Qara amadowa massie

Furchonniwa massie

 ROSO 48

Mitte Gunnitte Mancho Qaaqqi Reyotenni Kai

Mitte Gunnitte Mancho Qaaqqi Reyotenni Kai

Moollete yannara Yihowa Eeliyaasi togo yiisi: ‘Seraphita yinanni katama haˈri. Hakkiicho mitte gunnitte mancho sagale uyitannohe.’ Eeliyaasi katamu xullicho iillanno woyite, mitte gunnitte mancho haqqe hiiqqidhanna lai. Isi, “Ballo ageemmo waa abbie” yiise. Mancho waa abbitasira hadhanni heedheenna Eeliyaasi, “Ballo shiima timano anga haadhe amoe” yiise. Mancho kayinni togo yitusi: ‘Eemmahe timi dinoewe. Mitto hoowo ikkitanno bulleenna hilicci zayite calla nooe. Hattenne noota aneneetiranna qaaqqiˈyara tima gaˈnammaraati.’ Eeliyaasi manchote togo yii: ‘Anera tima uyittaero, Yihowa “baattote aana xeena gana geeshsha bulleekkinna zayitekki digooffanno” yiino.’

Konni daafira, mancho minira hadhe Yihowa masaalaanchira tima gantusi. Yihowa yiinonte gede, isenna qaaqqise moollete yannara sagale dihoogino. Bullee gambayichunni, zayiteno maaqqete giddonni digooffinose.

Mitto barra hattenne gunnitte manchora qarru iillise. Shiimu qaaqqise xiwame reyi. Konni daafira ise Eeliyaasi kaaˈlie yite  huuccidhu. Eeliyaasi qaaqqo angasenni haaˈre fooqete iimira fuli. Isi qaaqqo daallasaho goxise togo yee huucciˈri: ‘Yihowa, eeggatena kuni qaaqqi galagale lubbotenni heeˈranno gede assi.’ Yihowa tenne assasi dhagge ikkitannohu mayiraatiro afootto? Korkaatuno hakkuyira albaanni reyotenni kae egenninohu dino. Qoleno gunnitte manchonna qaaqqise Israeelete gaˈre diˈˈikkino.

Ikkirono qaaqqu reyotenni kae foola hanafi! Hakkiinni Eeliyaasi manchote togo yii: ‘Kuneeti! Qaaqqikki reyotenni kaino.’ Iseno lowo geeshsha hagiidhite Eeliyaasi togo yitu: ‘Ati Maganu manchooti. Korkaatuno ati Yihowa coyiˈri yiinohere calla coyiˈratto; hattono woˈmanka woyite coyiˈroottori woˈmannota afoomma.’

“Hanni haraqeeyye laˈe; diwixidhanno; dimixxitanno; gide duuˈnitannowi woy gootaaru dinonsa. Maganu itisannonsa. Kiˈne, ceatenni lowo geeshsha diroortinanni?”—Luqaasi 12:24