Qara amadowa massie

Cinaanchu doorshiwa massie

Furchonniwa massie

Yihowa Farci'raasine

Sidaamu Afoo

Qullaawu Maxaafi Addinta Mayyee Rosiisanno?

FOOLIISHSHO SHOOLE

Yesuusi Kiristoosi Ayeeti?

Yesuusi Kiristoosi Ayeeti?

Yesuusihu baxxino loosi maati?

Isi dayinohu hiikkiinniiti?

Isi uullate aana noo waro hiittoo manchooti?

ALAMETE aana batinynyu macca manni no. Mitootu maccare ikkitinohu dagansa giddo, kataminsara woyi gobbansa giddooti. Wolootu kayinni alamete deerrinni egennantinoreeti. Kuri mannootiha su'mansa afootto yaa insa seekkite egennootto yaa di''ikkino. Yaano ilante lophphitino garanna akatansa seekkite afootto yaa di''ikkino.

2 Yesuusi Kiristoosi uullate aana hee'rinohu mitu 2,000 diri albaanni ikkirono, alamete aana noo manni isire macciishshino. Ikkeennano, Yesuusi addinta ayeeti yitanno hajo batinynye manna gurcheessitino. Mitu manni, Yesuusi wolu manninte gede dancha manchootilla yaanno. Wolu manni qole isi wole masaalaano gedee masaalaanchootilla yaanno. Yesuusi Magano ikkinotanna magansi'nasira hasiisannota ammananno mannino no. Ikkina iso magansi'ra hasiissanno?

3 Yesuusa lainohunni halaale ikkino roso afa hasiissannohe. Mayira? Korkaatuno Qullaawu Maxaafi togo yaanno: ‘Hegere heeshshono ati calla halaalaancho Magano ikkoottoha atenna soottoha Yesuusi Kiristoosi afate.’ (Yohaannisi 17:3) Addaho, Magano Yihowanna Yesuusi Kiristoosi lainohunni halaale afa gannate ikkitanno uullara hegere heeshsho afi'nanni doogo fantanno. (Yohaannisi 14:6) Qoleno Yesuusi hiitto ikkine hee'ra hasiissannoronna woloota hiittoo illenni la''a hasiissannoro lawishsha ikkino. (Yohaannisi 13:34, 35) Konni maxaafira umi fooliishsho giddo, Magano lainohunni halaale ikkinore ronsoommo. Xa hanni Yesuusi Kiristoosi lainohunni Qullaawu Maxaafi addinta mayyee rosiisannoro la'no.

QAALE E'NOONNI MESIHICHCHA

4 Yesuusi ilamara seedu diri albaanni Mesihichchu woyi Kiristoosi Maganu soyeenna daannota Qullaawu Maxaafi balaxe masaalino. “Mesihichcha” nna “Kiristoosi” yaannohu maaragete su'mi lamunku, “Buuraminoho” yitanno tiro afi'rino. Kuni daanno yine qaale e'noonnihu buuraminoho, yaano mittu baxxino loosira Maganu doorinoho. Maganu qaale eino coye Mesihichchu hiittoonni wonshannoro konni maxaafira goofimarchu fooliishshuwara lende ronseemmo. Yesuusi xaa yannara nafa aannonke atootireno ronseemmo. Kayinnilla Yesuusi ilamara albaanni batinynyu manni, ‘Mesihichcha ikke daannohu ayeetikka?’ yee huluullamikki digatino.

5 Umi sanira M.D. heedhinori Naaziretete Yesuusi rosaano, isi daanno yinoonni Mesihichcha ikkinota woˈmunni wo'ma ammantino. (Yohaannisi 1:41, NW) Rosaanote giddo Simiooni Pheexiroosi yinannihu mittu manchi Yesuusa, “Ati Kiristoosiiti” yiino. (Maatewoosi 16:16, NW) Ikkina Yesuusi rosaano isi qaale e'noonni Mesihichcha ikkinota huluullantinokkihu mayiraati? Ninkeno tenne huluullammeemmokkihu mayiraati?

6 Yesuusi ilamara albaanni heedhinori Maganu masaalaano, Mesihichcha lainohunni duuchcha coye xawisse kultino. Insa xawisse kultinori Mesihichcha bande anfeemmo gede kaa'lannonke. Lawishshaho, mitto wosincho dikkote gede mannu bati'ranno bayichchinni marte abbattora kullihero, mittu manchi hakko wosinchire mito coye xawise kulihero dancha di''ikkanno? Hatteente gede, Yihowa Qullaawu Maxaafi masaalaano horoonsi're, Mesihichchu daye ma assannoronna mayi qarri iillannosiro seekke xawisino. Tini batinynye masaalo wo'mase ammanamino manni Mesihichcha bade afanno gede kaa'litanno.

