Qara amadowa massie

Cinaanchu doorshiwa massie

Furchonniwa massie

Yihowa Farci'raasine

Sidaamu Afoo

Ooso’ne Rosiisse

 ROSO 6

Daawiti Diwaajjino

Daawiti Diwaajjino

Mitiri waajjishihero hiikkatto?— Annikkiwa woy amakkiwa xooqattora dandaatto. Ikkollana kaaˈlahera dandaannohu woluno no. Isi baalunku manninni roore wolqa afiˈrinoho. Isi ayetiro afootto?— Ee, Yihowaati. Xa hanni Qullaawu Maxaafi giddo kulloonnihu wedellichu Daawiti xagge ronso. Isi Yihowa ayewoteno kaaˈlannosita afino; konni daafira diwaajjino.

Daawiti anje qaaqqu heeˈreenna, annisinna amasi isi Yihowa baxanno gede assite rosiissinosi. Tini waajjishannori iillisi wote nafa waajjannokki gede kaaˈlitinosi. Isi Yihowa Jaalasi ikkinotanna kaaˈlannosita afino. Mitte hige Daawiti geˈreewo allaale heeˈreenna, lowo doobbiichi daye geˈrecho amadi! Hakkawote Daawiti ma assinoro afootto? Doobbiicho mulla anganni shorrino, shaa nafa shiikki digatino! Qoleno, dibi yinanni moyichi daye geˈreewo amadi yannara isono shiino! Daawiti ayi kaaˈlinoha lawannohe?— Ee Yihowa kaaˈlinosi.

Daawiti roorenka worba ikkinoti wole yannano no. Isiraeelete manni Filisxeemete yinanni manni ledo olamino yanna no. Filisxeemete wottaaddarooti giddo mittu jigeessu manchi no! Suˈmisi Goliyaadiiti. Kuni jigeessu manchi Isiraeelenna Yihowa mishino. Goliyaadi Isiraeele, hanni worbitinoonniro amme ane ledo olamme yiinsa. Isiraeelete manni kayinni isi ledo olama lowo geeshsha waajjino. Daawiti tenne afiti Goliyaadi togo yii: ‘Ani ate ledo olameemmo! Yihowa kaaˈlannoe daafira, qeeleemmohe!’ Daawiti worba beetto dilawannohe?— Ee, worbaho. Hakkiinni aane mayi ikkinoro afootto?

Daawiti corqaayyesinna onte qunqumadda kinna adhe jigeessu manchi ledo olamara haˈri. Corqaayye kincho worre olate kaaˈlitannote. Goliyaadi Daawiti shiinqa ikkinota laiti, iso horo mishi. Daawiti kayinni iso togo yii: ‘Ati ane ledo olamate bise adhite dawootto, ani kayinni Yihowa suˈminni dawoommohe!’ Hakkiinnino corqaayyete mitto kincho wodhe, Goliyaadiwa hige dodi, wodhino  kinchono wijji asse oli. Kinchu Goliyaadira albaho taalo gani! Jigeessu manchi hakkawontenni kaate uwe reyi! Filisxeeme waajjite huxidhe gudisante xooqqu. Daawiti shiima ikke heeˈrenni kageeshshi jigeessa hiitto ikke shaa dandii?— Iso kaaˈlinohu Yihowaati, Yihowa hakkoye jigeessa mancho lowo geeshsha rooranno!

Daawiti Yihowa kaaˈlannosita afino daafira diwaajjino

Daawiti xaggenni maa rosatto?— Yihowara mannu baalunkutenni roore wolqa noosi. Isi atera Jaalaho. Hakko daafira mitiri waajjishihero, Yihowa kaaˈlahera dandaannota habbooti!

TENNE XIQISUBBA FANTE NABBAWI

  • Faarso 56:3, 4

  • 1 Saamueeli 17:20-54