Qullaawu Maxaafi tana daannohu wolu ammaˈnote maxaafi dino. Qoleno, konni maxaafi geeshsha batinyu manni xaa geeshsha ammanansara xinta asse horoonsiˈrinohu wolu maxaafi dino. Qoleno, Qullaawu Maxaafi geeshsha xiinxallinoonnihunna woffi assate woˈnaalloonnihu wolu maxaafi dino.

Lawishshaho, mite fullahaasine yannankera noota addi addita Qullaawu Maxaafi tiro, hundi borruwa aaninni garunni ditirroonni yite huluullantanno. Mittu ammaˈnote daafira xiinxallanno fullahaanchi togo yiino: “Hundi borro garunni tirroonni yine ammana didandiineemmo. Hundi borro aaninni galchinoonniti angankera noo borro soˈro woˈmitinotenna taje leellishshanno garinni tenne borro giddo roore hunda angatenni borreessinihunni lowo sani sai gedensaanni qixxaabbinotenna babbaxxitinote.”

Wolu manni kayinni albi ammaˈnonsanni kainohunni Qullaawu Maxaafi gara ikkasi huluullamanno. Lawishshaho, alba Fayizaalira Kiristaana ikkitinokki maatesi Qullaawu Maxaafi qullaawa ikkirono soorramino yite rosiissinosi. Isi togo yiino: “Konni daafira mannu ane ledo Qullaawu Maxaafire kayise hasaawa hasiˈranno wote, insa yaannori didirrannoe.” Isi hakka waro, “Insa uminsara hundihu Qullaawu Maxaafi dinonsa; hattono, Qullaawu Maxaafi soorramino!” yee hedannota coyiˈrino.

Ikkina, Qullaawu Maxaafi soorramasi woy soorrama hoogasi ate heeshsho ledo xaado afidhinoyya? Hanni aante noo xaˈmuwa hedi: Qullaawu Maxaafi giddo nooti albillittete yannare kultannoti sheshifachishshanno hexxo, hundite Qullaawa Borro giddo nooronna teˈee afittokki, tini hexxo woˈmitanno yite hedattoni? (Roomu Sokka 15:4) Qoleno, yannankera noohu Qullaawu Maxaafi mannu loosino soˈrore calla kulannoha ikkoommero, giddosi noo seera looso, maatenna ammanakki lainohunni mitto doorsha doodhatto yannara harunsattoni?

Mite hunditi qullaawa borro maxaaffa baˈinoha ikkirono, heewisiise laˈˈate kaaˈlitannoti hundite aaninni galchine qixxeessinoonni borruwanna lowo kume ikkitannoti angatenni borreessinoonniti Qullaawa Borro noonke. Tini angatenni borreessinoonniti Qullaawa Borro tattaˈe baˈukkinni gattinohu, hattono mannu hunatenna giddose noo sokka soorrate woˈnaalanni heeˈreenna baˈukkinni gattinohu hiittoonniiti? Tini borro baˈukkinni gatase, yannankera noohu Qullaawu Maxaafi garaho yite ammanatto gede assitannohehu hiittoonniiti? Kuriuu xaˈmuwa dawaro afiˈrate aante noota Qullaawu Maxaafi baikkinni gatino gara kultanno xagge nabbawi.