7 Hanni lame lawishsha lai. Umihunni, 700 diri albaanni masaalaanchu Mikiyaasi, daanno yinoonni Mesihichchi Beeteleemete yinanni shiimu Yihudu katamira ilamannota masaalino. (Mikiyaasi 5:2) Yesuusi hiikko ilamiyya? Hakko Beeteleemente ilamino! (Maatewoosi 2:1, 3-9) Layinkihunni, lowo xibbi diri albaanni, Daanieeli 9:25 aana noo masaalo Mesihichchu baxxe leellannohu 29 M.D. ikkinota kultino.* Tini lamentinna wole masaalo wo'mase Yesuusi daanno yinoonni Mesihichcha ikkinota buuxisiissanno.

Yesuusi cuuamanni no

Yesuusi Mesihichcha woyi Kiristoosi ikkinohu cuuami woteeti

8 Yesuusi Mesihichcha ikkinota kultannota wole taje 29 M.D. goofimarchira anfoonni. Cuuaanchu Yohaannisi Yordaanoosi Lagira cuuannosi gede Yesuusi isiwa marinohu hakko dirooti. Yihowa, Yohaannisira Mesihichcha bade afanno gede assannosi malaate leellishasira balaxe qaale einosi. Yohaannisi hakkonne malaate Yesuusi cuuami wote laino. Qullaawu Maxaafi hakkawote ikkinore togo yee kulanno: ‘Yesuusi cuuame wayi giddonni fulanni hee'reenna gordu fa'nami; Maganu ayyaani lemboola lawe dirre umisi aana ofollanna lai Hakka wotenni, “Isinni [tashshi yaannoehu] baxeemmo Beetti'ya konneeti” yaanno qaali iiminni dayi.’ (Maatewoosi 3:16, 17) Yohaannisi tenne ikkito lainna macciishshi gedensaanni, Yesuusi Maganu soyeenna dayinoha ikkinota horonta dihuluullamino. (Yohaannisi 1:32-34) Yesuusi Gashshaanchonna Nugusa ikkara doorroonni Mesihichcha woyi Kiristoosi ikkinohu, Maganu ayyaani yaano loosu aana noo wolqa aanasi dirritu woteeti.—Isayyaasi 55:4.

9 Qullaawu Maxaafi masaalo wo'mase hattono Maganu Yihowa umisi coyi'rino qaali Yesuusi daanno yine qaale e'noonni Mesihichcha ikkinota xawisse leellishshanno. Qoleno Qullaawu Maxaafi Yesuusi Kiristoosi lainohunni wole lame xa'morano dawaro qolanno: Yesuusi dayinohu hiikkiinniiti? Isi uullate aana noo waro hiittoo manchooti?

YESUUSI DAYINOHU HIIKKIINNIITI?

10 Qullaawu Maxaafi Yesuusi uullara daara albaanni iima hee'rinota kulanno. Masaalaanchu Mikiyaasi Mesihichchu Beeteleemete ilamannotanna ‘bi'ree waronni nooha’ ikkinota coyi'rino. (Mikiyaasi 5:2) Yesuusi umisi manna ikke uullate aana ilamara albaanni iima hee'rinota duuchchaage coyi'rino. (Yohaannisi 3:13; 6:38, 62; 17:4, 5) Yesuusi ayyaanu kalaqo ikke iima hee'ri yannara, Yihowa ledo baxxino jaaloomi noosi.

11 Yesuusi Yihowara muxxete Beettosiiti; togo yineemmohu ikkadu korkaati noonkehuraati. Maganu Yesuusa duuchchunku coyinni balaxe kalaqinosi daafira, ‘baalunku kalaqamira bayiraho’ yinoonnisi.# (Qolasiyaasi 1:15) Maganu Beetto baxxinoha assannohu wolu coyino no. Isi Maganoho ‘mitto Beettosiiti.’ (Yohaannisi 3:16) Togo yaano Maganu umisi kalaqinohu iso callaati yaate. Maganu wole baalare kalaqinohuno Yesuusi widoonniiti. (Qolasiyaasi 1:16) Hatteeno agurranna Yesuusa “Qaaleho” yinoonni. (Yohaannisi 1:14) Tini qolte Yesuusi Magano riqiwe coyi'rannota kultannonke; iima ikko uulla heedhannotera Annisi oosora Maganuwiinni sokka iillishanno.

