TENNE AFA MAYIRA HASIISSU?

Annikkinna amakki ledo sumuu yite heeˈrittoro, heeshshokki hagiirraame ikkitanno.

ATE IKKOOTTORO MA ASSATTO?

Hanni tenne ikkito hedi: Barru Roowete hawarrooti. Zaruuni yinannihu 17 diri beetti mine assi yinoonnisire xaalla asse gude ofolle no; xa isi shiima geeshsha fooliishshiˈra hasiˈrino. Konnira televizhiine faˈne mittu baxanno soofira ofolli.

Hakko balla annisi minira eanno; isi alba xiphi yee Zaruuni togo yii:

“Zaruuni! Rodiikkira mini looso kaaˈla agurte televizhiine laˈˈatto? Ati mannu yaannore horo dimacciishshatto yaate?”

Tennera Zaruuni annisira macciishshantanno geeshshi huuronni, “Uffa ballo xaate!” yee gungumi.

Hakkiinni annisi, “Mayyiitto koo?” yii.

Zaruuni wolewa hige laˈˈanni, “Yoommori dino” yii.

Xa annisi lowo geeshsha giiramino. Konnira, “Aneraati koo togo yite qolittohu?” yee hanqe coyiˈri.

Ati Zaruuni ikkoottoro, togoori kalaqamannokki gede ma assatto?

WODANAAˈMITE HEDI!

Annikkinna amakki ledo hasaawa makeena kadate gedeeti. Mittu manchi makeenunni haˈranna doogo cufantuha ikkiro, wole widoonni hige saˈˈa dandaanno.

 Lawishsha:

Liya yinanni beetto togo yitino: “Anniˈya ledo hasaawa qarra ikkitannoe. Mito wote isira lowore coyiˈrummahu gedensaanni haaro ikke ‘Mayyiitta?’ yaannoe.”

LIYARA AJAYI AJEENNA SASU DOORSHI NOOSE.

  1. Annisera hanqite coyiˈra.

    Liya “Ani dihaarimanniwe noomma!” yite hanqitara dandiitanno.

  2. Annase coyishshiisha agura.

    Liya tuncu yiinose qarra annise ledo hasaawa agurtara dandiitanno.

  3. Injiitanno yanna agarte tuncu yiinosere hasaawa.

    Liya gedensaanni higge annase shiqqe hasaawisa woy tuncu yiinose qarra borreessite annisera aa dandiitanno.

Liya kuri giddo hiikkonne doodhituro woyyannoha lawannohe?

TENNE HEDI: Liya anni hedosi bebbeehantino daafira qarrisinoseri noota dihuwatino. Konni daafira Doorsha A hunda kullinte gede, Liya hanqite coyidhuro, mayira hanqitanni nooro leella hoogasira dandaanno. Liya togo assituro tini annise ise yitannore macciishshanno gede diassitanno; qoleno tini ikkitose annase ayirrissannota dileellishshanno. (Efesooni Sokka 6:2) Konni daafira, kuni doorshi kaaˈlannori dino.

Doogo cufanturo agurte higattokkinte gede, annikkinna amakki ledo hasaawatto farono hasiˈra dandaatto

Doorsha B hunda kulliri assate shota ikkara dandaanno; kayinni hatto assa hayyo diˈˈikkitino. Mayira? Korkaatuno Liya qarrisenni fula hasidhuro annisera hasaapha hasiissannose; anniseno ise kaaˈlate tuncu yiinosere afa hasiissannosi. Sammi yee agura tennera dikaaˈlitanno.

Doorsha C hunda kulliri kayinni Liya annise ledo hasaawate guficho ikkinosere hooˈlate kaaˈlannose. Ise hasaawate heddino hajo wole wote kayisse hasaawa dandiitanno. Qoleno, Liya qarrase kuˈlate annisera sokka borreessituro bayichonko giddose harshammi yitara dandiitanno.

Qoleno, Liya mitiinsinosere borreessase yitara hasidhinore dancha gede assite xawisate kaaˈlitannose. Annise ise borreessitino sokka nabbawanno wote, ise kultasira hasidhino coyinna tuncu yiinose qarri maatiro afa dandaanno. Konni daafira C Doorshi hunda noo hedo Liyano annaseno kaaˈlitannote. Ise annase xaaddote hasaawissuro woy hedose borreessite kulturo, mannu ledo “keere heeˈnanni” gede kultannote Qullaawu Maxaafi amaale ledo sumuu yaannore assitanni no.—Roomu Sokka 14:19.

Liya wolere ma assa dandiitannoha lawannohe?

Liya assa dandiitanno yite hedattoha mitto coye woroonni noohu fanu bayichira borreessi. Hakkiinnino tenne assase abbitara dandiitanno guma borreessi.

 ANNIKKINNA AMAKKI ATI HEDOOTTOKKIRE HEDANNO GEDE ASSITOOTI

Ati hedde coyiˈroottorinna annikkinna amakki hedannori babbaxxara dandaannota deˈooti.

LAWISHSHA:

Annikki woy amakki, ‘Alba mayira kolossi yootto?’ yee xaˈminohe yino. Ati kayinni “Agurreˈˈe ballo” yiitto.

Annikkiranna amakkira kayinni togo yoottoha lawansara dandaanno: “Kiˈnera hasaapha dihasiˈreemmo. Qarraˈya kiˈnera ikkikkinni jaallaˈyara kuˈleemmo.”

Hanni mittu qarri tuncu yeennahe annikkinna amakki kaaˈlahera hasiˈrino yine hendo. Ati kayinni togo yiitto: “Hakkeeshsha qarrisinore diˈˈikkino. Ani umiˈya biddi assemmoreetilla.”

  • Annikkiranna amakkira mayyoottoha lawansara dandaanno?

  • Ma garinni qolittoro woyyannoyya?