Qara amadowa massie

Cinaanchu doorshiwa massie

Furchonniwa massie

Yihowa Farci'raasine

Sidaamu Afoo

Wedellu Xaˈmannote 10 Xaˈmora Qolloonni Dawaro

 XAˈMO 7

Siimu Xaadooshshe Assino Yaannoeha Hooˈlate Ma Asso?

Siimu Xaadooshshe Assino Yaannoeha Hooˈlate Ma Asso?

TENNE AFA MAYIRA HASIISSU?

Tenne hajo daafira doodhatta doorshi heeshshokki woˈma seekkara woy hunara dandaanno.

ATE IKKOOTTARO MA ASSATTA?

Hanni tenne ikkito hedi: Kaffalenna Milooni jaalooma hanafinku lame aganalla ikkino; ise kayinni egennaminku lowo diro ikkinonsahu gede assite heddanno. Insa ganye mimmitoho mobayiletenni sokka soyaanno, hattono silketenni lowo saate hasaawanno; qoleno kuˈu kuˈuyi hedo mulla afanno! Xa kayinni Milooni mullu hasaawinni sainore hasiˈrino.

Saihu lamu agani giddo, Milooninna Kaffale mimmito anga amade haˈranna mimmito sunqa agurranna wolere assinori dino. Kaffale hakkiinni sainore assa dihasidhino. Kayinni ise Milooni agudhano dihasidhino. Kaffale Milooni gede hagiirsiisannosehunna ani xumate yite heddanno gede assannosehu wolu dino. Ise, ‘Milooninna ani baxammummo geeshsha mayi qarri no?’ yite heddu.

Mine assiˈrate iilloottaha ikkiro, togoo coyi tuncu yiihero ma assatta?

WODANAAˈMITE HEDI!

Siimu xaadooshshi Maganu adhamino mannira calla uyino eltooti. Adhammara albaanni tenne assa kayinni Maganu uyino elto afimalsate. Hatto assa, mittu manchi uyinohete faayya uddanonni diqillo feyate gedeeti

Kalaqamu higge ayirrisa hoogittaro, lawishshaho seeda haqqicho aaninni kubbittaro, tini abbitanno qarrinni gata didandaatta. Hatteente gede, Maganu fushshinohu amanyootu seerira, lawishshaho ‘foorretewiinni xeertidhe’ yitanno higge ayirrisa hoogittaro qarru iillannohe.—1 Teselonqe 4:3.

Tenne higgera hajajama giwa abbitanno qarri maati? Qullaawu Maxaafi, ‘Foorannohu kayinni cubbo mannimmasi aana loosanno’ yaanno. (1 Qorontoosi 6:18) Kuni ikkannohu hiittoonniiti?

 Xiinxallaano, adhamara albaanni siimu xaadooshshe assinohu batinyu wedelli konni woroonni qummi assinoonniri giddo mittu woy hakkiinni saino qarri iillannonsata buuxxino.

  • GAABBO. Adhamikkinni siimu xaadooshshe assinohu rooru wedelli gedensaanni hige gaabbinota coyiˈrino.

  • MIMMITO AMMANA HOOGA. Siimu xaadooshshe assi gedensaanni lamunku, ‘Wolu ledono togoore assino ikka woy assitino ikka?’ yee huluullamanno.

  • GURCHAAWA. Lowo seenni, umisi horora yee shiqannonsaha ikkikkinni golamannonsa jaala doodhanno. Batinyu labballi qole hasiˈrinore afiˈrihu gedensaanni hatti beetto hakkeeshsha dibaxissannonsa.

  • Tenne habbooti: Mitte beetto adhantara albaanni siimu xaadooshshe assituro, seeminatese huˈnite iseneeto rakasiissanno. (Roomu Sokka 1:24) Mannimmakki mulluri gede assite laˈooti!

‘Foorretewiinni xeertiˈrate’ kaaˈlitanno jawaante nooheta leellishi. (1 Teselonqe 4:3) Qoleno, barrunni mitto barra mine assiˈrittaro, minaannikki ledo goxa dandaatta. Adhammikki siimu xaadooshshe assa abbitanno qarri, lawishshaho yaaddo, gaabbonna waajjishannori nookkiha siimu xaadooshshinni woˈmunni woˈma hagiidhattahu hakkawoteeti.—Lawishsha 7:22, 23; 1 Qorontoosi 7:3.

 MA LAWANNOHE?

  • Ate addinta baxannohe beetti mannimmakkinna hedokki gawajjannore assi yaannoheni?

  • Ate daafira addinta hedanno beetti Maganu ledo noohe jaalooma hunannore assattara xixxiiwannoheni?—Ibiraawoota 13:4.