12 Mitu manni yaanno gede, Maganunnihu bayiru Beetti Maganu ledo taalohoni? Qullaawu Maxaafi hatto yee dirosiisanno. Aliidi gufora la'nummonte gede, Maganu Beetti kalaqaminoho. Hatto ikki geeshsha, isira hanafo noosi yaate; Maganoho kayinni hanafono ikko gawalo dinosi. (Faarso 90:2) Maganu Beetti Annisi ledo horonta taalame diegennino. Qullaawu Maxaafi Annu Beetto roorannota xawise kulanno. (Yohaannisi 14:28; 1 Qorontoosi 11:3) “Duuchchanka Dandaanno Magani” Yihowa callaati. (Kalaqo 17:1) Konni daafira taalamannosihu dino.%

13 Yihowanna bayiru Beettisi, beeddahe wo'mitino gordinna uulla kalaqantara lowo diri albaanni biliyoonetenni kiirranni diro mitteenni hagiidhitanni heedhino. Lamunku lowo geeshsha baxantinoti dihuluullammannite! (Yohaannisi 3:35; 14:31) Kuni muxxete Beetti Annisi gedeeho. Qullaawu Maxaafi, Kiristoosi ‘leellannokki Maganira lawishshaho’ yaannohu iseraati. (Qolasiyaasi 1:15) Addaho, mittu beetti duuchcha doogonni annasi lawannonte gede, kuni Beettino Annisi amalenna akata leellishannoho.

14 Yihowahu muxxete Beetti giddeessinisikki iiminni uullara daye manna ikke hee'rino. ‘Ayyaanaamo biso afi'rino kalaqami hiitto ikke mannu gede ikke ilamanno?’ yaattora dandaatto. Konne coye qineessate, Yihowa maalale loosino. Bayiru Beettisi heeshsho iiminni haare, Maariyaami yinannite mitte Yihudu seemo godowira wori. Konnira kaa'lo assinohu mittuno maalu anni dino. Konni daafira Maariyaami xe'ne noosikkiha guuta qaaqqo ilte, su'masi Yesuusa yite fushshitu.—Luqaasi 1:30-35.

YESUUSI UULLA NOO WARO HIITTOO MANCHOOTI?

15 Yesuusi uullate aana noo waro coyi'rinorinna assinori, iso seekkine egennineemmo gede kaa'lannonke. Hakkiinni saeno, Yesuusi widoonni hinge Yihowa bashshonni roorsine anfeemmo. Hatto yineemmohu mayiraati? Yesuusi Annisira woˈmunni wo'ma lawishsha ikkinota qaagi. Yesuusi rosaanosi giddo mittoho, “Ane lainohu Anna'yano laino” yee kulinohu iseraati. (Yohaannisi 14:9) Wongeelaho yinanniri Qullaawu Maxaafi giddo noori shoole maxaaffa yaano Maatewoosi, Maarqoosi, Luqaasinna Yohaannisi maxaaffa, Yesuusi Kiristoosi heeshshore, assinorenna akatasi lainohunni lowore kultannonke.

16 Yesuusi roore egennaminohu “Rosiisaancho” ikkasinniiti. (Yohaannisi 1:38; 13:13) Isi rosiisinohu maati? Isi mannaho kulinoti qara sokka, ‘Maganu Mangiste duduwooti’; tini mangiste wo'ma uulla gashshitannotenna hajajamanno mannira goofannokki atoote abbitannote iimi gashshooteeti. (Maatewoosi 4:23) Tenne sokka anni ayeeti? Yesuusi umisi togo yiino: ‘Ani rosiiseemmo rosi soyinoe Maganiho [Yihowaho] ikkinnina aneha di''ikkino.’ (Yohaannisi 7:16) Yesuusi, Annisi mannu ooso Mangistenniha dancha duduwo macciishshitara hasi'rannota afino. Fooliishsho settete aana, Maganu Mangiste maatironna tini Mangiste ma assitannoro lende ronseemmo.

