Qara amadowa massie

Cinaanchu doorshiwa massie

Furchonniwa massie

Yihowa Farci'raasine

Sidaamu Afoo

Qullaawu Maxaafi Xagge Roseemmo Maxaafa'ya

Xagge 95: Yesuusi Rosiisino Gara

Xagge 95: Yesuusi Rosiisino Gara

MITTO barra Yesuusi mittu manchira jaalasi baxa hasiissannosita kulisi. Manchuno Yesuusa, ‘Jaali'ya ayeeti?’ yee xa'mi. Yesuusi kuni manchi ma hedinoro afino. Kuni manchi, ‘Ane jaali sircho'ya ikkinohonna ammana'ya harunsanno mannaati’ yee hedino. Yesuusi iso mayinoro hanni la'no.

Yesuusi mito wote xagge coyi're rosiisanno. Konne manchono hatto asse rosiisaraati. Yesuusi mittu Yihudu manchinna Samaariyu manchi xagge coyi'ri. Lowohu Yihudu manni Samaariyu manna baxannokkita albaanni ronsoommo. Yesuusi coyi'rino xagge konni woroonni noote.

Mitto barra Yihudu manchi ilaalaame doogo tayise Iyyaarko ha'ranni no. Ikkollana mulqidhannori qalxite amaddusi. Woxesi mulqidhe isono gante heeshshotenna reyote mereero tugge hadhu.

Kuni coyi ikki gedensaanni mittu Maganu mini kakkalaanchi hatte doogo dayi. Isi ganneenna doogote uwino mancho lai. Kuni kakkalaanchi marichcho assannoha lawannohe? Konne mancho afiti wirri yee wole doogo hige ha'ri. Hakkiinnino Magano lowo geeshsha amma'nino yinoonnihu wolu manchi hakkaa hige dayi. Isi Leewaawichchaho. Isina gannoonni mancho kaa'lara uurriyya? Dee'ni, diuurrino. Kuueeti kakkalaanchunna Leewaawichchu doogote faffe hadhanna lai.

Ikkollana gannoonni manchi ledo noohu ayeetiro lai. Isi Samaariyu manchooti. Yihudu mancho kaa'lanni no. Madasira xagichcho gananni no. Hakkunni gedensaanni konne Yihudu mancho fooliishshirannowanna woyyaawannowa massisi.

Danchu Samaariyu manchi

Yesuusi tenne xagge gudihu gedensaanni xa'mo xa'misi mancho togo yii: ‘Kuri sasunku mannooti giddo ganamino manchi jaali hiikkonneeti? Kakkalaanchohonso, Leewaawichchahonso Samaariyu manchooti?’

Manchuno togo yee qoli: ‘Samaariyu manchooti. Kuni manchi ganamino manchira danchare assino.’

Yesuusi qole togo yii: ‘Halaale yootto. Atino hadhe wolootaho hatto assi.’

Yesuusi rosiisino gari didanchaho? Yesuusi Qullaawu Maxaafi giddo yiinore macciishshineemmoha ikkiro lowore danchare ronseemmo; dihattooti?

Luqaasi 10:25-37.



Xa'muwa

  • Mittu manchi Yesuusa mayyee xa'mi? Mayira?
  • Yesuusi rosiisate mite mite yannara maa horonsi'ranno? Yihudootanna Samaariyu manna lainohunni, albaanni maa ronsoommo?
  • Yesuusi kuli xagge giddo, Iyyaarko ha'ranni noohu Yihudu manchi maikki?
  • Yihudootu kakkalaanchinna Leewaawichchu doogo hadhanni dagge ma assitu?
  • Misilete aana, ganneenna uwinoha Yihudu mancho kaa'lanni noohu ayeeti?
  • Yesuusi xagge kule kaiti mayitanno xa'mo xa'mi? Manchu mayyee qoliyya?

Wole xa'muwa

  • Luqaasi 10:25-37 nabbawi.

    Yesuusi qaxxi yitino dawaro qolantenni, Higge lowo geeshsha afinoha mitto mancho coye heeshshi gotti asse la''anno gede assinohu hiittoonniiti? (Luq. 10:26; Maat. 16:13-16)

    Yesuusi, macciishshitannosi mannooti manna mulla kae giwate laonsa biddi assidhanno gede kaa'late, lawishsha horonsi'rinohu hiittoonniiti? (Luq. 10:36, 37; 18:9-14; Tit. 1:9)