirsiissannote! Rooru manni Yihowa Farciˈraasine diegennino. Haˈne sabbankoommote mitte mittente qaera heeˈranno manna hasaawinse hattono viidiyubbanke giddo mitte fanne leellinshe borro elloommo yaa dandiineemmo.”

Jiini-Deevidi (mereeroho)

 Zamachunni soqqaminohu 550 manni, lame lamala giddo 60,000 borro elino! Ee, konni zamachi yannara lowo mannira farciˈnoonni.

Roduuwu diinaggaabbe soqqantanno gede assino. Zamachu hatte gobba roduuwi albinni roore soqqamate kakkaˈanno gede assino. Insa giddo batinyu woˈma yanna soqqansho eate heddino. Turkete baxxino zamacha assinihunni aane noohu 12 aganni giddo woˈma yanna suwisaano kiiro xibbunni 24 anga lexxitino.

Shereni

Hakko zamachira hadhe soqqantinori, gobbuwansa higgu gedensaanni nafa albinni roore diinaggaabbe soqqama hanaffinota coyidhino. Jarmanetenni hadhinoti Shereni togo yitino: “Turkete heedhanno roduuwi sabbakate fultinokki wote farciˈra diwaajjitanno. Ani kayinni sabbakate fuloommakki wote farciˈra waajjeemma. Ikkollana zamachu, hatte gobbara heedhanno roduuwinna lowo huuccatto kaaˈlonni albaanni assa waajjeemma coye assa dandoomma. Baaburunni bushshu giddoonni hige haˈreemma wote nafa, manna hasaawisanninna tiraaktuwa elanni haˈreemma! Xa albi gede diwaajjishannoe.”

Yohaanesi

Jarmanetenni haˈrinohu Yohaanesi togo yiino: “Soqqanshoˈyanni danchare rosoommo. Turkete roduuwi dandaaminsa deerrinni lowo mannira sabbaka baasa hasidhanno. Insa afidhu faro baalantenni sabbakkanno. Anino Jarmane higeemmo wote hatto assate murciˈrummo. Xa albinni rooru mannira farciˈreemmo.”

Zeyinepi

Faransayetenni hadhinoti Zeyinepi togo yitino: “Kuni zamachi soqqameemma gara woyyeessiˈrate kaaˈlinoe. Hattono, albinni roore waajjeemmakki gedenna Yihowa addaxxeemma gede kaaˈlinoe.”

Halashshaano mimmitinsawa shiqqanno gede assino. Babbaxxitino gobbanni dayino roduuwi mereero noo baxillinna mittimma hambannikkite. Aleenni qummi assinihu Jiini-Deevidi ‘roduuwu wosina adhitannore ikkitinota laˈinota’ coyiˈrino. Isi lede togo yiino: “Insa ninke jaallansanna maatensa miilla gede assite haadhinonke. Insa mininsara anga fante haadhe wosinsitinonke. Ninke alamete doyichora noohu roduuwu maamara ikkinoommota afoommo; qoleno borruwanke giddo tenne daafira duucha hige nabbawoommo. Xa kayinni umiˈya heeshshonni laoommo. Tini Yihowa manni wido ikkaˈya albinni roore naadeemmo gede assitinoe; tenne dancha qoosso uyinoehura [Yihowa] galaxxeemmosi.”

Kileeri (mereeroho)

 Faransayetenni hadhinoti Kileeri yinanni rodoo togo yitino: “Ninke Denimaarkete, Faransayete, Jarmanete woy Turkete gobbare ikkinummorono mitte maate gede ikkinoommo. Maganu gobbuwate danna baala jawu feyaanchinni fee huninohu gedeeti.”

Isteefani (mereeroho)

Faransayetenni hadhinoti Isteefanino togo yitino: “Hakku zamachi, mittimma afiˈneemmo gede assannohu bude woy coyiˈneemmo afoo ikkikkinni, baalunku Yihowa banxeemmore ikkanke ikkitinota huwanteemmo gede assino.”

GEEDDANNO HORO UYINO

Zamachu yannara wole gobbanni daye soqqamihu batinyu manni, Turkete noohu lowo loosira kaaˈlamate hatte gobba galagale daye soqqamate heda hanafino. Insa giddo kiiro ajinokki manni hatte gobba higino. Sabbakanno manni roore hasiisannowa hadhinori kuri roduuwi galantannireeti.

Hanni mittu gaxarete qooxeessiˈra heedhannota 25 halashshaano noo gaamo lawishsha assine adhino. Lowo diro tenne gaamo giddo mittu cimeessi callu soqqamanni keeshshino. Ikkollana, 2015nni lewu roduuwi Jarmanetenninna Neezerilaandetenni insawa daggu yannara, halashshaano mageeshshi geeshsha hagiidhitinoro heda dandiitinanni!

