Qara amadowa massie

Furchonniwa massie

Xagge 92: Yesuusi Reyitinore Kayisino

Xagge 92: Yesuusi Reyitinore Kayisino

KOYE la''atto beetto 12 dirite. Yesuusi angase amade no; amasenna annise kayinni mule uurre no. Insa togo ikke hagiidhinohu mayiraatiro afootto? Hanni la'no.

Yesuusi Iyyairoosi beetto reyotenni kayisanni no

Beettote anni Iyyairoosi yinanni murrichchaati. Mitto barra qaaqqosi xiwante goxxu. Goxxolla ikkinnina diwoyyinose; xiwanu lexxanni ha'rise. Iyyairoosinna galtesi beettonsara xiwanu lexxanni ha'rino daafira lowo geeshsha dadillitu. Insara noonsa beetto iseetilla. Konni daafira Iyyairoosi Yesuusa hasanni ha'ri. Iyyairoosi Yesuusi assanni noo maalalere macciishshino.

Iyyairoosi Yesuusinni xaadi wote, Yesuusi ledo lowo manni no. Iyyairoosi lowo manni giddoonni hige mare Yesuusira lekkate uwi. Yesuusa togo yee huucci'ri: ‘Qaaqqo'ya lowo geeshsha xiwantino. Eeggatena amo hursise.’ Yesuusino maahoyye yii.

Hadhanna doogote, ledo noohu lowo manni Yesuusiwa shiqqi yaara mimmito cifanni no. Hedeweelcho Yesuusi agure uurre, ‘Kisiehu ayeeti?’ yee xa'mi. Yesuusi wolqa isiwiinni fultanna afino daafira, kisinosihu noota afino. Kisinosihu ayeetiyya? Kissinositi 12 diro xiwante keeshshitinote mitte manchooti. Ise Yesuusiwa shiqqi yite uddanosi kisse hurte ka'ino!

Iyyairoosi tenne laiti sheshifati; korkaatuno Yesuusira xiwantinore hursa shiimare ikkitinota laino. Hakkiinnino sokkaanchu daye Iyyairoosira togo yee kulisi: ‘Yesuusa beebba daafursitooti. Qaaqqokki reyitinona.’ Yesuusi tenne macciishshe Iyyairoosi, ‘Massooti; qaaqqokki hurtannona’ yiisi.

Insa baalunku Iyyairoosi qae martanno wote, mannu lowo geeshsha xissiisire wi'lanni no. Yesuusi kayinni togo yiinsa: ‘Wi'litinoonte; beetto goxxinolla, direyitinona.’ Mannootu kayinni beetto reyitinota affino daafira Yesuusa oso'litusi; qolteno qacifattusi.

Hakkiinnino Yesuusi beettote annanna ama qoleno sase hawaariyaatesi beetto noo minira haare ei. Isino beettote anga amade, ‘Gotti yii!’ yiise. Koye misilete aana la''attonte gede beettono reyotenni ka'u. Iseno gotti yite ha'rantu! Annisenna amase lowo geeshsha hagiidhinohu iseraati.

Yesuusi umo reyotenni kayisinoti ditenne beettooti. Umo reyotenni kayisinohu Nayina yinanni katamira heedhanno gunnitte mancho beetto ikkinota Qullaawu Maxaafi kulanno. Yannate gedensaanni Yesuusi Maariyaaminna Maarta rodoo Alaazaarino reyotenni kayisino. Yesuusi Maganu doorino nugusa ikke moohanno yannara, reyinoha lowo manna reyotenni kayisanno. Tini lowo geeshsha dihagiirsiissannonke?

Luqaasi 8:40-56; 7:11-17; Yohaannisi 11:17-44.



Xa'muwa

  • Misilete aana noo beetto anni ayeeti? Isinna galtesi lowo geeshsha dadillitinohu mayiraati?
  • Iyyairoosi Yesuusa afiti ma assi?
  • Yesuusi Iyyairoosi qae ha'ra hanafita, mayi maikki? Doogote hadhanna Iyyairoosira mayitanno sokka kullisi?
  • Iyyairoosi mine noo manni Yesuusa oso'lihu mayiraati?
  • Yesuusi sase hawaariyaate, beettote annanna ama haare beetto noowa mare ma assi?
  • Yesuusi reyotenni kayisinori wolootu ayeooti? Togo assasi maa leellishshanno?

Wole xa'muwa

  • Luqaasi 8:40-56 nabbawi.

    Yesuusi mararannoha ikkinotanna mitto coye korkaatiweello assannoha ikkinokkita mundee du'nantannose manchora leellishinohu hiittoonniiti? Xaa yannara Kiristaanu cimeeyye konninni mayi roso afidhanno? (Luq. 8:43, 44, 47, 48; Zel. 15:25-27; Maat. 9:12, 13; Qol. 3:12-14)

  • Luqaasi 7:11-17 nabbawi.

    Yesuusi Nayina katami gunnittera coyi'rinori, baxxanno manni reyinonsare lowo geeshsha sheshifachchishannohu mayiraati? (Luq. 7:13; 2 Qor. 1:3, 4; Ibi. 4:15)

  • Yohaannisi 11:17-44 nabbawi.

    Banxanni manni reyiro wi'la gara ikkitinota Yesuusi leellishinohu hiittoonniiti? (Yoh. 11:33-36, 38; 2 Sam. 18:33; 19:1-4)