Qara amadowa massie

Cinaanchu doorshiwa massie

Furchonniwa massie

Yihowa Farci'raasine

Sidaamu Afoo

Agarooshshu Shae  |  Kiiro 3 2017

Yannantenni fanne hasaawa lowo geeshsha hasiissanno

Mininke Manni Buuto Dhiwamanno Wote

Mininke Manni Buuto Dhiwamanno Wote

DOORIINI minaannise Weseli 54 dirihu heeˈreenna surrete muje dhibbi noosita kullita lowo geeshsha massino. * Hakimootu isi lubbote heeˈrannohu boode agana calla ikkinota kultinosi. Dooriini togo yitino: “Macciishshoommari ammanate qarrisinoe. Boode lamala geeshsha kade amadeemmari bainoe. Kuni coyi ninkera ikkikkinni wolu mannira iillinori gede asse hedoomma. Tini dihedoommate.”

Togoori iillinoseti Dooriini calla diˈˈikkitino; tini dadillissannote. Buutote dhibbi aye manchono aye yannarano amadara dandaanno. Lowo manni buuto dhiwaminoha mininsa manna dhiwansiisanno; tini hagiirsiissannote. Togoo manna dhiwansiisa kayinni shota diˈˈikkitino. Maatete miilla buuto dhiwaminoha mininsa manna sheshifachishatenna towaatate maa assa dandiitanno? Dhiwansiissannori dhibbunni kainohunni macciishshamannonsare dandiite saˈˈate kaaˈlannonsari maati? Dhiwamino manchi reyanno yanna gambissanno wote mayi ikkara dandaanno? Hanni balanxe, xaa yannara buuto dhiwamino manna dhiwansiisa qarrissannota ikkitinohu mayiraatiro laˈno.

XAA YANNARA NOO QARRA

Hikkiminnu sayinse mannu xiwamanni heeˈrenni reyannokki gede assitino. Xibbu diri albaanni, lophitino gobbuwara nafa mannu mereerimunni heeˈranno diri lowo geeshsha shiimaho. Mannu hakkawaro shiimu dhibbinni woy danotenni reyanno. Akimete mini halaˈlinokki daafira, rooru manni manna dhiwansiisiˈrannohu minensaati; qoleno mannu reyannohu mine heeˈreeti.

Xaa yannara, xaginsanni gari halaˈlasi akimootu dhibba gargarte mannu heeˈranno diro seedisa dandiitanno gede assino. Alba manna amadanni heeˈrenni shaanno dhibba gargarre xa mannu lowo diro heeˈranno gede assa dandiinoonni. Ikkollana, seeda diro heeˈranno manni heeˈrannohu dhibbinsa ledooti. Duucha wote buuto dhiwamino manni wolqa baˈˈanno daafira, insaneeto towaaxxe diafanno.  Hattoo manna dhiwansiisa shota diˈˈikkitino; qoleno lowo woxi, wolqanna yanna hasiissanno.

Konni daafira, rooru manni reyannohu minensa heeˈre ikkikkinni hospitaaleteeti. Yannankera rooru manni mannu reyanno wote hiitto ikkannoro diafino, hattono mannu reyanna laˈˈanno manni shiimaho. Konnira, maatensa miila dhiwansiisiˈranno manni waajjanno daafira, dhiwansiisiˈnanni gari baˈˈansara woy wolqa hoogara dandaanno. Ikkina tennera kaaˈlannonsari maatiyya?

BALANXE QIXXAAWA

Dooriini lawishshi leellishannonte gede, batinyu manni mininsa manna hurannokki dhibbi amadinota afanno wote lowo geeshsha masanno. Yaaddo, waajjanna dadillu heeˈrirono, albillitte ikkannorira qixxaawa dandaattohu hiittoonniiti? Mittu ammanaminohu Maganu soqqamaasinchi togo yee huucciˈrino: “Egennaamma ikkineemmo gede, dirinke harancho ikkinota rosiisinke.” (Faarso 90:12) Maganu Yihowa ‘dirikki harancho ikkinota’ rosiisannohe gede jaatte huucciˈrakki, gattino yanna maatekki miili ledo danchu garinni sayisa dandaatto gede kaaˈlitannohe.

Tennera balanxe qixxaawa hasiissanno. Maatekki miili coyiˈra dandaannohanna hasaawa hasiˈrannoha ikkiro, isi coyiˈre kuˈla hooganno wote, iso riqiwe mittore ayi assasira hasiˈrannoro xaˈma hayyote. Dhiwamino manchi, akimootu kaaˈlonni reyotenna heeshshote mereero heeˈra woy hospitaale ea hasiˈrannoronna teˈee, hattono hiittee dhagga adha hasiˈrannoro xawinse hasaawa, dhiwamino mancho riqiwe mittore assanno manchi daafira gara ikkinokkire hendannikki gedenna ganaanni gaabbinannikki gede assitara dandiitanno. Yannantenni fanne hasaawa maate dhiwamino mancho ille worte towaattanno gede kaaˈlitanno. Qullaawu Maxaafi “Malu hoogiro hendoonniri ikkikkinni gatanno” yaanno.—Lawishsha 15:22.