Yesuusi rosaanosi rosiisanni no

Yesuusi mannu noowa baalawa sabbakino

17 Yesuusi rosiisinohu hiikkooti? Mannu noowa baalawa yaano, gaxarete ikko katamaho, addi addi qachchira, dikkotenna mininsa geeshsha mare rosiisino. Mannu noowa isi marino ikkinnina mannu isiwa daara diagarino. (Maarqoosi 6:56; Luqaasi 19:5, 6) Yesuusi manna rosiisatenna sabbakate yee kageeshshi geeshsha daafurinohunna yannasi guxxinohu mayiraati? Maganu, Yesuusi loosanno gede hasi'rino loosi konne ikkino daafiraati. Yesuusi ayeewoteno Annisi fajjo assanno. (Yohaannisi 8:28, 29) Ikkollana Yesuusa sabbakanno gede assinosihu wolu korkaatino no. Hakkuno, isiwa daannoha haammata manna mararanno daafiraati. (Maatewoosi 9:35, 36) Amma'note marooti konni mannira Maganunnirenna alaamisire halaale rosiisa hasiissannansa, mishshe agurtinonsa. Yesuusi, konni mannira Maganu Mangiste sokka macciishsha lowo geeshsha hasiissannonsata afino.

18 Yesuusi shaqqadohonna manna lowo geeshsha mararannoho. Konni daafira mannaho isiwa shiqa dikabbaaddinonsa. Wole agurranna qaaqquullu nafa isiwa mara hagiirsiissannonsa. (Maarqoosi 10:13-16) Yesuusi manna dimallaadannoho. Isi hafuurrenna taashshote xe'ne dibaxanno. (Maatewoosi 21:12, 13) Meyaata ajinshe la'nanni yannaranna mitte mabte noosekki yannara, Yesuusi meento ayirrisino. (Yohaannisi 4:9, 27) Yesuusi addinta ramba''aho. Mitte yannara hawaariyaatesira lekka hayishshino; duuchcha wote togoo looso loossannori ajinshe la'nanni mannaati.

1. Yesuusi sabbakanni no; 2. Yesuusi xiwantinore hursanni no

19 Yesuusi mannaho hasiisannore assate ayeewoteno qixxaawinoho. Xiwantinore hursate Maganu ayyaaninni maalale assi yannara, qixxaawinoha ikkasi roore leeltino. (Maatewoosi 14:14) Lawishshaho, dhiigu amadinohu mittu manchi Yesuusiwa daye, ‘Baxittoro hursattoera dandaattowe’ yii. Yesuusira konni manchi xissonna qarri macciishshaminosi. Konne mancho marare angasi diriirse amammadisihu gedensaanni, ‘Baxoommona huri’ yiisi. Hakkiinnino xiwamino manchi huri! (Maarqoosi 1:40-42) Hakku manchi mageeshshi geeshsha hagiidhinoro heda dandaatto?

GOOFIMARCHU GEESHSHA AMMANAMINOHO

20 Yesuusi goofimarchu geeshsha Maganoho hajajama lainohunni, dancha lawishsha ikkino. Babbaxxino qarri, fatanunna buutote mitiimma iillitusirono, iima noo Annisira ammanaminoha ikkino. Yesuusi shoshshoggikkinni Sheexaanu fatana seekke qeelino. (Maatewoosi 4:1-11) Mitte yannara, Yesuusihu umisi fiixi nafa iso diammanino; “machcharaarino” nafa yiinosi. (Maarqoosi 3:21) Yesuusi kayinni fiixisi yiinorinni hexxo dimudhino; Maganu uyinosi loosono loosa diagurino. Xonnannasi hattono minshannasi sammi yee saino ikkinnina diinnasi gawajjate diwo'naalino.—1 Pheexiroosi 2:21-23.

21 Yesuusi diinnasi anga jaddotenninna qarrunni reyi geeshsha nafa ammanaminoha ikkino. (Filiphphisiyusi 2:8) Manna ikke hee'rino heeshshora goofimarchu barra hiittoo qarra dandee sainoro huwati. Hakko barra jaddo loosinohu gede assine amandoonnisi; kaphphu naqaashe kassassinosi; amanynyootu xeinonsa daanynyooti beebbatenni faraddinosi; gamba yitino daga qacifattinosi hattono wottaaddarootu lowo geeshsha mitiinsitinosi. Haqqaho qolle misimaaretenni gannisi gedensaanni goofimarchu foolesi foole kae qoonqosi gotti asse, ‘Wo'mi!’ yii. (Yohaannisi 19:30) Ikkollana Yesuusi reyihunni sayikki barra, iimi Annisi ayyaanaamo biso oye reyotenni kayisinosi. (1 Pheexiroosi 3:18) Yesuusi shiima lamala keeshshe iimira galagale ha'ri. Hakkiichchono ‘Maganoho qiniiteenni ofolle,’ nugusimmate silxaane uyinannisi yanna agadhi.—Ibiraawuyaani 10:12, 13.

