Qara amadowa massie

Cinaanchu doorshiwa massie

Furchonniwa massie

Yihowa Farci'raasine

Sidaamu Afoo

Qullaawu Maxaafi Addinta Mayyee Rosiisanno?

GUWUURSHA

Qullaawu Maxaafi Masaalo Garinni 1914 Baxxino Dirooti

Qullaawu Maxaafi Masaalo Garinni 1914 Baxxino Dirooti

QULLAAWU MAXAAFI rosaano 1914nni baxxitino ikkito ikkitannota 40 diro meddi yitanno yannara albaanni balaxxe kultino. Hatti ikkito maati? Kuni diri baxxinoha ikkinota leellishshannoti mayi taje no?

Luqaasi 21:24 aanna Yesuusi togo yiino: ‘Barrinsa sa'a geeshsha Isiraeeli sircho ikkinokki manni Yerusaaleme kadanno.’ Yerusaalame Yihudu mannira qara katamaati; Nugusu Daawiti sircho ikkitino nugussano heedhanno baseeti. (Faarso 48:1, 2) Ikkollana tini nugussa dagate nugussawiinni baxxitinoreeti. Insa Magano riqibbe “Yihowa zuufaanera” ofoltino gede assine kulloonni. (1 Zeena 29:23) Konni daafira Yerusaalame Yihowa gashshoote riqibbanno.

Ikkina Maganu gashshooti ‘Isiraeelete sircho ikkinokki manninni kadamannohu’ hiittoonniiti? ‘Kadamannohuna’ mamarooti? Kuni ikkinohu 607 K.I.A. Baabiloonete gosa Yerusaalame horritu woyiteeti. Hakkiinni jammare, “Yihowa zuufaane” aana ofollinohu dino; qoleno Daawiti sirchinni moohino nugusi mittuno dino. (2 Negesti 25:1-26) Maganu gashshooti hegerera ‘kadame’ hee'rannoni? Dee'ni; korkaatuno masaalaanchu Hiziqeeli Yerusaalamenniha goofimarchu nugusa Sedeqiyaasi lainohunni togo yiino: “Umu xaaxaanchokki tiri; worraaqqano hoo'li.…Moohate qoosso noosihu daa geeshsha mittohono diuyinanni, anino hakkawote isira eemmosi.” (Hiziqeeli 21:26, 27) Daawiti sirchiha nugusimmate worraaqqa wodhanno gede “moohate qoosso” noosihu Yesuusi Kiristoosiiti. (Luqaasi 1:32, 33) Konni daafira Maganu gashshooti ‘kadamatenni’ fulannohu Yesuusi Nugusa ikkanno woteeti.

Tini lowo geeshsha hasiissanno ikkito mamaro wo'mitanno? Isiraeelete sircho ikkinokki manni wossanantino yanna moohannota Yesuusi xawisino. Daanieeli masaalora fooliishsho 4te noo xagge, tini wossanantino yanna mageeshsha keeshshitannoro buuxate lowo geeshsha kaa'litanno. Tini fooliishsho Baabiloonete Nugusi Nabukedenetsoori haaqiirinota albillitte ikkannore xawissanno haaqere kultanno. Isi mitte lowo haqqichcho qinxante ubbanna laino. Hatte haqqichcho tutumi siwiilunninna camotenni xaaxamino daafira ciira didandaanno. Hakkiinnino mittu sokkaanchi togo yii: “Lamala yanna keeshshona.”—Daanieeli 4:10-16.

Qullaawu Maxaafi mito wote, gashshoote xawisate haqqichcho horoonsi'ranno. (Hiziqeeli 17:22-24; 31:2-5) Konni daafira, haaqetenni leeltu haqqichcho qinxante uwase, Maganu gashshooti kadamanno gara leellishshanno. Kunino Yerusaalamete nugussa riqibbanno gashshooteeti. Ikkeennano ‘Yerusaalame kadantannohu’ yannate geeshsha calla ikkinota haaqe leellishshino; hattino ‘lamala yannaati.’ Tini yanna mageeshsha keeshshitannote?

Sase yannanna daratu, “mitto kume lame xibbenna leyawo barra” ikkinota Ajuu[j]a 12:6, 14 kultanno. Konni daafira “lamala yanna” hakkuyi ero yaano 2,520 barra ikkitanno. Ikkeennano Isiraeelete sircho ikkinokki manni Yerusaalame ubbuhunni 2,520 barri gedensaannino Maganu gashshoote ‘kada’ diagurino. Konni daafira taje leellishshannonte gede, tini masaalo hakkiinni sa'ino yanna kultanno. “Mitto barra mittu dirira” yitannote Zehulqu 14:34 nna Hiziqeeli 4:6 garinni, “lamala yanna” 2,520 diro ikkitanno.

Kuni 2,520 diri jammarinohu Birra 607 K.I.A. Baabiloonete gosa Yerusaalame huntu wotenna Daawiti sircho ikkino nugusi zuufaanetenni dirri woteeti. Tini yanna Birra 1914nni gooffino. Hakko diro ‘wossanantinoti Isiraeele ikkinokki manni yanna’ gooffino; qoleno Yesuusi Kiristoosi Maganu doorinoha iimi Nugusa ikkinohu hakko dirooti.*—Faarso 2:1-6; Daanieeli 7:13, 14.

Yesuusi masaalinonte gede, isi iima Nugusa ikkino yanna buuto qarrissanno ikkitonni baxxite egennantino. Hatti yanna olu, hude, uullate huxanonna xiwanu bati'rino yannaati. (Maatewoosi 24:3-8; Luqaasi 21:11) Tini alamete ikkito, 1914nni Maganunniti iimi Mangiste gashsha jammartinotanna tenne busha alamehu ‘goofimarchu barri’ jammarinota seekkite buuxissanno.—2 Ximootewosi 3:1-5.


*  Birra 607 K.I.A. kayise Birra 1 K.I.A. geeshsha 606 diro ikkanno. Zeero yinanni diri nookki daafira, Birra 1 K.I.A. kayise Birra 1914 M.D. geeshsha 1,914 diro ikkanno. Lamenka yaano 606 dironna 1,914 diro mitteenni lendummoro 2,520 diro ikkanno. Yerusaalame 607 K.I.A. ubbino gara ledde buuxate, Yihowa Farci'raasine qixxeessitinoha Qullaawa Borro Seekke Huwata (Ingilizete afoo) yinanni maxaafira “Diru Shallago” yinanni birxichcho lai.

“LAMALA YANNA”
2,520 diro
606 1/4 diro
Birra 607 K.I.A. kayise
Sadaasa 31, 1 K.I.A. geeshsha
1,913 3/4 diro
Arfaasa 1, 1 M.D. kayise
Birra 1914 geeshsha
607

‘Isiraeelete sircho ikkinokki manni Yerusaalame kadanno’

Yerusaalame giirante ba'anni no
←K.I.A. M.D.→ 1914

‘Moohate qoosso noosihu daanno’

Yesuusi Kiristoosi Nugusa ikkino

← Hiitte fooliishshora nooro lai