Qara amadowa massie

Furchonniwa massie

 ROSO 19

Ammanaminohunna Wodanaamu Borojjichi Ayeti?

Ammanaminohunna Wodanaamu Borojjichi Ayeti?

Ayyaanaamittete sagale ninke baalanka kaaˈlitannonke

Yesuusi reyara shiima yanna albaanni, rosaanosi giddo shoolu ledo calla yaano Pheexiroosi, Yaaqoobi, Yohaannisinna Indiriyaasi ledo hasaawino yanna no. Yesuusi hakkawote, goofimarchu yannara isi iima Moote ikkanno woyite leellanno malaatire masaalino; hakkiinnino togo yee mitte hasiissanno xaˈmo xaˈmino: “Hasiissanno yannara sagalensa aannonsa gede, mootichu soqqamaanosi aana shoominohu ammanaminohunna wodanaamu borojjichi isi addinta ayeti?” (Maatewoosi 24:3, 45; Marqoosi 13:3, 4) Yesuusi tenne xaˈmo xaˈmi woyite, rosaanosira ‘mooticha’ ikkino daafira goofimarchu yannara harunsaanosira ayyaanaamittete sagale ganyite uyitannore shoomannota kulanni no. Kuri ayyaanaamittete sagale uyitannori ayeooti?

Ayyaanunni buurantinore Yesuusi harunsaano amaddinote shiima gaamooti. Kuni “borojjichi” xaa yannara Yihowa Farciˈraasineha Aliidi Biso ikkinota huwata dandiinanni. Hattono isinte gede Yihowa magansidhannorira ayyaanaamittete sagale hasiissanno yannara aannoho. “Hasiissannonketa gari sagale hasiissanno yannara” afiˈneemmohu konni ammanamino borojjichiwiinni callaati.—Luqaasi 12:42.

Kuni borojjichi Maganu mini mannira biddishsha aanno. (1 Ximootewosi 3:15) Yesuusi ammanamino borojjichira, Yihowa dirijjiteha uullayidi kifile looso qineessannonna massaganno gede, yaano dirijjitete jajja agaranno gede, sabbakate looso massaganno gedenna songote widoonni rosiisannonke gede lowo looso uyinosi. Konni garinni “ammanaminohunna wodanaamu borojjichi” hasiissannonketa ayyaanaamittete sagale hasiissanno yannara shiqishate, soqqanshonkera horoonsiˈneemmota addi addi borro attamanno, hattono songote gambooshshenna jajjabba gambooshshe qixxeessanno.

Kuni borojjichi, Qullaawu Maxaafi halaaliranna dancha duduwo duduwanno gede uyinoonnisi loosira ammanaminoho; qoleno uullate aana nooha Kiristoosi jajja danchu garinni amadanno daafira wodanaamoho. (Soqqamaanote Looso 10:42) Yihowa batinyu manni farciˈraasinesi ikkanno gede isiwa qole abbe, hattono buuramino borojjichi lowota ayyaanaamittete sagale qixxeessanno gede kaaˈle, konne borojjicho maassiˈranni no.—Isayyaasi 60:22; 65:13.

  • Yesuusi rosaanosira ayyaanaamittete sagale aara aye shoomino?

  • Kuni borojjichi ammanaminohanna wodanaamo ikkinohu ma garinniiti?