Qara amadowa massie

Cinaanchu doorshiwa massie

Furchonniwa massie

Yihowa Farci'raasine

Sidaamu Afoo

Qullaawu Maxaafi Xagge Roseemmo Maxaafa'ya

Xagge 97: Yesuusi Nugusa Ikke Dayi

Xagge 97: Yesuusi Nugusa Ikke Dayi

YESUUSI lame balloota huucci'raano hursihunni shiima yanna gedensaanni, Yerusaalamete mule noo qachcha dayi. Lame rosaanosi togo yii: ‘Qachchaho giddooggine martine harrichchote ilmattichcho usurante noota affinannina tirtine abbe''e.’

Insano harrichchote ilmattichcho abbitusita Yesuusi gulufi. Hakkiinnino mule noo katama Yerusaalame ha'ri. Katama shiqqi yiita lowo manni isiwa dayi. Dayinohu rooru manni uddirino uddano fushshe doogote kari. Wolootu kayinni saatte hiiqqaqqite abbitu. Abbitino saatte doogote karte qoonqonsa gotti assite togo yitu: ‘Yihowa su'minni daanno nugusi maassaminoho!’

Mannu Yesuusa hagiirrunni haaranni no

Seeda yanna albaanni haaruuddu Isiraeelete nugussa mannaho leellate harrichchote ilmattichcho guluffe Yerusaalame dagganno. Yesuusino xa hatto assanni no. Kuri mannooti Yesuusi nugusansa ikkara hasidhinota leellishshanni no. Ikkollana nugusa ikkannota baxinohu baalanka manna di''ikkino. Yesuusi Maganu minira mari yannara ikkinorinni tenne afa dandiineemmo.

Maganu mine Yesuusi ballootanna naafoota hursi. Tenne ikkito qaaqquullu la'uti, qoonqonsa gotti assite Yesuusa galattu. Ikkollana kuni coyi kakkalaano hanqiseenna Yesuusa, ‘Qaaqquullu yitannoreno macciishshattoni?’ yitu.

Yesuusino togo yee qoli: ‘Ee macciishsheemmo. ‘Qaaqquullu afiinni Maganu galata qixxeessanno’ yaannoha Qullaawu Maxaafi giddo dinabbabbinoonni?’ Konni daafira qaaqquullu Maganu doorino nugusa galatansa suffu.

Ninkeno kuri qaaqquulli gede assa hasi'neemmo; dihattooti? Mitu mitu manni Maganu mangistere mannaho kulleemmokki gede assara wo'naalanno. Ikkollana ninke kayinni Yesuusi mannaho assannore xaggete coye wolootaho kula diagurreemmo.

Yesuusi uulla noo yannara nugusa ikkanno yanna di''iillitino. Tini yanna daggannohu mamooteetiyya? Yesuusi rosaano tenne yanna affara hasidhino. Aanchine tenne hajore ronseemmo.

Maatewoosi 21:1-17; Yohaannisi 12:12-16.



Xa'muwa

  • Yesuusi Yerusaalamete mule nooha shiima qachcha dayi wote, rosaanosi ma assitanno gede kulinsa?
  • Misilete aana la''attonte gede, Yesuusi Yerusaalamete katama shiqqi yiita mayi maikki?
  • Qaaqquullu, Yesuusi ballootanna naafoota hursanna la'uti ma assitu?
  • Yesuusi hanqitino kakkalaano mayyii?
  • Ninke Yesuusa galattu qaaqquulli gedeere ikka dandiineemmohu hiittoonniiti?
  • Yesuusi rosaano maa afa hasidhino?

Wole xa'muwa

  • Maatewoosi 21:1-17 nabbawi.

    Yesuusi Nugusa ikke Yerusaalame eino gari, Roomu gashshooti yannara gobba horritannori wottaaddaru roorrooti qeelte e'anno garinni baxxannohu hiittoonniiti? (Maat. 21:4, 5; Zek. 9:9; Fil. 2:5-8; Qol. 2:15)

    Yesuusi Maganu minira ei yannara Faarso 118 qummi assite iso galatturi Isiraeelete labballi oosowiinni, yannankera noo ooso mayi roso afidhanno? (Maat. 21:9, 15; Far. 118:25, 26; 2 Xim. 3:15; 2 Phe. 3:18)

  • Yohaannisi 12:12-16 nabbawi.

    Yesuusa galattu mannooti saattu daro horonsi'ransa maa leellishshanno? (Yoh. 12:13; Fil. 2:10; Yo. Aj. 7:9, 10)