DOONI yinannihu Kanaadaho heeˈrannohu Yihowa Farciˈraasinchi, mine afiˈrinokkihu gobba galanno mannira farciˈrate woˈnaalanno. Togoo manni giddo mittu Piteriiti; Dooni isi daafira togo yiino: “Doogote galannohu mine afiˈrinokkihu Piteri yinanni manchi geeshsha sona baino manna afe diegennoommo. Isi bushu akati noosiho; qoleno manna shiqqo diaannoho. Mannu iso kaaˈlate assinore lowore giwino.” Dooni kayinni 14 diro saˈanno yanna giddo babbaxxitino yannara konne doogote galanno mancho ceeˈmikkinni kaaˈlate woˈnaalino.

Mitto barra Piteri Dooni togo yee xaˈmino: “Mayira daafuratto? Wolu manni anewa dishiqanno. Ati anera mayira shetatto?” Dooni Piteri kaaˈlate sase qummeeshsha hayyotenni horoonsiˈrino. Umo, isi Piteri Maganoho suˈmu noosita afinoronna teˈee xaˈme, Faarso 83:18 nabbawanno gede assi. Hakkiinni aanche isi Piterira hedannohu mayiraatiro leellishate, “Kaaliiqi [‘Yihowa’, NW] suˈma woshshannohu baalu gatanno” yitannota Roomu Sokka 10:13, 14 nabbawanno gede assi. Jeefote, Dooni Maatewoosi 9:36 nabbawe kae, Piteri umisi nabbawanno gede assi. Qummeeshshu togo yaanno: “[Yesuusi] allaalaanchu nookki geˈreewi gede ikke qarramenna gara hawe noo manna afe marari.” Tenne nabbawe kaiti Piteri illete hindiiddo abbe togo yee xaˈmi: “Ani hakko geˈreewi wido ikkeemmo?”

Piteri mito coye biddi assiˈra hanafi. Isi biso hayishshiˈrenna ereeda meexxe, Dooni uyinosi uduunne uddiˈri. Piteri hakkuyi gedensa albisi gede doofaara agurino.

Piteri barru barrunkunni tuncu yiinosire borreesse amadanno. Isi alba borreessannori hexxo mudhinota leellishannoreeti; muli barra borreessannori kayinni baxxinoho. Borreessino coyi giddo togo yaannohu no: “Maganoho suˈmu noosita afoommohu techooti. Xaate huuccatto assiˈreemmo wote, Yihowawa huucciˈra dandeemmo. Suˈmasi afa lowo geeshsha hagiirsiissannote. Dooni, Yihowa huucciˈreemmo yannanna huucciˈreemmo coyi baxiha ikkirono,  ayewoteno macciishshannoeha jaalaˈya ikka dandaannota kulinoe.”

Piteri jeefote borreessinori roduuwisira borreessinoho. Isi togo yiino:

“Techo diseyinoe. Geedhimma amaddinoeha lawinoe. Techo barri anera goofimarchu barra ikkiro nafa, Gannatete jaaliˈya [Dooni] ledo xaadeemmota afoommo. Tenne borro nabbabbinanni heedhinoonniha ikkiro, ani lubbote dinoommo. Madaarshiˈyawa wolu manniwiinni baxxino mancho laˈiniro, isi ledo hasaabbe; konne shiima gordu dani kuuli maxaafa nabbabbe ballo. * Kuni maxaafi jaaliˈya ledo Gannatete galagale xaadeemmota kulanno. Tenne woˈmunni woˈma ammaneemmo. Rodiiˈne, Piteri.”

Piteri reyi yannara rodoosi Uumi madaarshisi gedensaanni togo yitino: “Lamu diri albaanni Piterinni xaadoomma. Lowo diri giddo isi alba xaweenna laoommahu hakko barraati. Isi muushshi nafa yiino.” Ise Doonira togo yitino: “Kuni maxaafi rodiiˈya wodanira coinohu baxxino maxaafa ikkinohuraati; hakko daafira anino nabbaweemma.” Qoleno, Uumi muli diro qixxeessinoonniha Qullaawu Maxaafi Addinta Mayyee Rosiisanno? yaanno maxaafa Yihowa Farciˈraasincho ledo xiinxallate sumuu yitino.

Ninkeno manna aana agurre giddoyidi ayimma laˈˈa dandiineemmo; insara baxille leellishanna ceeˈminummokkinni kaaˈla dandiineemmo. (1 Xim. 2:3, 4) Hatto assineemmoha ikkiro, Piteri gede mannu illera busha lawannoha ikkirono dancha wodana afiˈrino manna kaaˈla dandiineemmo. ‘Wodana laˈˈanno’ Magani, dancha wodana afiˈrino manni giddo halaalu gumi lophanno gede assanno.—1 Sam. 16:7; Yoh. 6:44.

^ GUFO 7 Isi hatto yiinohu albaanni adhinoha, Hegere Heeshshowa Massanno Halaale yaannoha Qullaawa Maxaafa xiinxallate horoonsiˈnanni maxaafa kulateeti. Yihowa Farciˈraasine qixxeessitinoha konne maxaafa xa attama agurroonni.