Qara amadowa massie

Furchonniwa massie

 ROSO 2

Halaalaanchu Magani Ayeti?

Halaalaanchu Magani Ayeti?

1. Magano magansiˈra hasiissannonkehu mayiraati?

Halaalaanchu Magani kalaqama baalaho Kalaqaanchoho. Isira hanafono gawalono dinosi. (Faarso 90:2) Qullaawu Maxaafi giddo nooha dancha duduwo coyiˈrinohu isooti. (1 Ximootewosi 1:11) Kalaqinonkehu iso ikkino daafira, magansiˈra hasiissannonkehu iso callaati.​—Ajuuja 4:11 nabbawi.

2. Maganu isi hiittooho?

Maganu Ayyaana ikkinohura iso illetenni lae egennino manchi dino; isi heeshsho maala uddiˈre uullate aana heeˈranno manninni lowonta roorete. (Yohaannisi 1:18; 4:24) Ikkollana Maganu kalaqinore laˈnummoro akattasi buuxa dandiineemmo. Lawishshaho, addi addi dani laalonna daraaro baxillesinna ogimmasi kultannonke. Kalqete alame halaˈlinyi wolqasi huwanteemmo gede assannonke.​—Roomu Sokka 1:20 nabbawi.

Qoleno Qullaawa Maxaafa xiinxallinummoro Maganu akattare lowore ronseemmo. Lawishshaho, Qullaawu Maxaafi Maganu baxannorenna giwannore kulannonke; hattono Isi manna ma garinni amadannoronna mittu coyi tuncu yaannosi woyite ma assannoro kulannonke.​—Faarso 103:7-10 nabbawi.

3. Maganoho suˈmu noosi?

Yesuusi togo yiino: “Iima heeˈratto Annanke, suˈmikki qullaawa ikko.” (Maatewoosi 6:9) Maganoho addi addihu maaragete suˈmi noosiha ikkirono, suˈmisi mittoho. Konne suˈma gannanni gari mannu coyiˈranno afii garinni babbaxxanno. Sidaamu afiinni “Yihowa” yine woshshinanni.​—Faarso 83:18 nabbawi.

Mannu Maganu suˈma Qullaawu Maxaafi giddonni fushshe hoole, hakko bayicho maaragete suˈmuwa yaano Mootichanna Magano yinanni suˈmuwa worino. Hunda Qullaawa Maxaafa borreessini waro Maganu suˈma Qullaawu Maxaafi giddo mito  7,000 hinge borreessinoonni. Yesuusi mannaho Maganunnire rosiisi woyite mannu Maganu suˈma afanno gede assino.​—Yohaannisi 17:26 nabbawi.

Maganoho Suˈmu Noosi? yitanno viidiyo lai.

4. Yihowa ninke daafira hedanno?

Konni baxillaanchu anni gede, Maganu hegeri atoote afiˈneemmo doogo biddi assanni no

Gobba gosa woˈmino qarri Yihowa ninkera dihedannoho yineemmo gede assannonkeni? Mitu manni, isi qarrammeemmo gede assannonkehu ninke fonqolara yeeti yaanno; hatto yaa kayinni digaraho.​—Yaaqoobi 1:13 nabbawi.

Maganu, mannu ooso mitto coye uminsa doodhitanno gede asse kalaqinonsa. Ninke iso banxe magansiˈneemmo gede doodhate dandoo uyinonke daafira iso galata dihasiissannonke? (Iyyaasu 24:15) Lowo manni kayinni woloota gawajjannore assate doodhino daafira qarru batiˈrino. Yihowa tenne miico laˈˈanno woyite dadillanno.​—Kalaqo 6:5, 6 nabbawi.

Yihowa ninke daafira hedanno Maganooti. Isi ninke hagiidhinanni heeˈnammora hasiˈranno. Qoleno muli barra qarranna qarra abbanno manna baala hunanno. Hakka geeshsha kayinni qarru heeˈrara fajjanno gede assinosihu ikkadu korkaati no. Kuni korkaati maatiro Roso 8 aana ronseemmo.​—2 Pheexiroosi 2:9; 3:7, 13 nabbawi.

5. Maganunniwa shiqa dandiineemmohu hiittoonniiti?

Yihowa huuccattotenni isiwa shinqammora koyisinonke. Isi ninke mittu mittunku daafira hedanno. (Faarso 65:2; 145:18) Isi maarannoho. Mito woyite dadillinseemmosiha ikkirono iso hagiirsiisate assineemmore dimishanno. Konni daafira guuntete xeˈne heedhunkerono isi ledo lubbora jaalooˈma dandiineemmo.​—Faarso 103:12-14; Yaaqoobi 4:8 nabbawi.

Kalaqinonkehu Yihowa ikkino daafira, ayenni roorsine iso baxa hasiissannonke. (Marqoosi 12:30) Maganunnire ledde rosse iso baxattota leellishittoronna isi hajajannore assittoro isiwa albinni roore shiqatto.​—1 Ximootewosi 2:4; 1 Yohaannisi 5:3 nabbawi.