PHEEXIROOSINNA Yohaannisi Yesuusi reeshsha madaarroonniwiinni hadhuhu gedensaanni, Maariyaami callase hakko gattu. Iseno wi'litu. Hakkiinnino sa'u misilera laittonte gede, heeshshi yite waammate giddora la'u. La'anno wote waammate giddo lame sokkaano no! Sokkaanono, ‘Mayira wi'litanni nootta?’ yite xa'mituse.

Maariyaamino, ‘Mootichcha'ya fushshite adhitino; hiikko wortinorono diafoomma’ yite qoltu. Hatto yite badheegge caaqqi yitanno wote, mittu manchi no. Manchuno, ‘Aye hasidhanni nootta?’ yee xa'mise.

Maariyaami kuni manchi gate agadhe noo mancho lawinose; Yesuusi reeshsha adhinohuno iso lawinose. Konni daafira togo yitusi: ‘Ati haaroottoro, eeggatena woroottowa kulie.’ Kuni manchi kayinni Yesuusaati. Isi Maariyaami affinokki biso uddirino. Maariyaami isi su'mase gane woshshiseta kayinni, Yesuusa ikkinota affu. Iseno doddanni marte, ‘Mootichchawe afumma!’ yite rosaanote kultu.

Hakko barra lamu rosaano Eemahusi yinanni qachcha hadhanni heedhe mittu manchinni xaaddu. Insano Yesuusa shinoonni daafira lowo geeshsha dadillite no. Mitteenni hadhanna kuni manchi Qullaawu Maxaafinni jawaachchishannore kulinsa. Gedensaanni kayinni sagale ittara fooliishshidhuti, kuni manchi Yesuusa ikkinota affu. Hakkiinnino Yesuusi maaxaminsa; kuri lamu rosaano kayinni tenne hawaariyaatete kultara galagalte Yerusaalame higgu.

Insa higganni doogote heedheenna, Yesuusi Pheexiroosirano leelli. Wolootu rosaano tenne macciishshite hagiidhitu. Hakkiinnino ku'uri lamu rosaano Yerusaalame marte hawaariyaatetenni xaaddu. Insano doogote Yesuusi leellinonsata kultunsa. Tenne kultanni heedheenna mittu xagge ikkanno coyi kalaqami; hakku coyi maatiro afootto?

Tee''ee misile lai. Saanqaho qulfe ganne hee'neennanni Yesuusi minira e''e leelli. Rosaanono lowo geeshsha hagiidhitu! Hakko barri addinta hagiirsiisannoha di''ikkino? Yesuusi konni barrinni rosaanosira me''e hige leellinoro kiirte afatto? Onte hige leellinota kiiritto?

Yesuusi rosaanote leelli

Yesuusi rosaanote leelli wote, hawaariyaatichchu Toomaasi insa ledo dino. Konni daafira rosaano, ‘Mootichchawe anfummo!’ yite kultusi. Toomaasi kayinni ille'yanni laummokki diammaneemmo yii. Settu barri gedensaanni rosaano xaano qulfe gannoonni mine gamba yitu; hakkawote kayinni Toomaasi ledonsa no. Hedeweelcho Yesuusi minira e''e leelli. Toomaasino xa ammani.

Yohaannisi 20:11-29; Luqaasi 24:13-43.



Xa'muwa

  • Maariyaami, gate agadhe no yite heddino mancho mayitu? Ikkollana kuni manchi Yesuusa ikkinota mayinni affu?
  • Eemahusi yinanni qachcha hadhanni noorira lame rosaanora mayi tuncu yiinsa?
  • Lame rosaano Yesuusa la'nummo yite hawaariyaatete kultanni heedheenna, xagge ikkannori mayi kalaqami?
  • Yesuusi harunsaanosira me''e hige leellino?
  • Rosaano Mootichcha anfummo yite kultusita Toomaasi mayyii? Settu barri gedensaanni kayinni mayi maikki?

Wole xa'muwa

  • Yohaannisi 20:11-29 nabbawi.

    Yesuusi Yohaannisi 20:23 aana coyi'rino qaali, mannu oosora cubbo maarate silxaane uyinoonni yaateni? Xawisi. (Far. 49:2, 7; Isa. 55:7; 1 Xim. 2:5, 6; 1 Yo. 2:1, 2)

  • Luqaasi 24:13-43 nabbawi.

    Wodananke Qullaawu Maxaafi halaale adhanno gede assine qixxeessi'ra dandiineemmohu hiittoonniiti? (Luq. 24:32, 33; Izi. 7:10; Maat. 5:3; Soq. Los. 16:14; Ibi. 5:11-14)