22 Yesuusi reyote geeshsha ammanaminoha ikkasinni mayi faro fanino? Isi reyo, Yihowa umo hedino garinni gannate ikkitanno uullara hegere heeshsho afi'neemmo faro fantinonke. Yesuusi reyo tenne faro fantinonkehu hiittoonniitiro aante noo fooliishshora ronseemmo.

QULLAAWU MAXAAFI ROSIISANNO ROSO

  • Masaalleenna wo'mitino masaalonna Maganu umisi coyi'rino qaali, Yesuusi Mesihichcha woyi Kiristoosi ikkinota buuxissanno.—Maatewoosi 16:16.
  • Yesuusi uullara daara lowo diri albaanni ayyaanaamo kalaqama ikke iima hee'rino.—Yohaannisi 3:13.
  • Yesuusi rosiisaanchoho, shaqqadohonna Maganoho wo'munni wo'ma hajajamate dancha lawishshaati.—Maatewoosi 9:35, 36.

*  Yesuusire masaalleenna wo'mitinota Daanieeli masaalo lainohunni xawishsha afi'rate Guwuursha lai.

#  Yihowa Kalaqaancho ikkino daafira Annaho yinanni. (Isayyaasi 64:8) Yesuusa kalaqinohu Magano ikkino daafira, iso Maganu Beettooti yinanni. Ayyaanaamo biso afidhinore wole iimi kalaqamano ikko Addaami kalaqinohu Magano ikkino daafira, insano Maganu oosooti yinanni.—Iyyoobi 1:6; Luqaasi 3:38.

%  Maganunnihu bayiru Beetti Maganu ledo taalo ikkinokkita ledde buuxate Guwuursha lai.


Xiinxallote Xa'muwa

1, 2. (a) Mitto maccaha ikkino manchi su'ma afootto yaa, hakko mancho seekkite egennootto yaa ikkinokkihu mayiraati? (b) Batinynyu manni Yesuusa lainohunni gurchaawinohu hiittoonniiti?

3. Yesuusi lainohunni halaale afa hasiissannohehu mayiraati?

4. “Mesihichcha” nna “Kiristoosi” yaannohu maaragete su'mi mayi tiro afi'rino?

5. Yesuusi rosaano isi maa ikkinota woˈmunni wo'ma ammantino?

6. Yihowa ammanamino manni Mesihichcha bade afanno gede assinohu hiittoonniitiro lawishshunni kuli.

7. Yesuusi lainohunni masaalleenna wo'mitino masaalo giddo lame hiitteeti?

8, 9. Yesuusi cuuami wote, isi daanno yinoonni Mesihichcha ikkinota leellishannori mayi ikki?

10. Qullaawu Maxaafi Yesuusi uullate aana ilamara albaanni hiikko hee'rinota kulanno?

11. Qullaawu Maxaafi Yesuusi Yihowara muxxete Beetto ikkinota kulannohu hiittoonniiti?

12. Maganunnihu bayiru Beetti Maganu ledo taalo ikkinokkita mayinni anfeemmo?

13. Qullaawu Maxaafi, Kiristoosi ‘leellannokki Maganira lawishshaho’ yaasi mayyaate?

14. Yihowahu muxxete Beetti manna ikke ilaminohu hiittoonniiti?

15. Yesuusi widoonni hinge Yihowa bashshonni roorsine anfeemmo yineemmohu mayiraati?

16. Yesuusi mannaho kulinoti qara sokka maati? Hatte sokka anni ayeeti?

17. Yesuusi rosiisinohu hiikkooti? Isi manna rosiisate seeda doogo ha'rinohu mayiraati?

18. Yesuusi akati giddo ate roore baxisannohehu hiikkonneeti?

19. Yesuusi mannaho hasiisannore assate ayeewoteno qixxaawinoha ikkinota leellishanno lawishsha kuli.

20, 21. Yesuusi goofimarchu geeshsha Maganoho hajajama lainohunni dancha lawishsha ikkinohu hiittoonniiti?

22. Yesuusi reyote geeshsha ammanaminoha ikkasinni mayi faro fanino?