KAAˈLA DANDIINANNI GARA

Dhiwansiisanno mannihu qaru loosi dhiwaminoha sheshifachishate. Buuto dhiwamino mancho banxannisitanna callichosi ikkinokkita kulle jawaachisha hasiissanno. Tenne assa dandiinannihu hiittoonniiti? Dhiwamino manchira jawaachishshannotanna isi baxanno borro doorte nabbawisi; woy baxanno faarso faarsisi. Batinyu manni, maatensa miili angansa amade awu afiinni hasaawisannonsa wote sheshifatanno.

Duucha wote dhiwamino manchi xaˈmasira dayino manna bade afasi danchate. Mitte rippoorte togo yite xawissino: “Ontente huwatote bisi kifilla giddo jeefote geeshsha loosa agurtannokkiti maccate yine hendanni. Xiwamino manchi goxirono macciishsha agurannokki daafira, goxino yitine  baqqi yee heeˈreenna coyidhinannikkire coyidhinoonte.”

Dandaamannoha ikkiro, mitteenni huuccatto assidhe. Qullaawu Maxaafi mitte yannara soqqamaasinchu Phaawuloosiranna jaallasira heeshshonsa nafa qarru giddo ubbanno gede assannohu buutote qarri iillinonsata kulanno. Hatte yannara insa ma garinni kaaˈlinansara xaˈmidhuyya? Phaawuloosi ammanate roduuwisira ‘Magano huuccenke’ yiino. (2 Qorontoosi 1:8-11) Yaachishannori iillannonkenna buutote dhibbi amadannonke wote giddonni huucciˈra lowo geeshsha kaaˈlitanno.

IKKANNO COYE AMMANE ADHA

Mininke manni reyannota ammane adha lowo geeshsha qarrissannote. Kalaqammoommohu reyinammora ikkinokkiti egennantinote. Konni daafira, reyo heeshshonke kifile ikkitinohu gede asse heda qarrissannonke. (Roomu Sokka 5:12) Maganu Qaali reyo ‘diinaho’ yaannohu iseraati. (1 Qorontoosi 15:26) Konni daafira, mininke manchi reyanno yine heda nafa shota ikkitinokkiti dihuluullissannote.

Ikkollana, maatete miilla ikkara dandaannore balaxe hedansa, waajjishannonsare ajishatenna dandaaminsa deerrinni coye biddi assate kaaˈlitannonsa. Mittu manchi reyara kaˈˈanno wote ikkannori giddo gama “Reyate Boode Lamala Gattanno Wote” yitanno saaxine giddo xawinsoonni. Ikkirono dhiwamino manchi baalu hatto ikkanno woy hakko kulloonniri aante garinni ikkanno yaa diˈˈikkino. Kayinni roore dhiwamino manni reyara kaˈˈanno wote hatto ikkanno.

Maatete miili reyi gedensaanni, konni albaanni kaaˈlate sumuu yiinohuwa muli jaaliwa aana dancha ikkitara dandiitanno. Dhiwansiisidhanni keeshshitinote maatete miillara, shiidhino manchihu qarrisi kainotanna xaate qarramannokkita kule sheshifachishannonsahu hasiisannonsa. Manna kalaqino Magani ‘reyitinori mittoreno affannokkita’ kulinonke.—Rosiisaancho 9:5.

TAALAMANNOSIHU NOOKKI TOWAATAANCHO

Wolootu kaaˈlitannonke kaaˈlo adha hasiissannonke

Maatete miili buuto dhiwamanno wote calla ikkikkinni shiiˈne dadillinanni woteno Magano addaxxa hasiissanno. Maganu wolootu coyidhannonna assitannori widoonni sheshifachishaˈnera dandaanno. Dooriini togo yitino: “Wolootu kaaˈlitannoe kaaˈlo adha hasiissannoeta rosoomma. Qoleno wolootu baasa kaaˈlitinonke. Minaanniˈyanna ani, Yihowa ‘Kiˈne kaaˈlate muleˈne noommo’ yiinonkehu gede assine hendoommo. Assinonkere horo dihaweemma.”

Ee, towaatate Maganu Yihowa geeshsha ikkannohu dino. Kalaqaanchonke ikkino daafira xissonkenna dadillinke leellannosi. Isi qarra dandiine saˈneemmo gede ninke kaaˈlanna jawaachisha hasiˈranno, hattono tenne assate wolqa noosi. Isi konninni roorinore assankera yaano lowo biliyoone ikkannoha reyino manna kayise reyo hegerera hunara qaale einonke. (Yohaannisi 5:28, 29; Yohaannisi Ajuuja 21:3, 4) Hakkiinni baalunku manni soqqamaasinchu Phaawuloosi gede, “Tee reyo qeellekki hiikko no? Tee reyo gawajjattati wolqakki hiikko no?” yee coyiˈra dandaanno.—1 Qorontoosi 15:55.

^ GUFO 2 Suˈmuwa soorrinoonni.