SABBAKKANNORI ROORE HASIISSANNOWA HAˈRE SOQQAMA

Sabbakkannori roore hasiissannowa hadhe soqqamate yite, mite yanna geeshsha Turke hadhino roduuwi hakko hiittoo heeshsho heedhino? Sabbakkannori roore hasiissannowa haˈne soqqammanni wote coyi ayirranno woti heeˈrannoha ikkirono, togoo soqqansho lowo geeshsha kiissanno. Hanni mitu roduuwi yiinore laˈno:

Federiko

Ispeenetenni haˈrinohu 40 diri balla ikkannosihu Federiko yinannihu adhino rodii togo yiino: “Agura marareemmo gede assannoha lowoha maalaamittete coye afiˈra hoogaˈya hobbi ruxxi yeemmokki gede kaaˈlitino; hakko daafira roore hasiissanno coyi aana illachisha dandeemmo.” Isi togoo soqqansho daafira mayyiino? Togo yiino: “Lowo geeshsha danchate! Mannaho Yihoware rosiisate yitine wole gobba hadhinanni wote, kiˈneneeto Yihowa angara sayissine uyitinanni heedhinoonni yaate. Qoleno, Yihowa towaatannoˈneta albinni roore huwattinanni.”

Radii

 Neezerilaandetenni haˈrinohu 50 diri balla ikkannosihu Radii yinannihu adhino rodiino, sabbakkannori lowo geeshsha hasiissannowa haˈre Yihowa daafira macciishshe egenninokki mannira rosiisa baasa hagiirsiissannosita coyiˈrino. Isi lede togo yiino: “Mannu halaale macciishshanno wote hagiidhanno gara laˈˈa lowo geeshsha hagiirsiissanno.”

Saasha

Jarmanetenni haˈrinohu 40 diri balla ikkannosihu Saasha yinannihu adhino rodii togo yiino: “Soqqansho fuleemmo kiiro, halaale macciishshe egenninokki manna xaadeemmo. Togoo manni Yihowa egennanno gede kaaˈla lowo geeshsha hagiirsiissanno.”

Astuuko

Jappaanetenni hadhinoti Astuuko yinanniti 30 diro saˈˈannoseti mine assidhino rodoo togo yitino: “Biˈre Armagedooni rahe daara halcheemmo. Turke haˈrumma kawa kayinni, Yihowa cince sammi yiinotera galaxxeemmasi. Yihowa alamete qooxeessiˈra loonsanniha wongeelu looso loosiisanno gara laumma kiiro, isiwa albinni roore shiqa hasiˈreemma.”

Ruusiyunni hadhinoti 30 diri balla ikkannoseti Aliisa yinanni rodoo togo yitino: “Konni garinni Yihowara soqqamaˈya danchummasi baala qamase laeemma gede kaaˈlitinoe.” (Far. 34:8) Ise ledde togo yitino: “Yihowa Annaˈya calla ikkikkinni, addi addi fonqoli iillie yannara albinni roore egennoomma Jaalaˈyaati. Heeshshoˈya hagiirru, danchu woˈnaalshinna lowo atooti woˈminota ikkitino!”

IRSHA “ILLEˈNENNI LAˈE”

Turkete assinoonnihu baxxino zamachi, hatte gobbara heeˈrannohu lowo manni dancha duduwo macciishshanno faro fanino. Ikkirono, sabbanke egenninoonnikkihu lowo qooxeessi xaano noolla. Sabbakate looso kaaˈlate yee Turke haˈranno manni Yihoware macciishshe egenninokki manninni barru baala xaadanno. Ati hattoo qooxeessiˈra soqqama hasiˈratto? Hatto ikkiro, irsha ‘illekkinni laˈˈatto’ gede, hattono ‘gidu laalinotanna gamba assate iillinota’ buuxatto gede koyinseemmohe. (Yoh. 4:35) ‘Gidu gamba assate iille’ noowa wolewa kaaˈla dandaatto ikka? Hatto ikkiro, tennera kaaˈlannohere assate mitore biddi assiˈra hanafa dandaatto. Togo assatto wote tenne deˈooti: Albinni roore soqqamatenna dancha duduwo “gobbate qacce geeshsha” duduwate assattori taalle nookki atoote afiˈratto gede assannohe!—Soq. 1:8.

^ GUFO 2 “Dancha Baatto Lai” (Ingilizete Afoo) yitanno biroshere qool. 32-33 lai.